Njuike sisdoaluide

Sámefáhcat leat uhca gárvu, muhto sisttisdollet ollu dieđu – Sámemusea Siida čájáhallá fáhccamálliid

Ođđa materiálat, mállet ja ivnnit lea njahkan maid sámi fáhccamáilbmái, vaikko árbevierutge ellet ain.

Išeguđetlágan fáhcat ja fáhccahearvvat.
Filmma lea doaimmahan Kaisa Aikio ja govven/čuohppan Anneli Lappalainen ja Kirsti Länsman. Filbma vuolgá johtui, go deaddilat unna play-boalus gurut ravddas.

Uhca gárvun fáhcain sáhttá oaidnit stuorra muitalusa seammaláhkai go gávttis: gos olmmoš boahtá, man sohkii son gullá ja juoba daid gođđán duojára. Fáhccamohta maid goit lea nuppástuvvan ođđa málliid ja materiálaid dihte.

Sámemusea Siiddas Anáris lea dán jagi oaidninláhkai smávva fáhccačájáhus (siirryt toiseen palveluun). Dán háve oaidninláhkai leat nuortalaččaid nu dološ go dálá fáhcat. Boahtte mánus lea anáraččaid vuorru ja de vel davvisápmelaččaid guokte málle nu, ahte guđege čoakkáldat lea ovtta mánu oaidnimis Siiddas, muitala amanueansa Anni Guttorm Sámemusea Siiddas.

– Sierra guovlluid siste leat sierra mállesaš fáhcat. Nu ahte don sáhtát lohkat, man bearrašii dahje sohkii gii nu gullá, go leat dihtolágan fáhcat, čilge Guttorm.

Ođđa materiálat, mállet ja ivnnit lea njahkan maid fáhccamáilbmái. Nuba čájáhusas leat maid ođđaáigásaš fáhccamállet.

Sámemusea Siidda amanueansa Anni Guttorm. Govva: Kirsti Länsman / Yle

Fáhccafabrihka jorrá – Gođđá áli go čohkánastá

Anárlaš duodječeahppi Hilma Mustonen lea viššal maid gođđit. Árbevirolaš sámemálliid lassin son gođista vaikke maid.

– Gal mun gođán vaikke maid beare sáhtto, makkár miella lea. Gođán sealbbosfáhcaid ja geahčan rávvagiid mannu girjjis ja gođán dakkár nu daddjojuvvon rivguid fáhcaid, Hilma Mustonen čaimmiha.

Hilma Mustonen gođđá áli go čohkánastá. Govva: Kaisa Aikio / Yle

Hilma gođđá áli, go son čohkánastá vulos. Sákkit skillet ja gárvves fáhccapárra eambo gahččá sákkiin eret. Málliin lea čielga juohku geasa dat gullet, ja son mielas gođđáge Kárášjoga málle nu nissoniid go albmáid fáhcaid.

Dát fáhcat leat vuovdimassii Sámi Duoji buvddas Anáris. Govva: Kaisa Aikio / Yle

Dolin fáhcaid materiálan lunddolaččat leai buhttes ullu ja ainge nuortalaččat ieža báidne láiggiid. Dál gávppis oažžu vaikke maid.

Siidda amanuensa Anni Guttorm muitala, ahte sámegávttiin lunddolaččat galget lea dasa heivejeaddji albma fáhcat. Muhto árgabeaigárvodeamis ođđa materiálat ja ivnnit leat boahtán fárrui.

– Sáhttá oaidnit vaikke vilgesrukses fáhcaid, ahte doppe lea geavahuvvon ovdamearkka dihte pink-ivnni. Mu mielas dat lea somá, ahte leat ođđa ivnnit ja maiddái vehá ođđa gurgosatge bohtet dohko, dahje hearvamállet, dadjá vel Anni Guttorm Siiddas.

Ođđasamosat: paketissa on 10 artikkelia