Karjalazen Kul’tuuran Eistämisfondu vaikuttau mones kohtas da dielos.
Joga vuottu se ezimerkikse jagau äijän abudengua tiijon luadijoile da eri aloin taidoilijoile.
– Jälgimäzen kymmenen vuvven aigua fondu on eistänyh edehpäi karjalastu kul’tuurua 5,6 miljonal eurol, sanou fondan toimindanjohtai Satu Kokkonen.
Karjalazen Kul’tuuran Eistämisfondu finansiiruiččou lähivuozien aigua paiči muudu kolmanden sugupolven karjalažuoh liittyjiä tutkimusprojektua.
– Olemmo eččinyh uvvenluadustu avavustu da se ozuttihes ylen mieldykiinnittäjäkse. Kui kolmanden sugupolven linnalazet karjalazet ellendetäh karjalažuon da kui siirdolažuon traumat heis nävytäh?
Karjalazen Kul’tuuran Eistämisfondan ruandu pohjavuu yksittäzien ristikanzoin da yrityksien lahjoituksih.
Jälgimäzen kymmenen vuvven aigua tulluzien lahjoituksien arvo on 8,5 miljonua euruo.
Jovensuus piäpaikkua pidäjäl fondal on äijy kiindehistyö, kudamien luvus ezimerkikse Karjalan Taloi da Wanha Jokela. Suurin vuitti tulolois roih kiindehistön vuograleandamizes.
Karjalazen Kul’tuuran Eistämisfondale pidi pruaznuija 70-vuozipäiviä mennyt nedälinlopul, ga pruazniekku on peräitetty koronaviirusan täh.