Tazavallan prezidentan iččenäžyspäivän vastahotandua tänä vuon ei pietty koronaviirusan täh. Ylen Linnan pruazniekku 2020 -lähetysty iččenäžyspäivänny kačoi yhtelläh keskimiärin 1,53 miljonua hengie. Raviembi aigu oli ehtäl kaheksan jälles. Silloi lähetysty kačoi läs 1,65 miljonua hengie.
Perindöllizen pruazniekallizen vastahotandan sijas Linnan pruazniekas kačottih prezidentan Sauli Niinistön da hänen mučoin Jenni Haukion pruazniekkua, vastattih gostii Suomen eri čuppuloispäi da nähtih kul’tuuruezityksii.
– Iččenäžyspäivän syväindö lykystyi viemäh suomelazet kodidivanoilpäi pruaznuimah uudeh luaduh. Nengomal poikkevuksellizel aigua on hyvä mieles sit, gu yhtes ozituimmo luadimah pruazniekkukodvazen, kuduan piimmö yhtelläh turvallizesti eriže korona-aigua. Suomelazien tahto ottua ozua yhtehizeh pruazniekkah nägyi aktiivizes viestilöin da kuvien työndämizes sego čatas pagizendas, nenga sanou Ylen tapahtumupiälikkö Asta Kujala.
Suomen- da ruočinkielizih čattoih ehtän aigua otti ozua 58 000 hengie. Niilöih työttih nenga 16 000 viestii. Fotokuvua rahvahalpäi tuli piäl 11 000.
Ylen iččenäžyspäivän tv-lähetykset tavoitettih 2,76 miljonua hengie. Keräl ollah Linnan pruazniekan ližäkse Kohti Linnan pruazniekkua -lähetys da Linnan jatkot -programmu. Kohti Linnan pruazniekkua -programmua kačoi ehtän aigua keskimiärin 1,13 miljonua hengie. Suurin joukko silloi oli 1,3 miljonua.
Mulloi Linnan pruazniekkua kačoi keskimiärin 2,28 miljonua hengie da iččenäžyspäivän programmat tavoitettih piäl 3 miljonan kaččojan. Silloi keräl oli sežo iččenäžyspäivän paruadu, kudamua tänä vuon ei pietty.
Poikkeusajan Linnan juhlat kokosi yli 1,6 miljoonaa katsojaa