Suomas leat válmmaštallamin ruvkelága ođasmahttima.
Sámedikkis ruvkelága ođasmahttima gieđahalle gieskat maid dievasčoahkkima sáttaságastallamis. Sámediggi lea oktan čanusjoavkun ruvkelága ođasmahttin bargojoavkkus ja galgá vel leat hábmeme sáttaságastallama vuođul dan, maid ovddidit lága ođasmahttimis. Sámediggi atná ruvkelága ođasmahttima oktan dán čavčča dehálamos áššin.
Sámedikki ságadoalli Tuomas Aslak Juuso oaidná, ahte árbevirolaš ealáhusaiguin ruvket eai heive oktii.
– Sámeguvlui ja min árbevirolaš ealáhusaide ruvkedoaimmat eai riekta heive. Dat mo čázadagat ja buhtes luondu dárbbašuvvo, dat lea nana vuolggasadji, ahte ruvket eai livčče sámi ruovttuguvlui ollet, Juuso lohká.
Juuso: "Doaibma, mii eastada nuppi kultuvrra čađaheami, ii sáhte leat Suomas dohkálaš"
Sámedikki ságadoalli Tuomas Aslak Juuso mielde vuordámuš ruvkelága ektui livčče dat, ahte dat sihkkarasttášii sápmelaččaid vuoigatvuođaid álgoálbmogin ollislaččat.
Tuomas Aslak Juuso oaivvilda maiddái, ahte suodjalanguovlluid, dego Natura 2000 -guovlluid, berrešii ráfáidahttit ruvkedoaimmain. Son lea dan oaivilis, ahte ruvkedoaibma ii fal heive sámeguvlui.
– Dakkár doaibma mii heajuda dahje eastada nuppi kultuvrra čađaheami, ii sáhte leat Suomas dohkálaš. Dan dihte oainnán, ahte ruvkedoaibma ii čága oktii sámekultuvrrain, dadjá Juuso.
Bargo- ja ealáhusministeriija válmmaštallan hámus lea dál gulaskuddamis. Gulaskuddama maŋŋá hápmosii bargojuvvojit dárbbašlaš rievdadusat ja dat geigejuvvo ráđđehusa evttohussan riikkabeivviide juovlamánus 2020.
Aktiivvat geahččalit váikkuhit ruvkelága ođasmahttimii
Sullii mánotbadji dassái Minna Näkkäläjärvi ovttas sáttagottiin geigii birasministtar Krista Mikkonenii 37 000 nama adreassa, mii vuostálastá ruvkeplánaid Giehtaruohttasa duoddariidda.
Näkkäläjärvi muitala, ahte sin aktiivajoavku geahččala vel váikkuhit ruvkelága ođasmahttimii. Birasministeriijas sáttagoddi fidnii buori vuostáiváldima, ja danin Näkkäläjärvi lohká leat nana jáhku dasa, ahte Giehtaruohttasii ruvkket eai boađe.
– Mus lea nana jáhkku birasministara sániide ja váikkuhanváldái, Näkkäläjärvi muitala.
– Dábálaš olmmožin das ii leat nu beare olu, maid sáhttá eará dahkat, go geahččaladdat fal váikkuhit buot vugiiguin dáidda láhkaválmmaštallamiidda, árvala Näkkäläjärvi.
Dálá ruvkeláhka vázzá Näkkäläjärvi mielde máŋgga rievtti ja ealáhusa badjel, danin son vuordáge stuorra nuppástusaid láhkii. Giehtaruohttasa aktiivvat eai leat heaitán bargamis ruvkelága ektui, vaikko adreassa leage juo geigejuvvon.
– Iihan Suomas sáhte leat dakkár láhka, mii manná buot badjel, Näkkäläjärvi dadjá dálá lágas.