"Olizit nygöi vaikkani"
Suomi-TikTokas kaikin tietäh "Karjala-inehmizen". Maura Häkki pagizou karjalažuoh näh, hos vihaviestii piäh pakkuu.
Maura Häkki ei ole suomelaine, häi on karjalaine. Ga konzu häi sanelou sih näh TikTokas kymmeniletuhanzile, äijät ei ellendetä.
TikTokas Maura Häkki on @maurash. Omien videoloin vuoh häi sellittäy, midä eruo on suomelazien da karjalazien keskes sego sanelou, kui karjalazii on syrjitty Suomes.
Iččeh videolois Häkki pagizou livvinkarjalakse, omassah died’oin kieleh.
Videoloil on tuhanzii kačondukerdoi da sadoi kommentoi. Eibo ni kai kommentat olla hyväččäzet.
Nikenen mielenkiinduo se ei viritä. Ole vaikkani. Tapa iččeni.
Konzu Häkki ei julgua videoloi nenga kahteh päiväh, kommentois jo kyzelläh, jogo häi on öglästännyhes karjalazih šipainiekkoih.
Minulleni sanotah, gu olen agressiivine da hyökäččy. Ga videoloin kommentoin lugijes duumaičen, kenbo meis on täs tovengi agressiivine.
Häkin tuatan sugu on rodužin Hyrzyläspäi, Raja-Karjalan koillisčuraspäi, kudai on nygözen Ven’an puolel.
Luovutetun Karjalan alovehel on olluh karjalazen rahvahan kodirandu, da karjalazil on oma kieli da kul’tuuru. Karjalazet eletäh Suomes dai Ven’al, ga monet heis ei pietä iččie ni suomelazinnu, ni ven’alazinnu. Hyö ollah karjalazet!
Maura Häkin died’oi tuli voinien aigua evakonnu Juugah, kus Maura on roinnuh. Hänen pereheh kuulujii on kiuzattu, riäzitelty da ryssäkse nimitelty karjalažuon periä. Pereh heitti karjalakse pagizendan.
Äijät karjalazet ollah peitelty omua identitiettua muokkuandan täh – sulettu suomelazienke yhteh, kerran muudu variantua ei olluh.
Nygöi Jovensuus eläi Maura Häkki on Suomen kanzalaine, ga nikonzu häi ei ole pidänyh iččie suomelazennu.
Konzu Maura tiijusti tuatan starinas da karjalažuos, kai kerras selgenigi: neče on minun oma!
Enne duumaičin, gu karjalazet ollah vaigu net vahnat ristikanzat, vahnembi sugupolvi. Nikus en nähnyh karjalastu nuordu. Sit myöhembä lövvin somes muidu karjalazii nuorii da ellendin, gu karjalažus ei ole kuolluh.
TikTok tundietah enne kaikkie tansi- da šuutkuvideolois. Aktivizmu da poliitiekku puututtih nečine ei muga ammui.
Häkki arvivoi, gu hänen videoloi kačotah nenga 10–20-vuodehizet suomelazet.
Nuoret vie ruvetah konzugi piättämäh dielolois. TikTokas voin virittiä heijän mielenkiinduo dielolois ajattelendah. Heijän mielet vie ei olla ihan lopullizet, net voijah vie muuttuo.
Häkki on inspiriiruinnuhes ezimerkikse kanduamerikkalazis tiktokaččulois, kuduat sanellah omah alguperäh näh.
Häkin tavoittehennu on, gu nuoret tiijustettas karjalažuos enämbän da ennakko- da hairavoduumavot sih näh hävittäs.
Ennakko- da hairavoduumavuo ongi kylläl, kerran školas nimidä ei sanella karjalažuoh näh.
Luajin tädä sežo juuri niilöin vihakommentoin täh. Saneltas karjalažuoh näh školas, niken ei kirjuttas moizii kommentoi.
Ozakse pozitiivistugi kommentua tulou.
Mindäh täs ei sanella histourien urokoil? Terveh, minulgi on karjalazet juuret! Sinä viritit minuu sellittämäh omii juurii. Nygöi tiijän net!
Nengozet kommentat ozutetah, gu kohtavundah voit vaikuttua da mielii voit muuttua.
Tekijät
Julkaistu 27.3.2020 12:02