Njuike sisdoaluide

Nuorat hálidit doaibmat go cealkámušaiguin áššit eai ovdán

Suoma Sámi Nuorat rs, Greenpeace ja Suohpanterror ordnejedje veahkaválddihis vuostálastima skuvlejumi Anáris. Lassána dárbu njuolga doaimmaiguin čájehit miela sisabahkkemiid vuostá, dadjaba Petra Laiti ja Ánne-Sofe Niittyvuopio sivvan dasa go dákkár NVDA-kursa dál ordnejuvvui.

Koulutus Inarissa 31.8.-2.9.2018
Govva: Jonne Sippola
Njuolggo doaimma hárjehalle skuvlejumis Anáris. Govva: Jonne Sippola

– Skuvlejupmái oinniimmet dárbbu go sisabahkkemiid várra lassána, dadjá Suoma Sámi Nuorat -searvvi ságajođiheaddji Petra Laiti.

Vahkuloahpa skuvlejupmái Anáris oassálaste birrasii 15 nuora. Eanáš nuorat leat 18 - 30 jahkásaččat. Nuorat gevve čađa ovdamearkkaid suodjalandoaimmain ja vuostálastimis nugo Ellos Deatnu ja Standing Rock -lihkadusaid.

– Lean doaibman nuoraidsearvvis ja juo 13-jahkásažžan leamašan čállimin cealkámušaid, muhto dat eai oro veahkeheamen masage, dadjá Ánne-Sofe Niittyvuopio, guhte oassálasttii veahkaválddihis njuolggo doaimma NVDA-kursii (Non-Violent Direct Action).

Suoma Sámi Nuoraid, Greenpeace ja Suohpanterrora oktasaš ulbmilin lea bealuštit luonddu ja eallima eavttuid Sámeeatnamis. Searvvit hálidit seailluhit davimus vuvddiid, mat leat sápmelaš boazodoallui dehálaččat.

Dálkkádatrievdan ja industriija sisabahkkemat leat maiddái sivvan dán lágan doaimma dárbbašlašvuhtii, ákkastallet skuvlejumi ordnejeaddjit.

– Dálkkádatrievdama váikkuhusat oidnojit arktalaš guovllus jo dál, ja rievdadus lea ja boahtá leat erenoamaš alvvus ja johtil. Mii juohkit Suoma Sámi Nuoraid fuola davimus luonddu seailumis ja hálidit doaibmat ovttas dan suodjaleapmin, dadjá Greenpeace Arktisa ja Antarktisa áššedovdi Laura Meller preassadieđáhusas.

Ođđasamosat: paketissa on 10 artikkelia