Ođđasamos dieđut koronavirusis: Njávdáma rádjá rahpasa Norgii jáhkkimis bearjadaga, Lappi riikkkabeaiáirasat gáibidit ráđđehusas doaimmaid gádjundihte turismma

Ođđasamos dieđut koronavirusis 4.6. rájes

3.6. dii. 7.50 Norga rahpá rájá Njávdámis jáhkkimis bearjadaga

Norgga riekteministeriija árvala, ahte Njávdáma rájá alde oažžu johtit Norgii jo bearjadaga rájes. Dán rádjai Njávdáma rájás lea beassan dušše Supmii iige Norgii, dasgo doppe ii leat koronatestenvejolašvuohta.

Norgga riekteministeriija mielde sii eai oainne siva doallat rájá gitta go koronadilli Suoma bealde lea bisson ráfálažžan. Jus dilli vearrána, de Norgga bolesis lea vejolašvuohta giddet rájá.

Mátta-Várjjat gielda ráđđádallá áššis dárkilabbot otne rádjeeisseválddiiguin.

3.6. dii. 7.24 Lappi riikkabeaiáirasat gáibidit doaimmaid gádjundihte Lappi turismma

Lappi riikkabeaiáirasat eai leat duhtavačča sosiála- ja dearvvašvuođaministeriija evttohan gáibádussii guovtti koronateasttas riikkii boahtima oktavuođas. Sin mielas Suopma galggašii čuovvut eará Eurohpa riikkaid linjemiid, amas Lappi turismmasuorggi gilvvohallan hedjonit eará riikkaid ektui.

Lappi riikkabeaiáirasat gáibidit ráđđehusas čielga evttohusa das, mo gádjut Lappi turismma.

Sosiála- ja dearvvašvuođaministeriija evttohusa mielde buot olbmot geat bohtet Supmii, galget duođaštit ahte leat buohcan koronavirusdávdda, leat boahkuhuvvon dahje leat ožžon justa ovdal riikii boahtima negatiiva bohtosa koronaiskkosis.

Jus olbmos ii leat teastaduođaštus, de son galgá fitnat teasttas dalán go olle Supmii.

Dasa lassin buohkat, geat eai leat boahkuhuvvon dahje buohcan dávdda, galget fitnat ođđasit koronaiskkosis eanemustá 5 jándora siste go leat boahtan Supmii. Dan áiggi sii galget leat maiddái karantenas.

Loga eambo áššis suomagillii dáppe.

2.6. dii 14.57 Norga áigu rahpat Njávdáma rájá lagaš beivviid

Riikarádji Norgga beale Njávdámis rahppojuvvo johtolahkii jáhkkimis lagaš beivviid.

Mátta-Várjjaga sátnejođiheaddji Lena Norum Bergeng muitalii odne gaskavahkko gieldda váldostivrra čoahkkimis, ahte rádjeeiseválddit galget vel ságastallat áššis duorastat iđđes. Maiddái Anára gielda lea ožžon dieđu rájá rahpamis.

Dán rádjái Norggas lea gal beassan Supmii Neidena duollu bokte, muhto máhccat dakko ii leat sáhttán, go rádji lea gitta. Dilli lea sakka hárdán sihke guovllu olbmuid, go maiddái Anára ja Mátta-Várjjaga gielddaid.

• Loga maid: Norgga beale njávdánlaš Stein Tore Sivertsen álggahii nammačoaggima oččodan dihte riikkarájá rabas

2.6. dii. 7.18 Geassemánus 70 proseantta Suoma rávesolbmuin boahkuhuvvon oktii

Suopma joksá EU asáhan álbmoga boahkuhanmeari álgogeasis, go 70 proseantta álbmogis lea boahkuhuvvon.

Geassemánu loahpa rádjái sullii 70 proseantta rávesolbmuin lea ožžon vuosttaš koronavirusboahkuhusa.

Boahkuhusa vuosttaš oassi ii reahkká joavkosuodjái, árvalit áššedovdit Suomas ja máilmmis. Danin dárbbašuvvo velá nuppi oasi boahkus, vai suojis šaddá nannosut.

Suomagillii áššis eanet dáppe.

1.6. dii. 9.19 Norgga dearvvašvuođadirektoráhta ii ovttasbargga Suomain Njávdáma testenbáikkis

Norgga dearvvašvuođadirektoráhta ii áiggo ovttasbargat Suomain koronatestemiin Njávdáma rájárasttildanbáikkis, čállá Sør-Varanger Avis.

Aviisa dieđuid mielde riekte- ja gearggusvuođaministeriija ferte vuos rahpat rájá johtolahkii.

Norgga dearvvasvuođalágádusa fágajođiheaddji Svein Lie dadjá, ahte nu guhká go rájirasttildanbáiki lea gitta Norgga bealde Neidenis, de dan bokte ii sáhte johttit.

– Riekteministeriija mearrida, ahte mat rájirasttildanbáikkit leat rabas ja mat fas leat gitta, dadjá Lie.

Anára gielda lei evttohan Mátta-Várjjaga gildii ovttasbarggu koronatestemis Suoma beale Njávdámis. Anár gielda rabai koronatestenbáikki Njávdámii 31.5.

1.6. dii. 7.36 Lappis eai leat šat čoahkkananráddjehusat

Buot čoahkkananráddjehusat nohket Lappi buohccedikšunbiire guovllus dalán. Áššis mearridii Lappi guovlohálddahusdoaimmahat ikte vuossárgga.

Guovlohálddahusdoaimmahat deattuha goittotge, ahte vaikko dat ii šat ráddje čoahkkaneami, maiddái vuođđodási guovlluid gusket ain lága mielde hygieniijadoaimmat. Dat doaimmat leat vejolašvuohta gieđaid bassamii, dorvogaskkat olbmuid gaskkas ja sajiid buhtisteapmi. Dasa lassin gielddat ja guovlluid koronakoordinerenjoavkkut sáhttet addit ávžžuhusaid iežaset guovlluide.

Guovlohálddahusdoaimmahagas muittuhit maiddái, ahte dávdadilli sáhtta álo hedjonit, vaikko dat leage mannan buoret guvlui vássán vahkuid áigge.

Leage dehálaš, ahte juohkehaš iežas oasil fuolaha das, ahte hygieniijaávžžuhusat ollašuvvet.

31.5. dii. 9.44 Ruoŧŧa rahpá rájáid

Ruoŧŧa lea ložžen mátkkoštanráddjehusaid. Ruŧŧii oažžu otná rájes mátkkoštit Suomas ja eará davviriikkain karantena ja negatiiva koronateastabohtosa haga. Eará EU-riikkain beassá Ruŧŧii negatiiva teastabohtosiin. Áššis dieđihii Ruoŧa sisáššiid ministtar Mikael Damberg bearjadaga.

Durtnosis leat goittotge fuolas das, mo rájá ráhpan boahtá váikkuhit. Norrbottena koronadilli lea dál Eurohpa vearrámus.

Durtnosa jođiheaddji doavttir Jukka Ronkainen árvala, ahte njoammumat bohtet Durtnosa guovllus lassánit ja Suopma soaitá vejolaččat gártat čavget fas ráddjehusaid, maid aiddo leat burgigoahtán. Loga áššis eanet suomagillii dáppe.

28.5. dii. 12.30 Anár gielda álggaha koronatestema maiddái Njávdáma rádjerasttildanbáikkis

Anár gielda álggaha guovlluhálddašandoaimmahat AVI eaktudan koronatestema maiddái Njávdáma rádjerasttildanbáikkis.

Seammás Anára ja Mátta-Várjjaga gielddat čielggadit ovttas, dohkkehago Norga suopmelaččaid čađahan testemiid sihke Norgii ja Supmii johtti olbmuide ja sáhttetgo ráji rahpat johtolahkii maiddái Norgii. Dál rádjejohtolat lea rabas dušše Norggas Supmii Njávdáma bokte. Anár gieldda vuođđudan testensadji Njávdáma rádjerasttildanbáikkis lea rabas 31.5 rájis vu-lá dii 10.00-18.00 Suoma áiggi goittotge 24.6. rádjái.

Anár gieldda nubbi testenbáiki lea Avvila dearvvašvuođaguovddážis.

28.5. dii. 6.22 Rádjestašuvnnaide bákkolaš dearvvašvuođadárkkistus

Lappi rádjestašuvnnaid bokte Supmii boahtti olbmuide mearriduvvo bákkolaš dearvvašvuođadárkkistus.

Dárkkistus ja vejolaš koronatesten álgá boahtte vahku maŋŋebárgga, 1.6., buot olbmuide, geat bohtet stuorra riskariikkain. Sihke Ruoŧŧa ja Norga leat dál dákkár riskariikkat.

Lappi guovlohálddahusdoaimmahaga mearrádus ii guoská gálvojohtolaga bargiid, mánáid, iige sin, geain lea varas negatiiva teastaboađus dahje duođastuš das, ahte lea buohccán árat koronadávdii.

Eaktodáhttolaš dearvvašvuođadárkkistusaide lea oassálastan dušše goalmmátoassi riikii boahtti olbmuin.

27.5. dii. 12.57 Norgii beassá otná rájes ng. fiskes guovlluin nu ahte ii dárbbaš karantena – eahpečielggas lea ain, makkár duođaštusat rádjerasttildeapmái dárbbašuvvojit

Norgga Suoma ambassada mielde Norgii sáhttá johtit friija nu ahte ii dárbbaš báhcit karantenai dakkár guovlluin, gos leat unnán koronanjoammumat. Suomas dákkár guovllut leat stuorámus oassi buohccedikšunbiiriin.

Eahpečielggas lea ain, ahte mo mátkkošteaddji sáhttá duođaštit ahte boahtá dakkár nu gohčoduvvon fiskes guovllus. Ambassadas eai máhte vel dárkilit dadjat, makkár duođaštusaid rájá rasttildeapmái vejolaččat dárbbaša. Dárkilut dieđut das leat boahtimin farggabáliid, muitalit ambassadas.

Norga lea meroštallan Suoma buohccedikšunbiiriid fiskes ja rukses guovlluide dan mielde makkár koronanjoammun dilli dain leat. Rádji lea 25 njoammumis 100 000 ássi ala guovtti vahku áiggis.

Fiskes guovllut leat Lappi buohccedikšunbiire lassin maid Kainuu, Gaska-Pohjanmaa, Davvi-Pohjanmaa, Mátta-Pohjanmaa, Mátta-Savo, Nuorta-Savo, Davvi-Gárjil, Mátta-Gárjil, Vaasa sihke Ålándda buohccedikšunbiiret.

Eará buohccedikšunbiiriin Norgii boahtti mátkkošteaddjiide karantenagáibádus lea ain fámus.

26.5. dii. 12.19 Ohcejoga jođiheaddjidoavttir ávžžuha Norggas boahtti olbmuid koronatestii

Rájirasttildanbáikkiin Gáregasnjárggas ja Njuorggámis lea dál vejolaš váldit koronateasta aivve rájá alde. Vuossárgga rájes rádjegielddaid ássit leat beassán Norggas Supmii ja rasttildettiin rájá olbmuid ávžžuhit eaktodáhtolaš testii.

Ohcejoga jođiheaddjidoavttir Heidi Eriksen muitala, ahte Norgga beale olbmot leat goit uhccán fitnan teasttain.

– Davvi-Norgga vearránan koronadili geažil ávžžuhivččen olbmuid goit sihkkarvuođa dihte fitnat koronateasttas rájirasttildanbáikkis, dadjá Eriksen.

Eanodaga testenbáikkis Heahtás Suoma rájá rahpaseapmi norgalaččaide lea oidnon dán vahku álggus huššan ja guhkes testenráidun.

– Vuossárgga ledje olu olbmot jođus, go Norggashan lei dalle bassi. Eat lean máhttán nu bures dasa ráhkkanit, muhto buriin mielain olbmot leat leamašan, muitala koronatestejeaddji Anu Niemi.

25.5. dii. 14.15 Norga doallá ain Njávdáma ja Ohcejoga ráddjerasttildanbáikkiid gitta

Mátkkošteaddjit eai beasa Suomas Norgii Njávdáma ja Ohcejoga rádjerasttildanbáikkiid bokte, muhto gálvo- ja fievrojohtolat beassá johtit. Norgga Storskoga duollostášuvnnas muitalit, ahte vel ii leat dieđus goas Njávdáma ja Ohcejoga duollut rahppojuvvojit mátkkoštanjohtolahkii.

Sivvan rasttildanbáikkiid giddemii lea dat, ahte Ohcejogas ja Njávdámis ii leat koronatestenvejolašvuohta. Kivilompolo, Njuorggáma ja Gáregasnjárgga duolluid bokte mátkkoštanjohtolat gal doaibmá.

Mika Gross Lappi rádjegozahusas duođašta, ahte Njávdán ja Ohcejohka eai leat rabas matkkoštanjohtolahkii, ja ahte ášši lea Norgga stáhta mearrádusain gitta. Suomas čuvvot stáhtaráđi mearrádusaid.

Ášši dárkkálmahtton 26.5. dii. 10.41.

25.5. dii. 14.10 Ohcejogas boahku fállet 30-jahkásaččaide, Anáris 45-jahkásaččaide

Ohcejoga gielddas boahkuhišgohtet jo 30-jahkásaččaid. Ohcejogas boahkku fállet dál jagis 1991 dahje dan ovdal riegádan olbmuide. Anáris boahkku fállet badjel 45-jahkásaččaide nappo jagis 1976 dahje dan ovdal riegádan olbmuide. Eanodagas boahkohus ožžot badjel 50-jahkásaččat ja Soađegilis badjel 60-jahkásaččat.

Daid lassin buot sámeguovllu gielddain fállet koronaboahkuhusa badjel 16-jahkásaččaide, geat gullet 1 dahje 2 riskajovkui.

25.5. dii. 7.30 Maid Davvi-Ruoŧas vearrás koronadilli

Davvi-Ruoŧa koronadilli lea ain oalle vearrái. Mannan vahkus ovdanbohte badjel duhát njoammuma. Maŋimuš čieža vahku áigge njoammumiid mearri leamašan sullii 900 vahkus.

Korona lea beassan fártii erenomážit Gironis, gos ledje 233 njoammundáhpáhusa. Rádjeguovlluin Durdnosjohkaleagis leamašan 26 njoammuma. Seamma áiggis, dasto mannan vahkus Lappis ledje dušše 7 njoammuma.

Mediadieđuid mielde maid Davvi-Norgga koronadilli erenomážit Hammerfeasta guovllus lea ain vearráneamin. Doppe jáhkkimis leat ovdanboahtan juoba 200 njoammuma ja juohke logát Hammerfeasta olmmoš lea karantenas.

24.5. dii. 18.00 Lappis vejolaš ordnet badjel 50 olbmo dilálašvuođaid geassemánus

Lappi buohccedikšunbires sáhttá ordnet ain 50 olbmo priváhttadilálašvuođaid maŋŋebargga 1. geassemánu rájes.

Lappi guovlohálddahus Avi lea addán otne vuossárgga mearrádusa doallat ain 50 olbmo dilálašvuođaid olles Lappi buohcedikšunbiires. Lappi Avi dieđiha, ahte dilálašvuođain sáhttet leat eanetge go 50 olbmo, jos olbmuid sáhttá sirret 50 olbmo joavkkuide. Dáid sirrejuvvon joavkkuin galget leat iežaset johtingeainnut, dáhpáhusbargit ja bálvalusat.

Dát mearrádus lea fámus 1.6.–30.6.2021.

24.5. dii. 16.00 Anára gielda boahkuhišgoahtá 45-jahkásaččaid

Anára gielda boahkuhišgoahtá dál jo 45-jahkásaččaid. Gielda dieđiha, ahte boahkuhusa ožžot buot gieldalaččat, geat leat riegádan ovdal jagi 1976 ja buohkat geat leat orron báikegottis badjel vihtta mánotbaji. Boahkuhanáiggi sáhttá várret sihke telefovnnain dahje Anára gieldda neahttasiidduid bokte.

Terveystalo Inari álggaha boahtte vahkkus boahkuhemiid dáidda bargodearvvašvuođa áššehasaide, geaid bargoaddi lea soahpan boahkuheamis.

24.5. dii. 8.40 Hammerfeasta koronakriisa vearrána

Koronaepidemiija dilli lea oalle vearrái Hammerfeasta gávpogis Finnmárkkus. Vahkuloahpas NRK Sámi ja Ávvir-áviissaid dieđuid mielde doppe leat registerejuvvon sullii birrasii čuohte njoammuma ja Álaheajos sullii moaddelogi

Dilli lea goit duođalaččat vel olu vearrát, ja otná iđiđa dieđuid mielde Hammerfeastas leat 154 njoammuma ja olles njoammunráiddus 169 njoammuma. Oassi seamma bálgái gulli njoammumiin lea gávnnahuvvon Álaheajos. Oarje-Finnmárkku ráđđidál ávžžuhage, ahte olbmot eai dál mátkkoštivčče oba gielddaid gaskage.

Jearaladagas lea virusvarianta, mii lea vuolgán johtui Stuorra-Britannias eaige buot njoammumiid gálduid vel dieđe. Eiseválddit ávžžuhit geavahit máskkaid dáid guovlluin áŋgge almmolaš johtolagas.

Hammerfeasta kriisas fuolageahttá Norga pláne rahpat Suoma ja Norgga gaskasaš rájá duorasdaga. Suomas Norgii sáhttet karantena hága mátkošttit olbmot, geat bohtet nu gohčoduvvon fiskkes guovlluin ja Lappi gullá daidda go njoammunmearit leat geahppánan.

21.5. dii. 14.07 Maiddái Norga rahpá rájáid fargga

Norgga ráđđehus lea otne bearjadaga mearridan, ahte nu gohčoduvvon fiskes guovlun meroštallojuvvon guovlluin besset fargga mátkkoštit Norgii. Ovdamearkan Lappi eanangoddi lohkkojuvvo dákkár fiskes guovlun. Rádji lea 25 njoammuma 100 000 ássi ala.

Norgga riekteministeriija lea nannen, ahte ođđa njuolggadusat bohtet fápmui 27.5.2021.

Mearrádus oaivvilda, ahte Norgii mannit eai šat šatta karantenai nugo dán rádjai. Riikkaid gaskasaš johtolat ráddjejuvvui ođđajagimánu loahpas koronaepidemiija dihte.

Divvojuvvon 21.5.2021 dii 18:20: Divvojuvvon, ahte Norgii beassá johtit fiskes guovlluin duorastaga rájes. Muitaleimmet árat Suoma Norgga ambassáda addin dieđuid vuođul boastut, ahte beaivemearis ii leat vel dárkilis diehtu.

20.5. dii. 14.08 Rádjeservošii gullevaš olbmot besset fas rasttildit Suoma ja Norgga rájá 24.5. rájes

Suoma stáhtáráđi duorastaga mearrádusa mielde rádjeservošii gullevaš olbmot besset fas boahtte vuossárgga rájes rasttildit Suoma ja Norgga rájá. Dát mearkkaša ahte sii eai dárbbaš báhcit karantenai go máhccet Norgii.

Rádjeservošiid johtin riikkarájáid rastá gildojuvvui ođđajagimánu loahpas.

Eará sajiin sisrájáid gohcima jotket gitta geassemánu 15. beaivái.

19.5. dii. 16.20 Ohcejoga gielda lea almmustahttán rávvagiid studeantadoaluid várás

Ohcejoga gielda lea Lappi guovlohálddahusdoaimmahaga čoahkkananráddjehusa dihte mearridan, ahte sámelogahaga studeantadoaluide geassemánu 5. beaivve ožžot báikki alde oasálastit dušše studeanttat, sámelogahaga bargit sihke juohke studeanttas dušše 5 lagamuš olbmo.

Dilálašvuođas galgá geavahit máskkaid iige duođaštusaid juohkimis oaččo buorástahttit gieđas. Báikki ala ii oaččo boahtit jus olmmoš lea ovddit guovtti vahku áigge mátkkoštan koronavirusa leavvan- dahje njoammunmuttus leahkki guovlluin Suomas dahje olgoriikkas, dahje jus leamaš dahkamušas dakkár olbmuiguin.

Jus studeanttat leat guovtte vahku ovdal doaluid fitnan ovdamearkan beassaniskosiin koronavirusa leavvan- dahje njoammunmuttus leahkki guovlluin, gielda sávvá studeanttaid fitnat koronavirusteasttas eanemustá 3 jándor ovdal studeantadoaluid. Koronavirustestii beassá go riŋge Ohcejoga dearvvašvuođaguovddážii. Studeantadoaluide skuvlaguovddážii báikki ala ii oaččo boahtit vaikko livččejit dušše geahppa dávdamearkkat.

Lappi guovlohálddahusdoaimmahat lea addán 50 olbmo čoahkkananráddjehusa miessemánu loahpa rádjai. Gielda dieđiha neahttasiiddustis, ahte epidemiijadili mielde soitet plánat goit rievdat ja dain dieđihit dasto sierra.

18.5. dii. 15.08 Anára gielddas boahkuhusa fállet dál 50 jahkásaččaide

Anára gielddas dieđihit, ahte boahkuhanvuorus leat buot jagis 1971 dahje dan ovdal riegádan anárlaččat. Boahkuhusa fállet maid sidjiide geat orrot Anáris badjel vihtta mánu.

Dan lassin boahkuhusa fállet buohkaide badjel 16-jahkásaččaide geat gullet riskajoavkkuide 1. dahje 2.

14.5. dii. 15.35 Norgga ráđđehus hálida joatkit rádjedárkkistemiid skábmamánu rádjái

Norgga ráđđehus ráhkkana joatkit rádjegohcima skábmamánu logát beaivve rádjái. Norga várre ruđa dan várás, ahte dat sáhttá joatkit ain ovdamearkka dihte karanteanahoteallaid geavaheami. Norgii olgoriikkain boahtti olbmot soitetge maid boahttevuođas gártat karanteanahoteallii guovtti vahkkui.

14.5. dii. 11.52 Restoráŋŋaid ráddjehusat geahpeduvvojedje

Heláduorastaga restoráŋŋaid ráddjehusat geahpeduvvojedje miehtá Suoma. Lappi buohccidikšunbires restoráŋŋat ožžot leat rabas dii. 1 rádjái ja juhkamušaid vuovdin nohká gaskija.

Olles riikkas kunddarmeriid ráddjejit duorastaga rájes nie, ahte biebmorestoráŋŋain ožžot leat golmma njealját oassi dan máksima kunddarmearis ja bealli dakkár restoráŋŋain mat vuvdet juhkamuša.

10.5. dii. 10.5. Anáris boahkuhusa fállet dál 55-jahkásaččaide

Anára gieldda koronaboahkuheamit ovdánit. Gielda dieđiha, ahte buot badjel 55-jahkásaččat ožžot dál riŋgedit várret alcces boahkuhan áiggi. Maiddái buot dakkár olgobáikegoddelaš olbmot, geat leat orron dahje orrot gielddas badjel vihtta mánu hávil, besset boahkuhussii.

7.5. dii. 12.40 AVI árvvoštallá ásahit bákkolaš dearvvašvuođadárkkistemiid Durdnosa rádjái

Lappi AVI árvvoštallá addit njoammundávdalága16 paragráfa vuođul mearrádusa, mainna buot riikii boahtti olbmot galggašedje oassálastit bákkolaš dearvvašvuođadárkkisteapmái Durdnosa rájis. Dál ordnejit gullamiid áššis.

Lappis lea njukčamánu álggu rájes leamaš fámus njoammundávdalága 15 paragráfa mearrádus, man mielde Lappi rájirásttildanbáikkiin ferte ordnet dearvvašvuođadárkkistemiid buot ráji rásttildeaddjiide. Riikii boahtán olbmot leat dán rádjái oassálastán bures dárkkistemiide, muhto maŋimuš áiggiid Durdnosa rájirásttildanbáikkis muhtin olbmot eai leat oassálastán dearvvašvuođadárkkisteapmái. Davvi-Ruoŧa koronadilli lea ollu heajut go Suoma koronadilli, ja Durdnosa bokte johtet beaivválaččat olu olbmot Supmii. Dat lea AVI mielas riska Suoma koronadillái.

Mearrádus ii guoskka ámmátvuoddjiid, jagi 2008 maŋŋá riegádan mánáid iige sin, geain lea duođaštus mainna sáhttá čájehit ahte ii dárbbaš mannat dárkkisteapmái. Mearrádus guoská maiddái Supmii boahtti Suoma stáhtaborgáriid. Barggu dihte johttiin gáibidit vahkkosaš koronateastta bohtosa.

Vejolaš mearrádus boađášii fápmui vahku 19 áigge.

6.5. dii. 13.20 Soađegilis lea sáhttán gártat njoammunáitaga vuollái gávppis ja R-kioskkas

Soađegilis almmuhedje gaskavahku ovtta ođđa koronanjoammumis. Sullii 30 olbmo leat biddjon erremii.

Njoammunáitaga vuollái lea sáhttán gártat vuossárgga miessemánu 3. beaivve Soađegili R-kioskkas beaivet, ja disdaga miessemánu 4. beaivve Soađegili Beaiveguovddážis dii 11.00–11.45 ja K-Market Sodankyläs dii 12.00–13.00.

4.5. dii. 10.14 Ohcejogas boahkuhišgohtet jo 40-jahkásaččaid

Ohcejogas boahkuhišgohtet jo 40-jahkásaš gieldalaččaid. Gielda dieđiha, ahte buot jagis 1981 dahje dan ovdal riegádan olbmot ožžot dál almmuhit iežaset koronavirusboahkoheapmái. Maiddái badjel 16-jahkásaš riskajoavkkuide gullevaš olbmuide fállojuvvo boahkuhus.

30.4. dii. 15.30 Lappis badjedásseoahppiid máskaávžžuhus nohká

Koronadilli lea bisson oalle ráfálažžan Lappi guovllus.

Lappi koronakordinerenbargojoavku lea mearridan otne bearjadaga, ahte badjedásiin oahppiid máskkaávžžuhus nohká.

Nuppi dási oahppolágádusaid buohta máskaávžžuhusa nohkamis mearridit gielddaid njoammundávdaeiseválddit. Kordinerenbargojoavku ávžžuha goit ain skuvllaid ja árrabajásgeassinbálvalusaid bargiid geavahit máskka, jos dorvogaskkaid ii leat vejolaš doallat.

30.4. dii. 13.30 Lappis badjel 50 olbmo dilálašvuođat vejolaččat miessemánus

Lappi buohccedikšunbires sáhttá ordnet 50 olbmo priváhttadilálašvuođaid vuossárgga 3. miessemánu rájes.

Lappi guovlohálddahus Avi lea addán otne bearjadaga mearrádusa badjel 50 olbmo dilálašvuođain. Lappi Avi dieđiha, ahte dilálašvuođain sáhttet leat eanetge go 50 olbmo, jos olbmuid sáhttá sirret 50 olbmo joavkkuide. Dáid sirrejuvvon joavkkuin galget leat iežaset johtingeainnut, dáhpáhusbargit ja bálvalusat.

Dát mearrádus lea fámus 3.5.–31.5.2021.

29.4. dii. 14.12 Soađegili jeagárprikáhtas njeallje ođđa njoammuma

Soađegili jeagárprikáhttas leat duorastaga gávnnahan njeallje ođđa koronanjoammuma. Mannan vahkkus álgán njoammunbálgás leat gávnnahan oktiibuot 15 njoammuma.

Buot njoammumat leat gávnnahuvvon soalddáhiin. Erremis leat dál oktiibuot 39 soalddáha, geat leat gártan njoammunáitaga vuollái.

Lappi buohccidikšunbire infekšuvdnadoavttir Markku Broas dadjá Lapin Kansai, ahte son ii leat fuolas jeagárprikáhta njoammumiin, dasgo vuosttaš njoammun lea boahtán olgobáikegottis iige korona leat njommon jeagárprikáhta olggobeallái.

28.4. dii. 9.54 Soađegili jeagárprikáhtas ođđa njoammumat, njoammunáitaga vuolde 47 olbmo

Soađegili jeagárprikáhtas lea duođastuvvon golbma ođđa koronavirusnjoammuma PCR-teasttain ja jođánis teasttain gávcci njoammuma, Jeagárprikáhtta dieđiha. Jođánis teastta bohtosiid galgá sihkkarastit PCR-teasttain. Daid teasttaid bohtosiid leat vuordimin aiddo dál.

Sihkkarastojuvvon koronavirusnjoammuma ožžon olbmot ja jođánis teasttain bohtosa ožžon soalddáhat leat asáhuvvon erremii.

Njoammunáitaga vuollái leat gártán dál oktiibuot 47 olbmo, geain soalddáhat leat 42 ja jeagárprikáhta bargit viđas.

Njoammunáitagii gártán soalddáhat leat karanteanalágán dilis 2-3 olbmo lanjain ja sis leat iežaset bassanlanjat ja sierra ordnejuvvon boradeamit. Bargiin njealjis lea karanteanas ja okta lea karanteanalágán dilis ruovttus.

Vuosttaš koronanjoammun jeagárprikáhtas gávnnahuvvui mannan bearjadaga, go luomus boahtán soalddát attii positiiva koronateastabohtosa.

28.4. dii. 6.30 Spiehkastatdilli nogai, Liisanantti muittuha ain várrugasvuođas

Stáhtaráđđi almmuhii ikte maŋŋebárgga, ahte spiehkastatdilli Suomas lea nohkan. Koronavirusdilli ii šat leat dan dásis, ahte dat gáibidivčče gearggusvuođalága. Dál dilis fuolahit eiseválddiid mearrádusaiguin.

Anára gieldda jođiheaddji doavttir Outi Liisanantti muittuha olbmuid ain várrugasvuođas koronavirusa ektui. Liisanantti muitala dieđáhusastis Anára gieldda neahttasiidduin, ahte ávžžuhus máskkaid geavaheamis ja dorvogaskkain joatkašuvva ain. Liisanantti fuomášahttá, ahte su mielas máskkat eai šat geavahuvvo nu olu gávppiin, vaikko ain galggašii.

Anáris gávnnahedje ikte guokte njoammuma ja karanteanas leat Soađegili jeagárprikáhta njoammumiid dihte moattis.

Ođđa koronavirusnjoammumiid mearri lea maŋimuš guovtti vahku áigge njiedjan čielgasit ja dat oaivvilda dan, ahte epidemiijadilli lea Suomas ráfáiduvvamin.

27.4. dii. 9.15 Njoammunáitta mannan gaskavahku S-Marketis ja Lauran grillis Avvilis

Avvilis lea leamaš vejolaš gártát koronavirusa njoammunáitaga vuollái S-Market Vaskoolis gaskavahku 21.4. sullii diibmu 9.30 ja diibmu 11.30. Dasa lassin maiddái seamma beaivve Lauran grillis diibmu 11.30-12.30.

Dáin áiggiin earenoamážit Lauran grillis fitnan olbmuid ávžžuhit ohcalit unnimusge váttuigin koronavirustestii Avvila dearvvašvuođaguovddážii.

Áššis dieđiha Anára gielda neahttasiidduinis.

27.4. dii. 9.06 Soađegili jeagárprikáhtas gávcci ođđa koronavirusnjoammuma

Soađegilis, jeagárprikáhtas leat ikte gávnnahan gávcci ođđa koronavirusnjoammuma.

Jeagárprikáhtas duođastuvvui okta koronavirusnjoammun mannan bearjadaga. Dál doppe leat nappo oktiibuot ovcci njoammuma. Buot njoammumat leat duođastuvvon soalddáhiin.

23.4. dii. 7.29 Sis- ja olgorádjeráddjehusat joatkašuvvet Suomas

Suoma stáhtaráđđi mearridii ikte duorastaga, ahte riikii boahtin ráddjehusaid jotkket vel miessemánu 25. beaivve rádjai. Stáhtaráđđi muittuha dieđáhusastis, ahte koronapandemiija joatkašuvvá ain eaige leat eará molssaeavttut dálá ráddjehusaid sadjái. Danin ja maiddái eastadandihte virusvariánttaid leavvama sisrádjegohcima ja olgorádjejohtolaga ráddjema jotkket.

Njukčamánu loahpas dahkkon mearrádusaid sisdoallu ii rievdda.

Sis- ja olgorádjeráddjehusaid lassin jotkket maiddái dihto rájárastildanbáikkiid rabasáiggiid ráddjema Lappi oarjerájá ja Suoma nuortarájá alde.

23.4. dii. 7.25 Boahkuhusat ovdánit Anáris ja Ohcejogas

Anára gielddas boahkuhišgohtet dál buot jagis -56 ja dan ovdal riegadan olbmuid. Dasa lassin boahkuhusa ožžot buot badjel 16-jahkásaš anárlaččat, geat gullet vuosttas dahje nuppi riskajovkui.

Lassedieđuid Anára gieldda boahkuhusain gávnnat dáppe.

Ohcejoga gielddas fas boahkuhišgohtet buot badjel 50-jahkásaččaid. Lassedieđuid gávnnat Ohcejoga gieldda neahttasiiddus.

21.4. dii. 12.02 Ráđđehus dohkkehii koronaráddjehusaid burginplána

Ráđđehus lea ikte dohkkehan koronaráddjehusaid burginplána. Dan mielde koronadili vuođđomuttus leahkki guovlluin sáhttet lágidišgoahtet farggabáliid 50 olbmo dilálašvuođaid olgun ja siste.

Sisrádjejohtolagas burgigohtet ráddjehusaid miessemánu rájes. Vuosttamužžan rahpet rádjeservošiid johtolaga.

Plána mielde ráđđehus ii šat gidde skuvllaid, muhto skuvllain fertejit ain čuovvut dorvvolašvuođadoaimmaid.

Cuoŋo-miessemánus rahpasit nuoraid olgovaláštallandoaimmat ja geassemánus fas nuoraid valáštallangilvvut ja geasseleairadoaibma. Suoidnemánu rájes gilvvuid sáhttá lágidit maid siste.

Rávesolbmuid astoáiggedoaimmat joatkašuvvet ain olgun suoidnemánu rádjái ja áramustá borgemánus sáhttá lágidit astoáiggedoaimmaid siste rávesolbmuide.

Ráđđehusa mielde dálá dieđu ja mannan geasi vásáhusaid vuođul lea vejolaš, ahte erenomážit loahppageasis sáhtášii lágidit stuorát dáhpáhusaid dego festiválaid.

Loga eambbo suomagillii: Hallitus: loppu koulusuluille, aikuiset sisäharrastuksiin aikaisintaan elokuussa, 50 hengen yleisötilaisuudet sallitaan pian perustason alueilla

20.4. dii. 9.43 Soađegilis ávžžuhit vástidit telefonii beassandihte boahkuheapmái

Soađegili gielda ávžžuha dál koronaboahkuheapmái iežaset almmuhan olbmuid vástidit telefonii, go vieris nummir riŋge. Gieldda dearvvašvuođasuorggi bargit juhket telefon bokte áiggiid boahkuheapmái. Gieldda dieđáhusa mielde sin riŋgemiidda ii leat álo vástiduvvon.

Soađegilis leat boahkuheamen 70-jahkásaččaid ja eará riskajoavkkuide 1 ja 2 gullevaččaid.

19.4. dii. 15.51 Rádjejohtolat lassánii Norgga rájá alde

Rádjejohtolat lassánii mannan vahkkus Suoma ja Norgga rájá alde. Sivvan lea go Norgga eiseválddit ložžejedje ráddjehusaid cuoŋománu 12. beaivve rájes nu, ahte Lappi buohccidikšunbires boahtti olbmot eai gártta šat karantenii go mannet Norgii.

Eanemus johtolat lassánii Gilbbesjávrri rájirasttildanbáikkis, go doppe rájirasttildeaddjit ledje 70 proseantta eanet go ovddit vahkkus.

Rájirasttildanbáikkit Suoma ja Norgga gaskasaš rájás leat rabas Gilbbesjávrris, Gáregasnjárggas, Geađgeluobbalis, Njuorggámis, Njávdámis ja Ohcejogas dii 9.00 – 21.00.

19.4. dii. 12.21 Koronanjoammumiid mearri njiedjan

Koronanjoammumiid mearri lea njiedjan dássedit maŋemuš vahkkuid áigge. Dearvvašvuođa- ja buresveadjinlágádusa THL dieđuid mielde odne vuossárgga Suomas leat gávnnahan 156 ođđa njoammuma. Ná vuollegaš koronalogut riikkas leat leamašan maŋemuš háve ođđajagimánu álggus.

19.4. dii. 7.26 Lappis guokte ođđa njoammuma

Lappi buohccedikšunbires leat gávnnahan guokte ođđa koronanjoammuma vahkkoloahpa áigge.

Nubbi njoammumiin gávnnahuvvui Kolaris báikkálaš olbmos. Vejolaš njoammunáitaga vuollái gártan olbmuid leat čielggadeamin.

Nubbi njoammumiin fas lei Gihttelis. Dán dáhpáhusa njoammunbálggis ii leat vel čielggas.

Mannán vahkus bearjadat rádjai Lappis ledje gávnnahan oktiibuot vihtta njoammuma. Oppalaččat Lappis lea ráfálaš dilli korona ektui.

14.4. dii. 14.51 Koronaáigi ii leat váikkuhan nu vearrádit Lappi turismii go balle

Turismasuorgi lea ceavcán vássán koronajagi buorebut go maid ledje vuordán. Ovdamearkan boahtte dálvái leamašan juo dál stuorra jearalmas ja erenomážit juovllaide.

Visit Rovaniemi- fitnodaga dieđuid mielde vuordimis sáhttet leat juoba ođđa olahuslogut turismmas. Doaibmasuorgi goit vuordá eiseválddiin dárkilut dieđuid mo Suoma korona exit- plánain áigot ovdánit.

Lappi turismasuorggis eai leamaš dán rádjái stuorra koŋkáneamit. Dušše ovttaskas turismafitnodagat leat koŋkánan. Fitnodatdoalliid ceavzima čilge stáhta doarjaga lassin ruhtadeaddjiid miehtemielalašvuohta.

Báŋkkut ja loanaid dáhkáhusa mieđiheaddji Finnvera leat mieđihan boahtte dálvái joatkašuvvi oanidanfriijaid. Lappi fitnodatdoalliide leat Finnvera dáhkidemiid lassin mieđihan badjel 30 miljon euro ovddas ođđa loana koronaáiggis ceavzimii.

14.4. dii. 14.36 Turisttat eai buktánge koronavirusnjoammumiid beassážiid áigge

Beassážiid áigge turisttat Lappis eai leat dagahan koronavirusa leavvama, vaikko beassážiid áigge Lappis leat árvalusaid miel leamašan logit duháhat olbmot. Lappi buohccedikšunbiires leat beassážiid ovdal ja maŋŋá gávnnahan dušše oktiibuot 15 koronavirusnjoammuma.

Infekšuvdnabajitdoavttir Markku Broas dadjá, ahte beassážat manne epidemiija dáfus vel buorebut go čuoiganluomut. Broasa mielde turisttat ja báikkálaččat sihke fitnodagat leat doaibman vásttolaččat. Olbmot leat čuvvon rávvagiid ja fitnan válddiheamen teasttaid, Broas lasiha.

13.4. dii. 14.09 Guokte ođđa koronanjoammuma Lappis

Koronavirusdilli lea ain ráfálaš Lappis. Lappis leat gávnnahan otne guokte ođđa koronavirusnjoammuma. Okta lea Soađegilis karantenas leahkki olbmos ja nubbi Gihttela Levis olgobáikegoddelaččas.

Olles Suomas leat otne gávnnahan 286 ođđa koronanjoammuma.

Davvi-Ruoŧas fas koronadilli ii ložže, doppe ledje mannan vahkus badjel duhát koronavirusnjoammuma.

12.4. dii. 7.30 Anáris ođđa njoammun

Anáris lea vahkuloahpa áigge ovdanboahtán okta ođđa koronavirusnjoammun ja infekšuvdnadoavttir Markku Broas Lappi guovddášbuohcceviesus jáhkká, ahte njoammungáldu lea olgoriikkain.

Nubbi njoammun lea gávnnahuvvon Kolaris ruoŧŧelaš olbmos.

Máttaafrihkálaš koronavariantta dihte Roavvenjárggas leat vahkuloahpas testejuvvon sullii 50 olbmo ja testemat jotkojuvvojit otne. Njoammun leai ovtta restoráŋŋabargis ja testen guoskkaha su bargobirrasa.

12.4. dii. 7.30 Norga ložžegoahtá ráddjemiid

Norga áigu ložžet mátkkoštanráddjemiid daid oasil, geat bohtet riikii Lappi dahje Länsi-Pohja buohccedikšunbiriid guovlluin.

Dálá dieđu mielde ložžen goit guoská dušše Norgga albmotlahttuid dahje geat ásset bissovaččat riikkas. Otná rájis Norga meroštallá dáid buohccedikšunbiriid fiskes guovlun, ja dat oaivvilda, ahte rájá alde ii šat mearriduvvo logi beaivvi karantenai.

Ložžen guoská maid Mátta- ja Nuortabađaeatnama guovlluid. Muđui measta olles Eurohpa gullá rukses guovlun.

9.4. dii. 11.00 Ná Suopma burgigoahtá ráddjehusaid, jus koronadilli buorrána dálážis

Suoma ráđđehus doalai odne bearjadaga dieđihandilálašvuođa koronaráddjehusaid burgimis.

Ráddjehusaid bastet burgit, jus koronanjoammumiid mearri unnu Suomas.

Stáhtaráđi kansliija almmustahtii vuđolas listtá das, mo áigot burgit ráddjehusdoaimmaid boahttevuođas. Plána sisdoallu oanehaččat lea dákkár:

Cuoŋománnu

• Gearggušvuođalága doaibmaváldi nohká
• Skuvllat máhccet lagašoahpahussii (vuođđooahpahus ja nubbi dássi)
• Restoráŋŋat rahpasit, muhto áigetávváliid ja kunddarmeriid ráddjejit ain

Vuorrásot olbmot leat ožžon vuosttaš boahkuid.

Miessemánnu

• Epidemiija jođánis ovdáneami uhki dihte ásahuvvon lasseráddjehusat váldojuvvojit eret, máhccat ruovttoluotta guovllolaš doaimmaide
• Mánáid ja nuoraid astoáiggedoaimmat olgun álget
• Muhtin almmolaš ja priváhtta sajit rahpojuvvojit, degomat girjerájut ja museat
• Bargomátkejohtolat EU-guovllus lea fas dohkkálaš

Riskajoavkkut leat miessemánus ožžon vuosttaš boahkuid.

Geassemánnu

• Čoahkkánanráddjehusat ložžejuvvojit
• Restoráŋŋaid kunddarbáiki- ja ráhpanáigetávválat geahpeduvvojit
• Rávesolbmuid astoáiggedoaimmat olgun álget
• Álmmolaš dilálašvuođaid sáhttá álgit doallat, muhto dain leat ráddjehusat ain oassálastiid meari oasil
• Sisrádjegohcin nohká

Bargoahkásaš olbmuin vehá vuollel bealli lea ožžon vuosttaš oasi boahkuid.

Suoidnemánnu

• Čoahkkánanráddjehusat ložžejuvvojit ja váldojuvvojit eret
• Almmolaš dilálašvuođaid oassálastiráddjehusat ložžejuvvojit ja váldojuvvojit eret

Bargoahkásaš olbmot leat ožžon vuosttaš boahkuid ja ahkeolbmot ja riskajovkui gullevaš olbmot leat ožžon nuppi oasi boahkuin (suoidne-borgemánnu).

Borgemánnu

• Eurohpa uniovnna olggobeale riikkaid bargomátkejohtolat soaitá rahppojuvvot

Bargoahkásaš olbmot leat ožžon vuosttaš boahkuid ja ahkeolbmot ja riskajovkui gullevaš olbmot leat ožžon nuppi oasi boahkuin (suoidne-borgemánnu).

9.4. dii. 7.36 Ráđđehus burgimin koronaráddjehusaid

Ráđđehus dieđiha otne iđđes koronaráddjehusaid burgimis.

Ráđđehus lea válmmaštallan plána ráddjehusaid burgimis dán vahku. Ráddjehusaid burgin gáibida dávdadili buorráneami dálážis.

Njuolggosáddaga dieđihandilálašvuođas sáhttá geahččat Yle Areenas. Dilálašvuohta álgá dii 9.30.

9.4. dii. 7.36 Gihttelis besset rahpat fas restoráŋŋaid

Gihttela restoráŋŋat ožžot fas rahpat uvssaidis jo otne. Suoma stáhtaráđđi mearridii áššis ikte duorastaga.

Lappi buohccedikšunbire koronakoordinerenjoavku evttohii maŋŋebárgga stáhtaráđđái Gihttela restoráŋŋaid giddenmearrádusa burgima. Koordinerenjoavkku mielde gidden ii lean šat vealttameahttun koronadili ektui, iige dat lean báikkálaš fitnodatdolliide govttolaš.

Gihttel lea leamašan áidna gielda Lappis, gos restoráŋŋat ledje gitta badjel mánotbaji. Gihttelis guhkkit restoráŋŋaid giddema ákkastalle dainna, go doppe lei vearrát koronavirusdilli go eará sajiin Lappis.

8.4. dii. 12.48 Lappi buohccidikšunbire oažžume 20 000 boahku dán mánus

Lappii leat vuordimin dál eambo koronaboahkuid. Ovdamearkka dihte Lappi buohccedikšunbiire lea oažžumin badjelaš 20 000 boahku dán mánu áigge. Lappii leat boahtime sihke Biontech–Pfizer, Moderna ja Astra Zeneca boahkut.

Buot badjel 70-jahkásaččat Lappis galggašedje leat boahkuhuvvon dán mánu loahpa rádjai.

THL dieđuid mielde Lappis leat dassážii boahkuhan badjelaš 33 000 olbmo.

7.4. dii. 15.35 Lappis eai leat gávnnahan ođđa njoammumiid

Lappis eai leat gávnnahan ođđa koronanjoammumiid gaskavahkko. Lappi buohccidikšunbires leatge sirdásan epideamiija vuođđodássái. Riikkadási koronloguid ektui Lappi buohccidikšunbires leat nubbin unnimus njoammumat ássiid ektui.

Ráfon koronadilli oaivvilda dan, ahte Lappis sáhttet fas lágidišgoahtit joavkodoaimmaid, buot skuvllat leat lagašoahpahusas ja priváhtadoaluide ožžot čoahkkanit eanemustá 20 olbmo.

Sihke Anár, Roavenjárga ja Gihttel leat almmuhan, ahte dohkkehit Lappi buohccedikšunbiire koronakoordinerenjoavkku ođđa ávžžuhusaid ložžejuvvon ráddjehusain.

6.4. dii. 17.20 Lappi máhccá vuođđodássái koronadilis

Lappi buohccedikšunbiires máhccet koronavirusepidemiija vuođđodássái. Buohccedikšunbiire koronakoordinerenjoavku lea čoahkkimastán maŋŋebárgga 6.4. ja oaivvilda, ahte koronavirusdilli lea Lappi guovllus ráfon. Guovtti maŋimuš vahku áigge Lappis leat gávnnahan logenár ovttaskas njoammundáhpáhusa vahkus, main stuorámus oassi leamaš olgobáikegoddelaččain.

Koronakoordinerenjoavku ávžžuha, ahte badjel 20 olbmo priváhtadilálašvuođat ja čoahkkaneamit eai lágiduvvo, gáiddusin bargan joatkašuvvá ja skvullain bargit sihke badjel 6-jahkásaččat geavahit ain máskka. Joavkku mielde ii leat šat dárbu badjeskuvllaid ja nuppi dási oahppolágádusaid gáiddusoahpahussii iige badjel 16-jahkásaččaid joavkudoaimma gaskalduhttimii.

Joavku ávžžuha goittot ain, ahte buohccedikšunbiire rájáid rasttildeaddji valáštallan- ja lihkadandáhpáhusat eai lágiduvvon cuoŋománu 24. beaivve rádjái. Ávžžuhus guoská buotahkásaččaid okto- ja joavkovaláštallandáhpáhusaid siste ja olgun. Ávžžuhus ii goit guoskka riikkajoavkodoaimma iige SM ja vuosttas divišuvdnadási dáhpáhusaid.

6.4. dii. 14.55 Beassážiid áigge Lappis gávcci ođđa koronavirusnjoammuma

Lappis leat gávnnahan gávcci koronavirusnjoammuma beassážiid áigge. Guhtta dáhpáhusa leat Oarje-Lappi buohccedikšunbiires, guokte Roavvenjárggas ja okta Giemajávrris.

Epidemiijadilli leamaš ráfálaš Lappis mannan vahkus. Beassážiid stuorra turistamearit eai vel oidno njoammunstatistihkain, easkka sullii vahku geažes.

Infekšuvdnabajitdoavttir Markku Broas Lappi buohccedikšunbiires jáhkká, ahte báikkálaččat ja turisttat leat čuvvon dorvvolašvuođarávvagiid. Broasa mielde maiddái johtilisteasttat leat doallan dili ráfálažžan.

1.4 dii. 8.15 Ráđđehus lea dahkan evttohusa boahkohanortnega nuppástuhttimis

Ráđđehus lea dahkan evttohusa boahkohanortnega nuppástuhttimis ja evttohusas leat golmmalágan nuppástusat, mat bohtet fápmui áramustá cuoŋománu 13. beaivvi.

Evttohusas boahkohanortnet dáhpáhuvašii olles riikkas ahkejoavkkuid mielde nu, ahte dat álget boarráseamos geažis nappo 60-69 jahkásaččain. Boahkoheamit ovdánivčče ahkejoavkkuid mielde nu, ahte maŋimužžan boahkohuvvojit 16-29 jahkásaččat.

Lunddolaččat riskajoavkkut, sosiála- ja dearvvašvuođafuolahusa koronabuohcciid dikšu bargit ja ahkeolbmot galget boahkohuvvot dan ovdal.

Boahkohemiid lea ulbmiliin maid deattuhit dihto guovlluide ovdal miessemánu loahpa. Bargo- ja buresbirgejupmelágádus THL maid sáhtašii maid boahkuhanávdnasiid juohkimis vuhtiiváldit olmmošlogu lassin maid koronanjoammumiid meari ja sierrabuohccedikšumii šaddan olbmuid meari.

Ráđđehusa evttohusa mielde maid bátnedoavttir dahje dearvvašvuođasuorggi oahppi sáhtašii addit boahkoheami, dálá dilis biikka oažžu čugget dušše doavttir dahje dasa skuvlejuvvon buohccedivššár.

1.4. dii. 7.15 Ráđđehus šattai geassit evttohusas eret

Stáhtaministtar Sanna Marin muittuha olbmuid máššilisvuođas vaikke johtinráddjehusaid ásaheapmi ii ovdánange ráđđehusas riikkabeivviide ikte.

Su mielde ávžžuhusaid ja ráddjemiid ferte dárkilit čuovvut dál basiid áigge vai koronaepidemiija ii beasa leavvanit.

Ráđđehus guorahallagoahtá otne duorastaga vuođđoláhkaváljagotti cealkámušaid, maid dihte ráđđehus šattai geassit johtinráddjenevttohusas eret.

Váljagotti mielas johtinráddjemiidda eai leat ákkat ja dan sadjái evttohii dárkilut mearrádusaid dahkama, mainna livčče vejolaš stivret ovttaskas dáhpáhusaid ja čoahkkanemiid.

Eiseválddiid mielas johtinráddjemiidda Suomas livčče lean dárbu dán epidemiijadilis, muhto vuođđoláhkaváljagotti mielas Suoma dálá lágat eai vana ásahit ráddjemiid.

Marin mielas dál olbmot šaddet ieža vihkkehallat dili ja bivdá garvit buotlágan hervvoštallamiid, main koronavirus sáhttá njoammut ovddusguvlui.

31.3. dii. 17.05 Mátkkoštanráddjehusaid jotket cuoŋománu loahpa rádjái

Stáhtaráđđi lea otne mearridan joatkit mátkkoštanráddjehusaid cuoŋománu lohppii. Sivvan leat go koronapandemiija joatkašuvvá ain, dan dihte sihke koronavarianttaid leavvama eastadeapmin sisrájáid gohcima ja mátkkošteami ráddjehusaid jotket duorastaga 1.4. rájes.

Suopma joatká mátkkoštanráddjehusaid buot eará Schengen-riikkaid oasil baicce Islándda. Eará riikkain ožžot boahtit mátkkošteaddjit dušše Australias, Mátta-Kores, Singapores, Ruandas, Thaieatnamis ja Ođđa-Selánddas.

Suomas jotket maid dihto rádjerasttildanbáikkiid rahpanáiggiid ráddjemiid olles Suoma nuortarájás ja Lappis oarjerájás.

Áššis dieđiha sisáššiidministeriija.

31.3. dii. 14.27 Soađegilis vejolaš njoammunáitta

Soađegilis lea sáhttán gártat njoammunáitaga vuollái. Gielddas leat gávnnahan otne ovtta ođđa koronanjoammuma olgobáikegoddelaš olbmos.

Gielda dieđiha neahttasiiddustis, ahte koronabuohcci lea galledan vuossárgga 29.3.2021 Lidl-gávppis dii. 12-13 gaskasaš áigge. Son lea geavahan máskka.

Dieđáhusas ávžžuhit buohkaid Lidl-gávppis dalle galledan olbmuid čuovvut dávdameakkaid ja ohcalit koronatestii unnitge dávdamearkkaid dihte.

31.3. dii. 14.21 Golbma ođđa koronanjoammuma Lappis

Lappis leat gávnnahan golbma ođđa koronavirusnjoammuma. Njoammumat leat Sallas, Soađegilis ja Oarje-Lappi buohccedikšunbiires.

Salla ja Soađegili njoammumat leat gávnnahuvvon olgobáikegoddelaš olbmos ja njoammumiid gáldu lea Lappi olggobealde. Oarje-Lappi koronabuohcci leamaš karantenas.

31.3. dii. 10.53 Gihttelis dahkkon golbma rihkkusalmmuhusa koronaerrema rihkkumis

Lappi boles lea girjen golbma rihkkusalmmuhusa, main positiivalaš koronanjoammuma ožžon olbmot leat rihkkon sidjiide mearriduvvon errema. Dáhpáhusat leamaš Gihttela gielddas ja dat leat dáhpáhuvvan dán jagi bealde.

Boles dutká dáhpáhusaid dearvvasvuođasuodjalanrihkkumuššan ja maŋimuš dáhpáhusa maid vearisteapmin. álgudutkamat leat gaskan. Dáhpahusaid dihte Gihttelis ja Levis leahkki fitnodagaid bargit leat gártan fitnat koronateasttain ja báhcit koronakarantenai.

31.3. dii. 7.30 Anára gielddas ráfálaš dilli dieđiha njunušdoavttir

Anára gieldda njunušdoavttir Outi Liisanantti mielde gieldda koronadilli lea bisson ráfálažžan maŋimuš guovtti vahku áigge.

Ovdan leat boahtán dušše guokte njoammuma, ja dearvvašvuođafuolahusas leat bastán guoradit daid njoammunbálgáid iige koronavirusvarianta leat beassan njoammut báikki olbmuide.

Čuoiganluopmu manai beanta bures Anára oasil.

Gielddas lea maid ahkeolbmuid boahkoheapmi ovdánan, gieldda olbmuin badjel 16 proseantta leat ožžon biikka ja badjel 70-jahkásaččain juo 55 proseantta.

29.3. dii. 13.00 Suoločielggis vejolaš njoammunáitta

Suoločielggis lea sáhttán gártat njoammunáitaga vuollái máŋggain báikkiin maŋit vahkkus, gaskavahku ja sotnabeaivve gaskkas.

Anár gielda dieđiha, ahte koronai buohccán bearaš lea fitnan máŋgii ain jo Suoločielggi sabehiid láigohanbáikkis, K-Marketis, sihkkeliid láigohanbáikkis ja Tunturihoteallas.

Bearaš lea mátkkomaštan maid girdigieddebussen 21. beaivve eahkes.

Vejolaš njoammunáitaga vuollái gártan olbmuid bivdet dál ohcalit koronatesttii nu jođánit go vejolaš.

29.3. dii. 7.30 Restoráŋŋat rabas otne

Restoráŋŋat besset rahpat uvssaidis otne vuossárga Lappi eanangottis buot eará sajiin baicce Levi čuoiganguovddážis restoráŋŋat bissot gitta.

Ráđđehus mearridii ikte sotnabeaivve doallat restoráŋŋaid vel gitta vearrámus koronaepidemiijaguovlluin Mátta-Suomas vel čuovvovaš golbma vahku.

Ráđđehus rehkenastá, ahte čuovvovaš golmma vahku giddemis stáhta máksá buhtadusaid 70 miljon euro ovddas

26.3. dii. 13.00 Lappi fitnodatdoallit árvalit johtinráddjehusaid ja restoráŋŋaid giddendili duššadit Lappi beassašsesoŋŋa

Lappi fitnodatdoalliid Lapin Yrittäjät -searvvis oaivvildit, ahte Suoma ráđđehusa evttohan johtinráddjehusat ja restoráŋŋaid gidden duššadit Lappi turismaealáhussii dehálaš beassášsesoŋŋa.

Searvvis árvalit, ahte ráddjehusaid dihtii idjadanvárremiid barttain ja hoteallain šluhttejit mearkkašahtti ollu.

Lappi fitnodatdoallit gáibidit, ahte riikkabeaivvit divvu ráđđehusa evttohusa nu, ahte mátkkošteapmi ráddjenguovlluin livččii lobálaš maiddái oanehis áigái láigohuvvon bartii dahje eará astoáiggi idjadanbáikái. Searvi gáibida, ahte seammás stáhta mearrida buhtadit fitnodatdoalliide manahuvvon dietnasiid ollislaččat, danin go ráddjehusat easttadit ealáhusdoaimma.

Searvi sávvá maiddái, ahte guovlohálddašanvirgeolbmot oaččošedje mearridit spiehkastagaid restoráŋŋaid giddendillái gielddaid mielde.

26.3. dii. 11.00 Kela buhtte koronaboahkuhanmátkkiid goluid

Kela álgá buhttet goluid, mat leat boahtán koronaboahkuheami váldimis. Buhtadusaid máksigohtet 27.3. rájes dahkkon boahkuhanmátkkiin.

Mátkkit buhttejuvvojit seammá láhkai go dearvvasvuođafuolahusa bálvalusaide dahkkon eará mátkkit. Ovttaguvllot mátkki iežasvástu lea eanemustá 25 euro.

Mátkkit buhttejuvvojit dábálaččat hálbbimus mátkkoštanvuogi mielde. Juos áššehas ii sáhte dearvvasvuođadili dihtii geavahit almmolaš fievrruid dahje dat eai leat geavahusas, son sáhttá oažžut buhtadusa táksemátkkis. Vuoi Kela sáhttá buhttet táksemátkki goluid, áššehas galgá diŋgot táksse guvllolaš diŋgonnummiris.

Sámegielat áššehasain lea vuoigatvuohta geavahit iežasgielat fástatákse sámi giellalága vuođul sámeguovllus, nappo Eanodaga, Anára ja Ohcejoga gielddain ja Soađegili gieldda davveoasis.

Mátkegoluid buhttema ulbmilin lea sihkkarastit áššehasaid beassama koronaboahkuheapmái.

26.3. dii. 7.19 Davás leat vuordimis olu mátkkošteaddjit beassážiid áigge

Stobut ja luopmoviesut Lappi eanangottis leat beassážiid áigge stuorámus osiin várrejuvvon.

Ráđđehusa ja dearvvašvuođaeiseválddiid ávžžuhusat mátkkošteame vealtimis beassážiin eai leat oidnon nie, ahte olbmot livčče šluhtten sin mátkkiid ja várrejumiid.

Ráđđehusa evttohus johtinráddjehusain ii jáhkkimis geargga beassážiidda.

Čuoiganluomuid áigge measta bealli Lappi eanangotti koronanjoammumiin duođaštuvvui mátkkálaččain.

25.3. dii. 13.34 Dieđihandilálašvuohta johttinráddjehusain: dearvvašvuođafuolahus ii gierdda dávdadili deattu, jus johttin ii ráddjejuvvo

Ráđđehusa evttohus johttima ja lagaškontavttaid gaskaboddosaš ráddjemis garrasamos epidemiijaguovlluin lea dál riikkabeivviid gieđahallamis.

Sivvan lea, ahte dearvvašvuođafuolahus ii gierdda dávdadili deattu, jus johttin ii ráddjejuvvo.

– Jus ráddjehusat eai váldojuvvo atnui, šaddá earenoamáš duođalas uhki dearvvašvuođafuolahusa gierdevašvuhtii čuovvovaš vahkuid áigge, stáhtaministtar Sanna Marin dadjá dieđihandilálašvuođas.

Dieđihandilálašvuohta oidno dáppe.

Marin mielde ulbmilin johttinráddjehusain lea, ahte unnidit badjelmearalaš kontavttaid meari. Boahttevuođasge sáhttá goittot ovdamearkka dihte fitnat gávppis dahje boasttas.

Marin mielde johttinráddjehusain iskkat váikkuhit daidda friddjaáiggedilálašvuođaide, maidda dálá vugiiguin eat bastte váikkuhit. Dakkár dilálašvuođat leat ovdamearkka dihte priváhtta ávvudoalut.

– Ávžžuhan din buohkaid ovttas unnidit kontavttaid dušše vealtameahttun dássái. Dát oaivvilda dan, ahte ehpet bovde ustibiid eahkedaččaide, ehpet ordne máná riegadanbeaidoaluid dahje ávvudoaluid. Feasttaid dahje dárbbašmeahttun čoahkkánemiid galgá šluhttet, vai geassi livčče buoret midjiide buohkaide.

25.3. dii. 12.46 Dákkár livčče oaivegávpotguovllu ja Turku johtinráddjehus – boles ráhkkana gozihit

Boles ráhkkana gozihit johtinráddjehusaid. Bolesa mielde sii livčče goziheamen birra jandora ja sii sáhtášedje jearrat ráddjenguovllus johtti olbmuin čielggadeame johtima sivain. Čielggadeapmi sáhtášii leat juogo čálálaš dahje njálmmálaš.

Ráđđehus evttoha ordnet lága, mii ráddješii olbmuid johtima friddjavuođa oaivegávpotguovllus ja Turkus. Evttohushápmosis evttohuvvo, ahte johtinráddjehusaid áigge ruovttu dahje dan sullásaš ássánbáikki šilljus vuolgin livčče gildoduvvon, earret spiehkastatsivain.

Spiehkastagat livččet earret eará vealtameahttun borrangálvvuid oastinreaissut dahje apteaikkas fitnan ja bargui ja skuvlii johtin. Maid iežas stohpui oaččošii johtit. Spiehkastagat láhkii leat oktiibuot 12.

25.3. dii. 7.20 THL doarju ráđđehusa johtinráddjehusevttohusa, evttohushámus gárvánii eahkes

Dearvvašvuođa ja buresveadjima lágádus THL mielde dálá koronaráddjehusat ja boahkuhanfárta eai leat doarvái beaktilat epidemiijadillái ja danin dat doarju cealkámušastis johttinráddjehusaid dárbbu. Johttinráddjehusat leat oaivvilduvvon oaivegávpotguovllus Helssegii, Espooi, Vantaai ja Kaunianenii sihke sierra velá Turkui.

Dál buot ráđđehusbellodagat leat dorjon johtinráddjehusaid guoski láhkaárvalusa geigema riikkabeivviidda.

Ráđđehus almmustahtii ikte eahkes hápmosa johtinráddjehusplánain.

Evttohushápmosis ráđđehus evttoha lága, mii ráddješii gaskaboddosaččat johtinfriddjavuođa, olbmuid lagaš kontavttaid ja ovttastallama. Maiddái máskabággu gullá ráddjehussii.

Ráđđehus geahččala oažžut lága fápmui jođánamos lági mielde ja dat livčče fámus evttohushápmosa mielde miessemánu 14. beaivve rádjái. Johtinráddjehusain galggašii mearridit goittot álo golmma vahkkui hávil.

Evttohushámus vuordá velá ráđđehusbellogadaid riikkabeaijoavkkuid dohkkeheame ovdal riikkabeivviid gieđahallama.

24.3. dii. 14.39 Lappi koronadilli lea ráfálaš

Koronadilli lea veháš ráfon Lappis. Gaskavahkko Lappi ja Länsi-Pohja buohccidikšunbiriin gávnnahuvvui dušše okta koronanjoammun ja dat lei Roavenjárggas. Oktiibuot dán vahkus Lappis leat gávnnahan ovcci njoammuma.

– Koronadilli lea dál ráfálaš Lappi buohccidiškunbires, maiddái Gihttela Levi dilli lea ráfon, dadjá infekšuvdnadoavttir Markku Broas.

24.3. dii. 10.23 Norrbottenis 30 olbmo, Västerbottenis 64 olbmo buohccedivššus koronadili geažil

Norrbottena leanas Ruoŧa bealde leat 30 olbmo dál buohcceviesus koronadávdda dihte. Dain olbmuin gávccis leat beavttalmahttojuvvon divššus. Västerbottenis fas l64 leat buohccedivššus ja sis 14 beavttalmahttojuvvon divššus.

Buohccedivššár Julia Marainen bargá Girona buohcceviesus beaivválaččat koronabuohcciiguin. Son sávvá olbmuid váldit dili duođas ja čuvvot rávvagiid.

– Mii ávžžuhit, ahte buohkat váldet boahkuid, danin go dat boahtá eastit njoammudávda hui ollu, dadjá Julia Marainen.

Geahča ášši Ođđasat-sáddagis.

24.3. dii. 8.13 Arctic Winter Games -gilvvut sirdášuvvet jagi 2023 álgui

Boahtte jagi Arctic Winter Games (AWG) sirdášuvvá jagi 2023 álgui. AWG livčče galgan ordnejuvvot njukčamánus 2022.

Sámi joavkku jođiheaddji Ron Knutsen lohká, ahte mearrádusa galgá dahkat juo ná arrat, dasgo das leat nu stuorra ekonomalaš váikkuhusat oassálastiide.

Áššis muitala SR & SVT Sápmi.

24.3. dii. 6.58 Marin: Johttinráddjehusain ráđđádalle maŋŋit eahkedii, golmma bellodaga joavkkut čoahkkanit vel odne

Ráđđehus arvvoštallá vejolaš evttohusas johttinráddjehusain vel odne. Stáhtaministtar Sanna Marin muitalii áššis Twitteris.

Ráđđehusa ráđđádallamat koronadilis ja johttinráddjehusaid dárbbus nohke ovdal gaskaija. Golmma ráđđehusbellodaga riikkabeaijoavkkut čoahkkanit odne gieđahallat ášši, muitala Marin.

Joavkkuid čoahkkaneame maŋŋá árvalit, addetgo evttohusa riikkabeivviide.

23.3. dii. 12.56 Restoráŋŋaid ráddjehusaid evttohit joatkit 18.4. rádjái

Ráđđehus evttoha restoráŋŋaid ráddjehusaid joatkašuvvat vel golbma vahku, 18.4. rádjái. Ráddjehus livččii seammalágán, go dálá ráddjehus, mii lea fámus 28.3. rádjái.

Ráđđehus linnjii ráddjehusa joatkagis ráđđádallamiin ikte ja ráđđehusa evttohus geigejuvvui riikkabeivviide odne.

– Dávdadilli lea ain hui duođalaš, ahte mii gártat joatkit restoráŋŋaid ráddjehusaid. Dát lea okta dain vealtameahttun doaimmain, maiguin mii eastadit epidemiija leavváma ja deaddit njoammumiid meari vulos, kommentere bargoministtár Tuula Haatainen.

Áššis dieđiha Bargo- ja ealáhusministeriija.

Čuovvovaččat riikkabeaivvit gieđahalla ráđđehusa evttohusa, man maŋŋá dan iskkat oažžut fápmui jođánamos lági mielde.

23.3. dii. 12.41 Ráđđehus joatká fas odne ráđđádallamiid vejolaš johttinráddjehusain

Suoma ráđđehus joatká odne eahkes ráđđádallamiid vejolaš johttinráddejehusain eastadan dihte koronavirusa leavvama. Ráđđehus čoahkkanii jo ikte ságastallat johttinráddjehusain, muhto áššis eai dahkan vel makkárge mearrádusaid.

Ráđđehusbellodagain ledje iešguđetlágan oainnut das, ahte mo ja makkár johttinráddjehusaid galggašii váldit atnui.

22.3. dii. 16.47 Čoahkkananráddjehusat joatkašuvvet Lappis

Lappi guovlohálddašaneiseváldi joatká almmolaš dilálašvuođaid ja čoahkkimiid oassálastimeari ráddjema olles Lappi buohccidikšunbire guovllus. Buot badjel guđa olbmo almmolaš dáhpáhusat ja čoahkkaneamit leat gildojuvvon cuoŋománu 11. beaivve rádjái.

Ráddjehusaid jotket amas koronavirus beassat leavvat.

Eiseválddiid mielde lea goit vejolaš lágidit almmolaš dilálašvuođaid ja čoahkkimiid, maidda oasálastet vuollái guhtta olbmo ja dain čuvvot buot koronanjuolggadusaid.

22.3. dii. 12.13 Ráđđehus čoahkkanan ságastallat koronaeastadandoaimmaid joatkimis

Ráđđehus lea čoahkkanan ráđđádallat koronaeastadandoaimmaid joatkimis. Otná deaivvadeamis ráđđehus galgá ságastallat vejolaš johtinráddjehusain ja das, ahte restoráŋŋaid gidden galgá joatkašuvvat vel.

Dálá dilis Suomas gávnnahuvvojit birrasiid 800 koronanjoammuma beaivválaččat ja dat lea stáhtaministtar Sanna Marin mielas beare olu.

22.3. dii. 7.00 Lappi gielddain vuosttildit koronaboahkuhanortnega rievdadusaid

Lappi gielddat vuosttildit koronaboahkuhanortnega rievdadeami.

Lappi gielddajođiheaddjit gáibidit, ahte boahkuhanmálles galgá giddet fuomášumi gieldda ássiid meari lassin maiddái guovllu mátkkošteddjiid mearrái. Gielddajođiheaddjiid mielas Lappii čujuhuvvon boahkuhusaid ii galgga unnidit, baicce lasihit.

Suomas boahkuhusaid áššedovdejoavku lea evttohan rievdadusaid boahkuhanortnegii vai boahkuhankapasitehta livčče beaktilut guovlluin, main koronadilli lea vearrámus.

19.3. dii. 13.34 Lappi koronakoordinerenjoavku joatká koronaeastadanávžžuhusaid guvttiin vahkuin

Lappi koronakoordinerenjoavku joatká koronaepidemiija easttadandoaimmaid guvttiin vahkuin. Joavku ávžžuha earet eará, ahte badjel 16-jahkásaččaid siste dáhpáhuvvan astoáiggedoaimmaid gaskalduhttin joatkašuvvá ain eaige badjel guđa olbmo čoahkkaneamit lágiduvvo.

Maiddái nuppi dási oahppolágádusaid ávžžuhit bissut gáiddusoahpahusas, jus gielda nu mearrida. Otne addon ávžžuhusat leat fámus Lappi buohccedikšunbiires cuoŋománu 11. beaivve rádjái.

Dan sadjái linnjábiillain ii leat dárbu ráddjet mátkkošteaddjimeriid Lappi buohccedikšunbiires, cealká Lappi koronakoordinerenjoavku.

19.3. dii. 12.25 Soađegilis addigohtet lasi boahkuhanáiggiid 75 jagi deavdán olbmuide

Soađegili gielddas addigohtet koronaboahkuhusáiggiid 75 jagi deavdán ja das boarrásabbuide. Áiggi sáhttá várret boahtte vuossárgga rájes árgan dii. 8-14 nummiris 020 692 884.

Gielddas fuomášuhttet, ahte áiggivárrennummirii ii galggašii riŋget, jus ii gula boahkuhanvuorus leahkki ahkejovkui.

Soađegili gielddas leat duorastaga 18.3. rádjái boahkuhan 1638 olbmo.

18.3. dii 15.57 Avvilis ja Suoločielggis lea sáhttán šaddat njoammunáitaga vuollái mannan vahkuloahpa

Anára gielda dieđiha, ahte olbmot leat sáhttán šaddat njoammunáitaga vuollái čuovvovaš báikkiin Avvilis ja Suoločielggis mannan vahkuloahpa áigge:

• S-market Ivalo, 12.3. dii 14-14.30
• Ivalo Aurora Village bohccuid biebmanbáiki, 13.3. dii 10.30
• Ski Saariselkä vuokraamo, 13.3. dii 16
• Saariselkä Kuukkeli, 13.3. dii 17

18.3. dii 15.41 Anáris gávnnahan guokte ođđa koronanjoammuma

Lappi buohccidikšunbires leat gávnnahan duorastaga guhtta ođđa koronanjoammuma. Dáin guokte leat Anáris, guokte Gihttelis ja guokte Roavenjárggas.

Sihke Anára ja Roavenjárgga njoammumat leat olgobáikegoddelaš olbmuin. Gihttelis njoammumiid leat gávnnahan mátkeealáhusa bargiin.

18.3. dii 9.47 Eanodatlaččat eai leat gártan njoammunáitaga vuollái

Muoná-Eanodaga dearvvašvuođasuorgi dieđiha, ahte ikte Eanodagas gávnnahuvvon koronanjoammun ii leat dagahan njoammunáitaga báikkálaš servošis. Eanodatlaččaid eai leat dárbbašan bidjat karantenii njoammuma geažil iige leat várra lassinjoammumiin.

18.3. dii 9.15 Anár gieldda njoammunbálgát leat kártejuvvon – Liisanantti muittuha karantenaid ávžžuheamis

Anár gieldda jođiheaddji doavttir Outi Liisanantti muitala dieđáhusas, ahte gielddas leat ihtán maŋimuš vahkuid áigge ovttaskas njoammumat mat laktásit mátkkošteapmái. Njoammunbálgáid ja áitaga vuollái gártan olbmot leat kártejuvvon, muhto vel eai dieđe, leago njoammumiin sáhka ođđa brihttalaš variánttas.

Maiddái vejolaš báikkit, gos lea sáhttán gártat njoammunáitaga vuollái leat čielgan: Njoammunáitaga vuollái lea sáhttán gártat Avvila S-marketis 12.3. diibmu 14.00-14.30 ja Aurora Village boazoáidde luhte Avvilis 13.3. diibmu 10.30.

Outi Liisanantti muittuha, ahte jus olmmoš lea biddjon karantenii dahje lea ieš álgán eaktodáhtolaš karantenii de galgá garvit buot ruovttu olggobeal kontávttaid. Olggos sáhttá mannat, jus doallá unnemustá guovtte mehter gaskka earáide.

Gávpái, bargui dahje astoáiggedoaimmaide ii leat lohpi mannat.

Eará bearašlahtut dahje seamma dállodoalus ealli olbmot eai dárbbaš báhccit karantenii.

17.3. dii 15.54 Eanodagas ja Anáris ođđa koronanjoammumat

Lappi buohccidikšunbires leat gávnnahan gaskavahkko čieža ođđa koronanjoammuma. Njoammumat leat gávnnahuvvon Eanodagas, Anáris, Kolaris, Soađegilis ja Roavenjárggas.

Eanodagas teastta bokte gávnnahuvvui okta ođđa njoammun ja maiddái Anáris okta.

Infekšuvdnadoavttir Markku Broas muitala, ahte buot njoammumat leat olgobáikegoddelaš olbmuin.

Dán vahkus Lappi buohccidikšunbires leat gávnnahan oktiibuot logi ođđa koronanjoammuma.

17.3. dii 12.12. Ohcejogas boahkuhuvvon eanemus olles Lappis, Eanodagas fas uhcimus

Eanemusat boahkuhemiid koronavirusa vuostá leat Lappis ožžon ohcejohkalaččat, muitala Lapin Kansa. Statistihkaid mielde juo measta juohke goalmmát ohcejohkalaš dahje birrasiid 30 proseantta gieldalaččain lea ožžon vuosttas boahkuhusa.

Unnimusat koronavirusa vuostá leat boahkuhan Eanodaga gielddas, go doppe dušše 12 proseantta badjel 15-jahkásaččain lea oažžun boahku.

Dearvvašvuođa- ja buresbirgenlágádusa THL mielde gielddat ovdánit boahkuhemiin sierra fárttain, go boahkut juhkkojuvvojit sierra boahkuhanjoavkkuid ja riskajoavkkuid mielde.

16.3. dii. 10:10 Durdnosleagis gielddadoavttir mearridii giddet skuvlla korona geažil

Ylitornio gielddas Durdnosleagis gávnnahedje vuossárga njukčamánunu 15. beaivve eahpedábálaš ollu koronanjoammumiid. Positiivalaš teastabohtosat ledje 21. Dain oassi leat Ainiovaara skuvlla bajit ja vuolit luohkáin. Njoammundávddain vástideaddji doavttir lea mearridan giddet skuvlla ja doppe sirdasit gáiddusoahpahussii.

Gieldda addin dieđu mielde orru leamen čielggas ahte virus lea njommon bearrašiid gaskavuođas. Gielddas čieggadit dál njommunbálgáid ja buohkat geat leat sáhttán gártat koronanjoammunvára vuollái testejuvvojit dearvasvuođaguovddáža koronatestenbákkis.

Ylitornio gielda gullá Länsipohja buohccedikšunbirei ja doppe leat pandemiija álggus rájes njukcamánu 14. beaivve rádjai gávnnahuvvon 45 koronanjoammuma.

15.3. dii. 12.45 Sotnabeaivve bođii ovdan okta koronanjoammun Anár gielddas

Vahkuloahpas leat Lappi buohccedikšunbires koronaiskosiin duođaštuvvon čieža ođđa njoammuma. Lávvardaga almmuhuvvojedje vihtta njoammuma Gihttel Levis ja sotnabeaivve okta njoammun Anár gielddas ja okta Kolari gielddas.

Anár gieldda jođiheaddji doavttir Outi Liisanantti ii addán odne dárkilut dieđuid njoammuma birra, muhto nannii ahte sotnabeaivve lea teasttain gávnnahuvvon ovtta olbmos koronavirus.

Sámeguovllu gielddain Soađegilis leat koronapandemiija álggu rájes gávdnon dássážii 62 njoammuma, Ohcejogas 11 njoammuma ja Anáris logi njoammuma. Go Eanodagas leat vuollái vihtta dáhpáhusa de dearvvasvuođa- ja buresveadjinlágádus ii raportere daid logu.

12.3. dii. 15.45 Boles dutká errenmearrádusa vejolaš rihkkuma Levis

Boles dutká koronanjoammuma dihte erremii biddjojuvvon olbmo doaimma. Dutkan álggii dearvvašvuohtaeiseválddiid dahkan almmuhusa vuođul.

Bolesii dahkkon almmuhusa vuođul navdet, ahte olmmoš lea rihkkon sutnje njoammundávdalága vuođul addojuvvon errenmearrádusa Levis 9.-10.3. Dán dilis eai navdde, ahte oktage olggobeal olmmoš livčče gártan njoammunáitaga vuollái su doaimmaid dihte.

Boles ja dearvvašvuohtaeiseválddit muittuhit, ahte errema (go lea gávnnahuvvon njoammun) ja karantena (go lea gártan njoammunáitaga vuollái) guoski mearrádusat geatnegahttet olbmuid ja daid rihkkun lea rihkus.

12.3. dii 15.30 Anáris gávnnahuvvon koronanjoammun

Anár gielddas lea gávnnahuvvon ikte duorastaga jođánis teasttain báikkálaš olbmos mátkkošteapmái laktáseaddji koronanjoammun.

Moaddelot olbmo leat biddjojuvvon karantenii go leat gártan njoammunvára vuollái. Anára gieldda jođiheaddji doavttir Outi Liisanantti muitala, ahte olbmuid leat dál kárten ja bidjan karantenii. Son maiddái giitá olbmuid das, ahte leat fitnan viššalit testemiin.

Jođiheaddji doavttir ávžžuha mannat testii unnimusge dávdamearkkas ja muđuige, jos lea leamaš dieđihuvvon sajiin seammá áigge go olmmoš, geas lea gávnnahuvvon koronanjoammun.

Anár gielda dieđihii otne bearjadaga, ahte Anára girkosiiddas lea sáhttán gártat njoammunáitaga vuollái Papana Baris sotnabeaivve 7.3. diibmu 11-18.

12.3.2021 dii 18:05: Artihkkal dárkkálmahttojuvvon Anár gieldda dieđuid vuođul.

12.3 dii. 8.00 Rádjejohtinmearrádusat jotkojuvvojit 17.4 rádjai

Stáhtaráđđi mearridii ikte duorastaga, ahte Supmii boahtin ráddjehusat jotkojuvvojit lávvardahkii, cuoŋománu 17.beaivvi rádjai.

Sivvan lea, go koronapandemiija joatkašuvvá ain fámolažžan, eaige reahkkájeaddji doaibmabijut leat vel dálá ráddjehusaid lassin mearriduvvon.

Dan dihte sihke virusvariánttaid leavvaneame eastima dihte sisrájáid ja olgorájáid johtinráddjemat jotkojuvvot. Guovvamánu 18. beaivvi dáhkkojuvvon mearrádusaide leat vuordimis dušše smávva nuppástusat. Dat bohtet fápmui dán mánu 19. beaivvi.

12.3. dii. 7.15 Anáris šaddet ain guoradit studeanttaid mátki

Anára gieldda dearvvašvuođafuolahus šaddá ainge guoradit guovvamánu loahpas ja dán mánu álggus Suoločielggis galledan studeantajoavkku luottaid vejolaš koronaáitagiid dihte.

Dalle sullii 60 studeantta joavku jođii guovllus ja mátkki maŋŋá 18:is gávnnahuvvui koronavirusnjoammun. Njoammunvárra lea sáhtán šaddat áŋgge guovtti prográmmabálvalusfitnodagas ja guovtti restoráŋŋas.

Sii leat vejolaččat johtán maid báikkálaš gávppiin ja eará restoráŋŋain.

Gielda ávžžuha ohcalit testii uhcimusge dávdamearkkas.

11.3. dii. 16.38 Ohcejogas ii leange korona

Ohcejoga gielda dieđiha, ahte gielddas ii leat duođaštuvvon positiiva koronavirusnjoammunboađus ikte gaskavahkko. Ohcejoga gieldda mielde ii leat dieđus, ahte giige livččii leamašan njoammunáitaga vuolde.

11.3. dii. 15.56 Suoločielggi fitnodatdolliid ja bargiid ávžžuhit mannat koronatestii

Anára giela dieđiha, ahte Suoločielggis johttán olbmot leat sáhttán šaddat njoammunáitaga vuollái guovvamánu loahpas ja njukčamánu álggus dáin báikkiin:

• Top Safaris, 25.2. dii 15.30-15.45
• Suoločielggi čierastallanbáiki 26.2. dii 16.00-17.00
• Liegga Laavu 26.2. dii 12.00-12.15
• Restoráŋŋa Kaunispään Huippu 3.3. dii 15.00-16.30 ja 4.3. dii 11.00-14.00

28.2.-5.3.2021 lea Suoločielggis leamašan jođus studeantajoavku, main máŋgasiin lea gávnnahuvvon koronanjoammun mátkki maŋŋel. Studeanttat lea johttán báikkálaš gávppiin ja vejolaččat restoráŋŋain. Suoločielggi fitnodatdolliid ja bargiid ávžžuhit mannat jođánit koronatestii Avvila dearvvašvuođaguovddážii.

11.3. dii. 15.22 Suoločielggis luomustallan studeanttain 18 njoammuma

Suoločielggis njukčamánu álggus galledan oahppijoavkkus oktiibuot 18 olbmos lea gávnnahuvvon koronanjoammun.

Oktiibuot Nuorta-Suoma universitehta Kuopio skuvlla čuoiganluopmomátkkis ledje 46 riikkaidgaskasaš studeantalonohallama oahppi.

Kuopio gávpoga infekšuvdnadoavttir Raija Savolainen muitala, ahte studeanttat leat galledan Suoločielggi Huippu restoráŋŋas 4.3. Savolainen mielde studeanttat leat leamašan Suoločielggis dušše iežas joavkkuin, eaige leat leamašan dahkamušas eará olbmuiguin.

Dávdamearkkat leat ihttán easka dan maŋŋel, go studeanttat leat máhccan ruoktot reaissus.

– Mii navdit, ahte dávda lea njommon Suoločielggis. Muhto lea veadjemeahttun diehtit, ahte juste gos, dadjá Savolainen.

Lappi buohccidikšunbire infekšuvdnadoavttir Markku Broas oaivvilda, ahte stuorra joavkomátkkiid galgá dál vajáldahttit

– Njoammunáitta Mátta-Suomas lea dál nu stuoris, ahte riska njoammudit dávdda mátkkošteami bokte lea mearkašahtti.

Lappi buohccidikšunbires leat gávnnahan duorastaga njeallje ođđa koronanjoammuma. Golbma Kolaris ja okta Gihttela Levis. Kolari njoammumiin guovttis lea oktavuohta Kuopio studeantamátkái.

Loga áššis eanet dáppe.

11.3. dii. 7.30 Ohcejogas ovdánit boahkohemiin – Soađegillái ođđa plána

Ohcejogas boahkoheamit leat ovdánan bures. Iltalehti-áviissa dieđuid mielde gieldalaččain leat boahkohuvvon juo 25 proseantta. Anára gielddas lohku lea 11 proseantta, Soađegilis 11,5 ja Eanodagas 10,4 proseantta.

Ikte Ohcejogas registrerejuvvui okta ođđa koronavirusnjoammun ja olles Lappi buohccedikšunbires 4.

Soađegili gielda lea nuppástuhtán iežas boahkohanplána dearvvašvuođa- ja buresbirgejupmelágádus THL ođđa rávvagiid mielde.

Astra Zeneca- fitnodaga boahkohanávnnas lea gávnnahuvvon beaktilin maid badjel 70-jahkásaččain ja danin boahkohemiid beavttálmahttet badjel 70-jahkásaš olbmuid ahkeluohkás.

Juo addojuvvon boahkohanáiggit goit bisuhuvvojit fámus.

10.3. dii. 13.40 Ohcejogas koronanjoammun – Lappi guovllus njeallje ođđa njoammuma

Lappi buohccedikšunbire guovllus leat gávnnahan njeallje ođđa koronadáhpáhusa. Okta njoammumiin lea gávnnahuvvon Ohcejogas.

Eará njoammundáhpáhusat leat Gihttelis, gos lea gávnnahuvvon okta njoammun ja Roavenjárggas, gos leat guokte njoammuma.

Nubbi Roavenjárgga njoammumiin lea gávnnahuvvon olgobáikegoddelaš olbmos ja nubbi laktása Levi guovllu njoammumiidda. Gihttelis koronanjoammun lea gávnnahuvvon olbmos, guhte bargá turismasuorggis.

Ovdamearkka dihte Levi restoráŋŋain leat mearridan dahkat loahppavahkus joavkotestemiid, go dán suorggi bargiin leat gávnnahan máŋggaid koronanjoammumiid.

10.3. dii. 12.51 Rádjegávpi báhcan koronadoarjagiid olggobeallái

Lappi fitnodatdolliid ságadoalli Pirkko Salo lea fuolas dain fitnodagain, mat báhcet koronadoarjagiid olggobeallái. Okta ovdamearka dakkáris lea rádjegávpi. Salo mielde stáhta galggašii váldit atnui sierrakriteraid, mat válddáše vuhtii dákkár surggiid.

– Galggašii váldit vuhtii sierra lágan doaibmasurggiid. Suomas leat olu sesoŋgabarggut ja dát eai leat dásseveardásaččat eará fitnodatdoaimmaiguin. Lappis lea rádjegávpi, mii fas ii gávdno eará sajis Suomas. Dáid fitnodagaid galggašii váldit vuhtii, deattuha Salo.

Loga áššis eanet dáppe.

10.3. dii. 12.24 Ráđđehus gieđahallagoahtá fitnodagaid koronadoarjagiid boahtte vahkkus

Yle dieđuid mielde ráđđehus áigu gieđahallagoahtit jo boahtte vahkkus koronadoarjagiid juolludeami fitnodagaide, mat gillájit giddendoaimmain.

Doarjaga ulbmilin lea buhtadit fitnodagaide dáhpagiid, mat bohtet koronagiddendoaimmain. Restoráŋŋat, kafea ja bárat leat gitta čuovvovaš golbma vahkku njukčamánu 28. beaivve rádjái.

Loga áššis eanet dáppe.

10.3. dii. 8.00 Dikšobáikkit reahkkájit

Eai-hohpolaš divššut ovdánit Lappi guovddášbuohcceviesus dábálaš vuogi mielde.

Lappi buohccedikšunbire njunušdoavttir Jukka Mattila mielde ráiddut sierralágan doaibmabijuide leat dál juoba oanehabbot go ovddit giđain ovdal koronakriisa.

Maiddái koronabuohccit eai leat vel dahkan lassinoađi buohccevissui. Son maid muitala, ahte buohccedivššu dálá resurssat reahkkájit Lappi buohccedikšunbires.

10.3. dii. 8.00 Eai vel olgunjohtinráddjemat vuordimis

Suomas ii leat vel dárbu olgojohtinráddjemiidda, dajai sosiála- ja dearvvašvuođaministeriija kansliijahoavda Kirsi Varhila ikte Yle A-studio-prográmmas.

Stáhtaráđi kansliija goittot lea válmmaštallan olgojohtinráddjemiid ráđđehusa bivdagis. Dearvvasvuođa- ja buresbirgejupmelágádus THL lea ávžžuhan ásahit ráddjemiid vearrámus epidemiijaguovlluide.

9.3. dii. 16.37 Gihttelis guhtta njoammuma

Lappi buohccidikšunbires leat gávnnahan guhtta ođđa koronanjoammuma ja buot dát leat Gihttelis. Dáin vihtta leat gávnnahan restoráŋŋa- ja hoteallasuorggi bargiin ja ovtta olgobáikegoddelaš mátkkošteaddjis.

Koronavirusii buohccán bargit barget iešguđet fitnodagain Levis.

Infekšuvdnadoavttir Markku Broas dadjá, ahte čuoiganluomu dagahan njoammumat oidnojit vuosttamužžan mátkeealáhusa- ja restoráŋŋasuorggi bargiin. Loga áššis eanet dáppe.

9.3. dii. 13.37 Badjel 80-jahkásaččain boahkuhusa lea ožžon guokte golmmas

Dearvvašvuođa- ja buresveadjinlágádus THL dieđuid mielde badjel 80-jahkásaš suopmelaččain boahkuhusa koronavirusa vuostá lea ožžon 65,3 proseantta, mii lea sullii guokte goalmmátoasi.

Olles álbmogis vuosttaš boahkuhusa lea ožžon vádjit ovcci proseantta. Goappaš boahkuhusaid lea ožžon 1,5 proseantta álbmogis.

9.3. dii. 12.27 Norgga koronadilli manná heajut guvlui

Norgga stáhtaministtar Erna Solberg ávžžuha olgoriikkain ássi norgalaččaid guođđit beassášluopmomátkki ruovtturiikii dágakeahttá korona dihte, muitala NRK. Solberg ánuha maid norgalaččaid bissut ruovtturiikkas basiid áigge. Stáhtaministtar ii vel otne almmuhan ođđa ráddjemiin, váikko máŋgasat dan vurde.

Norgga riikkarádio NRK lea rehkenastán, ahte Norggas leat koronanjuolggadusat rievdaduvvon jagi siste badjel 40 gearddi. Danin olbmot eai šat riekta dieđe, makkár njuolggadusat goas leat fámus.

Vaikko Norggas lea buoret koronadilli go Ruoŧas, njoammunlogut goit loktanit. Earenomáš váttis dilli lea Oslo guovllus, gos ikte registrerejedje badjel 300 njoammuma ja olles riikkas badjel 800 njoammuma.

9.3. dii. 10.55 THL ávžžuha váldit atnui johtinráddjehusaid

Dearvvašvuođa- ja buresbirgejumi lágádus THL ávžžuha ráđđehusa álggahit doaimmaid olgunjohtima ráddjemii. Dušše vealtameahttun olgunjohtin livčče lobálaš nugo maid iežas lágaš olbmuiguin olgun váccašeapmi livčče lobálaš.

Olgunjohtinráddjemiidda stuorámus dárbu lea oaivegávpotguovllus, gos koronadilli lea buot vearrámus. Ráddjen livčče álggos fámus golbma vahku ja dan livčče vejolaš ráddjet guoskkat dihto guovlluid.

Ášši sáhttá leat juo ihttin gaskavahku ovdan ráđđehusa čoahkkimis.

8.3. dii. 7.30 Ipmilbálvalusat streamejuvvojit

Sámeguovllu searvegottit dollet ipmilbálvalusaid guoros girkuin, go fámus lea Lappi guovlohálddahusa gielddus eambo go guđa olbmo čoahkkaneamis. Mearrádus lea fámus 28. beaivvi rádjai.

Nu Ohcejoga, Anára, Soađegili go Eanodaga searvegottiin ipmilbálvalusat streamejuvvojit.

Soađegili searvegottis maid muittuhit, ahte juos girkolaš dáhpáhusat dahje bearašdáhpáhusat lágiduvvojit, ferte vuhtiiváldit dán čoahkkananráddjehusa.

Buot searvegottiin maid eará doaimmat bissehuvvojit. Ohcejogas goit jotket liigeborramušaid juohkima.

8.3. dii. 16.15 Koronanjoammumat geahppánan Lappis

Lappi buohccidikšunbires gávnnahedje mannan vahkuloahpa oktiibuot guhtta koronanjoammuma. Njoammumiin guokte ledje Gihttelis olgobáikegoddelaš olbmuin ja njeallje fas Roavenjárggas.

Vuossárgga njommumat gávdnojedje guokte; okta Gihttelis mátkkálaččas ja okta Roavenjárggas.

Lappi buohccidikšunbire infekšuvdnadoavttir Markku Broas muitala, ahte maŋemuš vahkkuid áigge koronanjoammumat leat geahppánan Lappis.

Vahkkus čieža Lappi buohccidikšunbires gávnnahedje 52 njoammuma ja vahkkus gávcci 41. Mannan vahkkus njoammumat ledje oktiibuot 30.

8.3. dii. 12.59 Restoráŋŋat gitta golmma váhkui

Riikabeaivvit lea dohkkehan láhkaárvalusa, mii gidde restoráŋŋaid golmma váhkui.

Dásseválddi presideantta vurdet nannet lága vel maŋŋeleappos odne.

Restoráŋŋaid gidden guoská 15 eanangotti Suomas. Dušše Davvi-Savos, Davvi-Gárjilis, Kainuus ja Gaska-Davvibađaeatnamis restoráŋŋaid uvssat bissot rabas.

Váikko eanas restoráŋŋat giddejitge uvssaidis, de biepmu lea goit vejolaš viežžat fárrui. Restoráŋŋaid gidden álgá ihttin 9.3. ja dat bisttá njukčamánu 28. beaivve rádjái.

8.3. dii. 12.19 Anára ja Soađegili rávesolbmuid skuvllaid oahpahus gaskkalduvvá

Koronaepidemiija dihte Anára ja Soađegili gielddaid rávesolbmuidskuvllain buot badjel 16 jahkásaččaid gursadoaimmat bissehuvvojit lágaš vahkuide. Anáris rávesolbmuid skuvlla doaibma bissehuvvo juo otne ja dat bistá dán mánu 28. beaivvi rádjai goassášii olles Suomas lea nu gohčoduvvon giddendilli.

Dan sadjái nuorabuid joavkodoaimmat joatkašuvvet, nugo maid lagašoahpahus ja dakkár gurssat, main hávil lea dušše okta oahppi, dego lávlun ja čuojaheapmi.

Maiddái Soađegili gielddas Revontuli-oahppolágádus gaskkalduhttá buot badjel 16-jahkásaččaid gurssaid njukčamánu 28. beaivvi rádjai. Nuorabuid joavkkut goit jotket doaimmas ja lagašoahpahus joatkašuvvá maid dakkár oahpuin, gos báikki alde lea dušše okta gursalaš hávil.

Oahppolágádus goit geatnegahttá buohkaid badjel 12-jahkásaččaid geavahit máskka.

8.3. dii. 08.00 Restoráŋŋat gitta?

Riikkabeivviin vurdojuvvo otne mearrádus restoraŋŋaid giddemis.

Ráđđehus evttohii vahku dassái, ahte buot restoráŋŋat ja kafeat giddejuvvojit golmma vahkkui daid guovlluin, main koronavirusepidemiija lea leavvananmuttus dahje ovdáneamin leavvananmuddui.

Maiddái Lappi gullá dáid guovlluide. Gidden guoskkašii buotlágan restoráŋŋaid ja kafeaid. Borramuša olggosvuovdin goittot livčče vejolaš.

8.3. dii. 07.55 Suomas álggii giddendilli

Suomas álggii otne nu gohčoduvvon giddendilli ja dat bistá golbma vahku dán mánu 28. beaivvi rádjái.

Lappi buohccedikšunbires leat geavahusas koronavirusepidemiija oasil čávgasut ráddjemat, vaikke bires epidemiija lea dál ovdánanmuttus.

Čávgasut ráddjemat gusket buot daid guovlluid, main epidemiija lea leavvananmuttus.

Lappi guovlohálddahusdoaimmahat lea mearridan, ahte badjel 6 olbmo čoahkkaneamit leat gildojuvvon

6.3. dii. 13.01 Vuoigatvuođaministeriija: Gielddaválggat sirdásit geassemánnui

Vuoigatvuođaministeriija muitala Twitteris, ahte bellodagaid bellodatčállit leat soahpan lávvardaga čoahkkimis, ahte gielddaválggat sirdojuvvojit geassemánu 13. beaivái. Álgoálggus válggaid galge doallat cuoŋománu 18. beaivve.

Válggaide guoski mearrideames leat dábálaččat geahččalan gávdnat ovttamielatvuođa. Dán deattuhedje maiddái ovdal lávvardaga čoahkkima. Loahpaloahpas dušše vuođđosuopmelaččat vuostálaste válggaid sirdima ja sii ledjege almmuhan juo ovddalgihtii vuostálastimis. Loga dáppe lasi áššis.

Helsingin Sanomat -aviissa mielde gielddaválggaid sirdimii váikkuhii koronavirus dili šaddan vearrábun. Vuoigatvuohtaministeriija lea vihkkehallan, ahte livčče leamaš stuorra riskkat doallat válggaid ccuoŋománus. Ministeriija mielde geassemánus riskajoavkkuid leat juo geargan boahkuhit.

Bellodatčállit ja vuoigatvuođaministeriija ovddasteaddji čoahkkimaste áššis lávvardaga. Mearrádus válggaid sirdimis gáibida velá láhkanuppástusa ja riikkabeivviid dohkkeheami.

5.3. dii. 15.00 Riikkabeaivvit gieđahallet gearggusvuođalága paragráfaid boahtte vuossárgga

Stáhtaráđđi lea mearridan evttohit riikkabeivviide njealji gearggusvuođalága paragráfa geavahussii váldima.Vuossárgga riikkabeivviin gieđahallagohtet gearggusvuođalága 86, 88, 106 ja 107 paragráfaid fápmui váldima.

Paragráfat gusket earret eará sosiála- ja dearvvašvuođabálvalusaid ordnema mearreáiggiid ja stáhta eiseválddiid dieđiheami ja eiseválddiid gaskasaš doaibmaválddi koronadilis.

5.3. dii. 7.55 Deanu sámesearvvit cealkán koronaráddjehusain

Sámi siida ja Deanu sámiid searvi gáibidit Norgga eiseválddiid váldit buorebut vuhtii Deanuleagi ássiid dili. Norga lea plánen joatkit gaskaboddosaš lága olgoriikkalaččaid riikii johtinráddjehusain dán jagi lohppii koronavirusdili dihte.

Sámi siida ja Deanu sámiid servviid mielas njoammuneastadandoaimmaid galgá buorebut heivehit sápmelaččaide ja namalassii rádjeguovllu ássiide. Sii háliidit maid, ahte Suoma ja Norgga eiseválddit gulahalašedje buorebut.

Loga olles dárogielat cealkámuša dáppe.

5.3. dii. 7.53 AVI geatnegahttá Lappi doibmiid sihkkarastit dorvogaskkaid ollášuvvama

Lappi guovlohálddahusdoaimmahat AVI geatnegahttá buot Lappi buohccedikšunbiire guovllu sierra doibmiid sihkkarastit, ahte lagaškontávttaid buot báikkiin sáhttá garvit. Mearrádus guoská omd. priváhta ealáhushárjeheddjiid, servošiid, gielddaid ja álmmolaš lágádusaid.

Dorvogaskkaid ferte basttit dáhkidit siste jus leat badjel logi olbmo ja olgun, jos leat badjel 50 olbmo. Lappi guovlohálddahusdoaimmahat gáibida doibmiin girjjálaš plána lagaškontávttaid eastadeapmái. Jus doaimma ii sáhte ordnet ráddjehusaid mielde, báikki ii sáhte geavahit.

4.3. dii. 14.49 Eanas Lappi njoammumat láktasit mátkkošteapmái

Lappi buohccidikšunbires leat gávnnahan vihtta ođđa koronavirusnjoammuma. Golbma dáin leat Roavenjárggas, okta Gihttelis ja okta Pelkosenniemis.

Lappi buohccidikšunbire infekšuvdnadoavttir Markku Broas mielde measta buot dán vahkku njoammumat láktasit mátkkošteapmái.

Dán vahkkus Lappi buohccidikšunbires leat gávnnahan oktiibuot 19 njoammuma.

Lappi buohccidikšunbire dieđiha, Gihttela Levis leat olbmot sáhttán šaddat njoammunáitaga vuollái mannan vahkkus, jus leat galledan Bar Ihkus gaskavahkko 24.2. dii 20.30–21.30 dahje leamašan Hotel Levi Spa iđitbiepmus 27.2. dii 9–9.30.

Daid olbmuid, geat leat guovllus johtán, bivdet čuovvut dávdamearkkaid ja ohcalit teasttaide unna váttuinge.

4.3. dii. 11.43 Koronadilli vearrámus dásis olles epidemiija áigodagas

Suomas leat gávnnahan maŋemuš guovtti vahkku áigge ođđa koronanjoammumiid mealgadit eanet go ovdal. Njoammunmearit leat lassánan jođánit ráddjehusain fuolakeahttá. Vássán vahkku áigge njoammumiid leat gávnnahan eanemus olles epidemiija áigge.

Dearvvašvuođa- ja buresveadjinlágádus THL ávžžuha dál váldit garrasut doaimmaid atnui, vai koronadili ožžot ráfut.

Maŋemuš guovtti vahkkus ođđa njoammumat leamašan badjel 7 400, mii lea lagabui 2 300 njoammuma eanet go ovddit vahkkuin.

3.3. dii. 16.54 Ohcejoga skuvllat jotket lagasoahpahusas

Ohcejoga sámelogahat ja vuođđooahpahusa badjeluohkát jotket lagasoahpahusas.

Lappi guovllu koronakoordinerenjoavku oaivvilda, ahte badjeskuvllaid sirdimii gáiddusoahpahussii eai leat dán dilis ákkat. Dat, man stuorra riska epidemiija leavvamii lea nuppi dási oahppolágádusain, lea gitta gieldda dilis.

Ohcejoga gielda lea dahkan mearrádusaid gieldda dávdadili vuođul. Gielda čuovvu dili ja gieđahallá ášši dárbbu mielde ođđasis.

3.3. dii. 7.01 Ráđđehus válmmaštallamin Supmii olgunliikadangildosa

Juos Suoma koronadilli ain vearrána, Supmii lea vejolaš ásahit olgunliikadangildosa vearrámus guovlluide. Maiddái mátkoštangielddus dihto guovlluid gaskkas lea vejolaš.

Mediadieđuid mielde ráđđehus lea vihkkehallamin vejolaš lassiráddjemiid, juos beaivenjoammumiid mearri manná badjel duháha. Olgunliikadangildosa livčče vejolaš ásahit maid dušše dihto báikegottiide ja dihto áiggiide.

Loga áššis eambbo suomagillii dáppe.

3.3. dii. 6.57 Njuorggámis ordnejit koronatestema dán vahkus

Njuorggáma boares skuvllas (gievkkan bealde) lea vejolaš válddihit koronateastta čuovvovaččat:

gaskavahkku 3.3.2021 dmu 14-18

duorastaga 4.3.2021 dmu 14-18

bearjadaga 5.3.2021 dmu 8-11

Ohcejoga gielda dieđiha áššis iežas sosiálamedia kanálain.

2.3. dii. 17.24 Suoločielggis galledan olbmuin gávnnahuvvon británnialaš koronavariánta

Suoločielggi čierastallanbáikkis ja restoráŋŋa Pilkkus leat johtán koronavirusii buohccán olbmot. Sii leat johtán doppe 22.-24.2.2021 gaskasaš áigge ja leat sáhttán njoammudit earáide británnialaš koronavariántta. Sin, geat leat guovllus johtán, bivdet čuovvut dávdamearkkaid ja ohcalit teasttaide unna váttuinge.

Loga dás Anára gieldda dieđáhusa áššis.

2.3. dii. 16.18 Lappi badjeskuvllat eai dárbbašge sirdásit gáiddusoahpahussii

Lappi vuođđoskuvllaid badjeluohkát eai dárbbaš sirdásit gáiddusoahpahussii. Lappi guovloeiseváldi AVI ja Lappi guovlolaš koronajoavku leat mearridan odne maŋŋebárgga, ahte badjeskuvllaid ii leat dárbu sirdit gáiddusoahpahussii, dasgo epidemiija leavvanriska lea nu unni.

Koronajoavku ávžžuha gielddaid ieš mearridit, ahte sirdetgo nuppi dási oahppolágádusaid gáiddusoahpahussii, dasgo epidemiija dássi ja leavvanriska rievddada gielddaid mielde.

Anára gieldda čuvgehusdoaibma dieđiha, ahte badjeskuvllat bissot lagasoahpahusas. Avvila logahat sirdása gáiddusoahpahussii guovtti vahkkui čuoiganluomu maŋŋá, nugo lei plánejuvvon.

2.3. dii. 15.44 Lappi buohccidikšunbires leat gávnnahan 12 ođđa njoammuma

Lappi buohccidikšunbires leat gávnnahan oktiibuot 12 ođđa koronavirusnjoammuma. Dáin gávccis gávdne Gihttelis olgobáikegoddelaš olbmuin.

Njoammumiin golbma ledje Roavenjárggas ja buohccán olbmot ledje buohkat báikegoddelaččat. Kolaris gávnnahuvvui okta njoammun.

Maŋemus guovtti vahku áigge dušše bealli koronavirusnjoammumiin leat gávnnahuvvon lappilaččain ja báikki olbmuin. Čuoiganluopmoturisma dagahage garra deattu Lappi buohccidikšunbires.

2.3. dii. 7.22 Badjel guđa olbmo čoahkkaneamit gildojuvvon Lappis

Lappi guovlohálddahusdoaimmahat gieldá Lappi buohccedikšunbiire gielddain buot siste ja olgun ordnejuvvon álbmotdilálašvuođaid ja almmolaš čoahkkimiid, maidda oasálastet badjel guhtta olbmo. Mearrádus lea fámus 2. - 28.3.2021.

Koronaepidemiija lea vearránan maid Lappis maŋimuš áiggiid earet eará dálveluomuid dihtii. Danin čoahkkanráddjehusaid čavgen lea doaimmahaga mielde vealtameahttun oassin epidemiija eastadeamis.

1.3. dii. 13.18 Spiehkastatdilli fápmui Suomas

Stáhtaráđđi lea mearridan spiehkastatdili fápmui Suomas otnáža rájes. Stáhtaministtar Sanna Marin mielde stáhtaráđđi lea ovttas presideanta Sauli Niinistöin gávnnahan, ahte Suopma lea dál spiehkastatdilis.

Stáhtaministtar Marin sávvá, ahte suopmelaččat válddáše koronadili duođas, geavahivčče máskkaid ja doalaše gaskkaid, amas dávda njoammut servodagas eanet.

– Juohkehaš sáhttá váikkuhit dasa, makkárin giđđa ja geassi šaddá, dadjá Marin.

1.3. dii. 6.31 Bákkolaš testen álgá Lappi guovllus riikkarájiin

Bákkolaš testen Norgga ja Ruoŧa vuostásaš rájiin Lappi guovllus álgá odne.

Lappi guovlohálddahusdoaimmahat mearridii bearjadaga, ahte gielddat leat geatnegahtton ordnet dearvvášvuođadárkkistusaid ráji rasttildeaddjiide. Mearrádus lea fámus njukčamánu lohpii. Jus teasttas biehtada, sáhttá sivahallojuvvot dearvvášvuođarihkkomušas ja sahkkohallot dahje juobe gártat giddagassii golbma mánnui.

Olmmoš, guhte biehtada teasttas, sáhttá mearriduvvot karantenii, jus su navdet koronabuohccin.

Yle čálii áššis suomagillii bearjadaga.

26.2. dii. 17.06 Roavvenjárggas Vaaranlampi skuvllas 66 olbmo erremii

Roavvenjárggas Vaaranlampi skuvlla oahppis gávnnahuvvui odne bearjadaga koronanjoammun. Dan dihte oktiibuot 66 oahppi ja bargi leat biddjon erremii guovtti vahkkui.

Njoammunáitaga vuollái leat gártan skuvllas dán vahku maŋŋebárgga ja duorasta gaskasaš áigodagas.

26.2. dii. 16.27 Lappi buohccedikšunbire guvlui lasi ávžžuhusat

Lappi buohccedikšunbire lea ain nu gohčoduvvon epidemiija ovdánandilis, muhto lassánan mártkkošteaddjimeriid, virusvariántta ja njoammunriskka dihte guovllus váldet geavahussii leavvanmuttu ráddjehusaid ja ávžžuhusaid.

Odne čoahkkanan guovllu koronadili koordinerejeaddji bargojoavku ávžžuha, ahte nuppi dási oahppolágádusat ja allaskuvllat livčče gáiddusoahpahusas čuouganluomuid maŋŋá guokte vahku 15.–28.3. Studeantačállimat dikšojuvvošedje dábálaččat.

Maiddái gáiddusbargui sirdašuvvama ávžžuhit, jus dat lea vejolaš. Máskkaid geavaheapmi lea fámus árat ávžžuhusaid mielde buohkaide badjel 12-jahkásaččaide siste, gos gaskkaid ii sáhte doallat. Badjel 16-jahkásaččaid joavkoastoáiggedoaimmat, mat leat siste, leat ain gaskkalduvvon.

Seammás muittuhit gaskkain, giehtahygieniijas, buhtisvuođas ja máskkaid geavaheamis. Maiddái persovdnajohtolagas ávžžuhit máskkaid geavaheami.

Koordinerejeaddji joavku ávžžuha lassin, ahte badjel guđa olbmo priváhta čoahkkanemiid galggašii garvit.

26.2. dii. 16.00 Lappis vihtta ođđa koronanjoammuma

Roavvenjárggas leat gávnnahan odne bearjadaga guokte ođđa koronavirusnjoammuma. Gihttelis lea okta njoammundáhpáhus, Pellos okta ja Kolaris okta.

26.2. dii. 15.01 NRK Sápmi: Suoma ja Ruoŧa guovllu ássit besset fas Norgii bargui

Norgga ráđđehus dieđihii odne preassadieđáhusas, ahte rájá besset rasttildit fas sii, geat barget Norggas, muhto ásset Suomas dahje Ruoŧas. Rievdadus boahtá fápmui vuossárgga čuovganeapmái njukčamánu 1. beaivve. Áššis muitala NRK Sápmi.

26.2. dii. 12.40 Restoráŋŋaid ráddjehusat joatkašuvvet

Suoma presideanta lea nannen lága, mainna jotket restoráŋŋaid ráddjehusaid. Ráddjehusat joatkašuvvet gitta geassemánu 30. beaivvi rádjai.

Láhka guoská geavadis dan, ahte restoráŋŋat galget ain čuovvut hygieniijagáibádusaid ja fuolahit áššehasaid gaskkaid doallamis.

Stáhtaráđđi lea addán maid ođđa ásahusa, mainna ráddjejit restoráŋŋaid doaimmaid koronaepidemiija dihte. Restoráŋŋat galget fuolahit gaskkain vel beaktilabbot ja restoráŋŋat galget olles riikkas ordnet doaimmaid nu, ahte áššehasat stivrejuvvojit čohkkánsajiide.

Restoráŋŋain ii leat maiddái lohpi suovvat olbmuid dánsut dahje ovdanbuktit karaoke.

Lappi eanangotti restoráŋŋain alkohola vuovdin lea lobálaš diibmu 7.00–22.00. Restoráŋŋa, gos alkohola vuovdin lea váldodoaibma oažžu leat rabas diibmu 24.00–23.00. Eará restoráŋŋat ožžot leat rabas diibmu 01.00–24.00.

Ásahus boahtá fápmui njukčamánu 1. beaivve ja dat lea fámus geassemánu 30. beaivvi rádjai.

Áššehasaid čohkkánsajiide stivrema geavadat váldojuvvo geavahussii easkka bearjadaga njukčamánu 5. beaivvi rájes.

26.2. dii. 7.50 Čavgasut koronaráddjemiin mearriduvvo juo otne?

Jáhkkimis juo otne Lappi eanangotti oasil mearriduvvo čavgejuvvon koronaráddjemiin. Guovllu koronadili koordinerejeaddji bargojoavku čoahkkana dál iđedis ságastallat ráđđehusa ievttá mearrádusain bidjat eanangotti nu gohčoduvvon giddenmuddui korona dihte.

Lappi buohccedikšunbire ávžžuhit dalán váldit atnui čavgasut koronaráddjemiid, vaikko epidemiija lea easka ovdánandilis. Dan goit ballet jođánit nuppástuvvat leavvananmuddui ja danin maid leavvananmuttu njuolggadusat galget atnuiváldojuvvot.

Maiddái Länsi-Pohja buohccedikšunbire ávžžuhit čavget ráddjemiid.

25.2. dii. 16.15 Lappi buohccedikšunbires guhtta ođđa njoammuma

Lappi buohccedikšunbires leat odne gávnnahan guhtta ođđa koronanjoammuma. Golbma dain leat Roavvenjárggas, guokte gihttelis ja okta Kolaris.

Gihttela njoammun ja okta Roavvenjárgga njoammun lea gávnnahuvvon olgobáikegottálaččas.

25.2. dii. 14.52 Gielddaválga jáhkkimis čađahuvvo – Válggaide evttohit 1,3 miljon euro lasseruhtadeami

Dán giđa Suomas galggašedje ordnet maiddái gielddaválggaid. Ráđđehusa mielde áššis ii leat dahkkon vel sierra mearrádus. Válggaid ordnemii evttohit 1,3 miljon euro lassemearreruhtadeami sihkkarastin dihte válggaid dorvvolaš čađaheapmái.

Riekteministtar Anna-Maja Henriksson muitala, ahte gielddaválggaid birra ságastallet vel bellodatčálliiguin. Gielddaválggaid guoskevaš mearrádusat dahkkojuvvojit parlamentáralaččat.

– Koronadili dagahan ordnedallamat gáibidit eambo válgabargiid jienasteami oktavuođas. Maiddái ruovttus jienasteapmái dárbbašat mealgadit lasseresurssaid. Dasa lassin dárbbašat jienastanbáikkiide laktáseaddji čovdosiid ja fertet háhkat dorvogárvvuid. Lassemearreruđa ulbmilin lea sihkkarastit, ahte válgga sáhttá ordnet dorvvolaččat spiehkastatdilis, čilge Henriksson.

25.2. dii. 14.40 Presideantta: Buot eastadanvugiid dárbbu ferte árvvoštallat

Suoma presideantta Sauli Niinistö mielde koronadilli lea vearránan nu issorasat oanehaš áiggis, ahte buot vejolaš eastadanvugiid dárbbu ferte árvvoštallat. Son lohká, ahte ain jo spiehkastatdili birra lea dál oktasaš áddejupmi.

Ráđđehusa doaibmaváldái gullá árvvoštallat, leago dárbu spiehkastat doaibmanváldái. Dat oaivvilda geavadis gearggusvuođalága dahje vuođđolága 23 paragráfa geavaheami.

Ná presideantta vástida STT:i šleađgapoastta bokte:

– Lean loahppajagis dadjan almmolaččat ja maiddái ráđđehussii sierra, ahte epidemiija dálá dilli deavdá spiehkastatdili mearkkaid. Lean maiddái árat dorjon áššedovdiid, geat leat deattuhan eastadeami mearkkašumi. Dál dávdadilli lea vearránan issorasat jođánit, de galgá árvvoštallat visot eastadanvugiid. Lean ádden, ahte ráđđehus dahká ná.

Gáldu: STT

25.2. dii. 12.04 Suomas sirdásit spiehkastatdillái

Suomas áigot sirdásit spiehkastatdillái boahtte vahkus. Dehálamos sivva spiehkastatdili atnuiváldimii lea restoráŋŋaid doaimma ráddjen.

Stáhtaráđđi ii goittotge vel váldde atnui gearggusvuođalága (su. valmiuslaki) dahje dan ásahusaid. Spiehkastatdillái sirdáseapmi dahká vejolažžan váldit lága atnui dalán go oidnet dasa dárbbu.

25.2. dii. 11.10 Kiuru: Lappi logut eai muital duohtavuođa guovllu ollislaš dilis

Bearaš- ja bálvalusministtar Krista Kiuru hálai duorastatiđida dieđihandilálašvuođas Lappi dilis.

Su mielde Lappi logut eai muital makkár dilli iešalddes davvin duođas lea, go dál Lappis lea olu olmmoš eará guovlluin. Dan dihte Lappi ollislaš dilli ii čielgga dáid loguin. Lappis árvalit koronanjoammumiid leat mearkkašahtti olu eambo go maid statistihkat muitalit

Hástalussan lea čuožžilan maiddái dat, ahte koronavirus lea njoammumin álbmogii ja dat lea duođalaš áitta. Kiuru deattuha, ahte eai hálit Lappis virusvariánta ja dábálaš virus vearránit vel eambbo. Kiuru jáhkká, ahte Lappis maid nu gohčoduvvon stáhtusa árvvoštallet pandemiijajoavkku doaimmas. Hybridastrategiija dássái sirdašupmi lea aiddo Dearvvašvuođa- ja buresveadjinlágádusa THL árvaleami vuolde. Lappi dilis leat diđolaččat ja dasa háliidit čovdosiid.

25.2. dii. 11.00 Ráđđehus evttoha restoráŋŋaid giddema

Ráđđehus ovdanbuktá Suoma riikkabeivviide evttohusa restoráŋŋaid giddemis. Dat guoská dušše daid guovlluid, gos leat epidemiija leavvanmuttus dahje vearráneamen leavvanmuddui. Lappi lea dál leavvanmuttus.

Restoráŋŋat sáhtášedje goittotge vuovdit borramuša olggos.

Stáhtaministtar Marin lohká, ahte stáhta boahtá buhtadit fitnodatdolliide restoráŋŋaid giddema dagahan goluid.

Restoráŋŋaid ii sáhte goittotge giddet normála lágaid vuođul, baicca dat gáibidivččii vuođđolága 23 paragráfa geavaheami nappo sirdáseami spiehkastatdillái. Spiehkastatdillái sirdásit boahtte vahkus.

Dievasmahtton dii 11.49 dieđuin, ahte spiehkastatdillái sirdásit boahtte vahkus.

25.2. dii. 10.16 Badjel guđa olbmo čoahkkaneamit gildojuvvojit

Guovlluin, mat leat leavvanmuttus, čavgejit maiddái čoahkkananráddjehusaid. Badjel guđa (6) olbmo čoahkkaneamit leat gildojuvvon 8.3. rájes.

Leavvanmuttus leahkki guovllut leat Lappi, Helsset ja Uusimaa, Varsinaissuomi, Satakunta, Kanta-Häme, Vaasa ja Ålánda.

Ođđa ráddjehusaid ávžžuhit maiddái daidda guovlluide, gos dilli lea vearráneamen leavvanmuddui.

25.2. dii. 10.02 Suopma čávge koronaráddjehusaid

Suoma ráđđehus dieđihii duorastatiđit, ahte Suomas giddejit daid guovlluid, gos epidemiija lea leavvanmuttus. Gidden álgá njukčamánu 8. beaivve ja dat bistá njukčamánu 28. beaivvi rádjai. Lappi gullá daidda guovlluide.

Dat oaivvilda dan, ahte dáin guovlluin váldet atnui dálá doaimmaid lassin maiddái gáiddusoahpahusa nuppi dásis ja vuođđooahpahusa badjeluohkkáin. Dasa lassin badjel 12-jahkásaččaid joavkoastoáiggedoaimmat gaskkalduvvojit.

Studeantačállimiid dorvvolaš ordnema leat sihkkarastimin.

Stáhtaministtar Sanna Marin lohká maid, ahte stáhtaráđđi lea gárvvis álggahit spiehkastatdili ovttas Suoma presideanttain. Marin lea ságastallan áššis presideantta Sauli Niinistöin.

25.2. dii 8.15 NRK Sápmi: Norgga ráját bissot gitta

Norgga ráđđehus ii áiggo rahpat riikarájáid, muitala NRK Sápmi. Riekteministtar Monica Mæland čilge, ahte olgoriikkaid alla njoammunloguid ja molsašuvvan virusvariántta dihte ii leat vejolaš ráhpat rájá eambbo.

Diehtu bođii ovdan ráđđehusa ievttá preassakonferánssas. Norgga ráđđehusa ovddit mearrádusa mielde ráji rasttildan ráddjehusat livčče galgan geahpput 28.2 rájes.

25.2 dii. 7.45 Koronačavgemiin dieđihit dál iđitbeaivve

Ráđđehus áigu otne ásahit Supmii spiehkastatdili koronavirusepidemiija vearráneame dihte. Yleisradio dieđuid mielde dasa lea dárbu vai basttet rádjet restoráŋŋaid doaimma.

Riikkabeivviid sosiála- ja dearvvasvuohta váljagotti ságajođiheaddji Markus Lohi dajai ikte eahkedis Yle a-studio- prográmmas, ahte restoráŋŋaid livčče vejolaš giddet maid dán nu gohčoduvvon gárvvisvuođalága hága.

Ulbmilin lea ráddjet restoráŋŋaid doaibmama áŋgge vearrámus dávdaguovlluin. Giddemin restoráŋŋaid ulbmilin lea geahpedit njoammumiid vai buohccedivššu báikkit reahkkájit.

Vejolaččat mearrádusat čavget maid máskkageavaheame ja gáiddusoahpahusa- ja barggu oasil.

Ráđđehusa dieđihančoahkkin álgá dii 9.25 ja dan lea vejolaš čuovvut Yle sáddagiin neahtas, TV:s ja radios.

24.2. dii. 16.29 Anáris koronatestemat leat lassánan

Dálveluomuide laktáseaddji koronanjoammumat čilget áramustá boahtte vahkus, go dál dálveluopmovahkku lea easkka beallemuttus. Koronatestemat leat goittot juo lassánan. Go mannan vahkus Anáris testejedje moaddelot olbmo beaivvis, de vuossárgga rájes testemat leamašan jo badjel 50 beaivvis.

Anára jođideaddji doavttir Outi Liisanantti muitala, ahte oassi lea boahtán testii konrolla dihtii go lea šaddan njoammunáitaga vuollái, oassi fas lea boahtán nurvo dahje eará dávdamearkkaid dihtii.

Loga lasi dán áššis suomagillii dáppe.

24.2. dii 15.30 Ålanddas ja Lappis eanemus boahkuhuvvon olbmot

Suomas leat dassážii ožžon vuosttaš koronavirusboahkuheami oktiibuot 302 342 olbmo. Dat lea birrasiid 5,5 proseantta olles álbmogis. Eanemusat boahkuhemiid leat ožžon badjel 80-jahkásaččat, go sis badjel 40 proseantta leat jo boahkuhuvvon goit oktii.

Buohccidikšunbiriin eanemus olbmot leat boahkuhuvvon Ålanddas ja Lappis. Dáin guovlluin juo measta juohke logát olmmoš lea ožžon koronavirusboahkuheami.

24.2. dii 14.25 Lappi buohccidikšunbires vihtta ođđa njoammuma

Lappi buohccidikšunbiire guovllus gávnnahedje gaskavahkko vihtta koronanjoammuma. Njoammumiin guokte gávnnahuvvojedje Pelkosenniemi Pyhätunturis, guokte Kolaris ja okta Soađegili Luostos.

Dasa lassin testemiin gávdne ovtta ođđa koronavirusvariántta. Oktiibuot virusvariántadáhpáhusaid leat gávdnan Lappi buohccidikšunbires logi.

24.2. dii 13.10 Sámi oahpahusguovddáš sirdása gáiddusoahpahussii

Sámi oahpahusguovddáš Anáris sirdása gáiddusoahpahussii maŋemustá njukčamánu 1. beaivve rájes. Skuvlla dieđáhusa mielde muhtin skuvlensuorggit sirdásit gáiddusoahpahussii jo dán vahku áigge.

Sámi oahpahusguovddážis gáiddusoahpahus joatkašuvvá gitta njukčamánu 28. beaivve rádjái.

24.2 dii. 10.15 Sámi Soster- searvi gaskkalduhttá buot čoahkkanemiid 14.3 rádjai

Sápmelaččaid sosiála- ja dearvvašvuođasuorggi searvi Sámi Soster gidde buot čoahkkananbáikkiid njukčamánu 14. beaivvi rádjai.

Searvvis leat čoahkkananbáikkit buot sámeguovllu gielddain ja eiseválddiid rávvagiid mielde searvvi joavkodoaimmat ja vuollegaš šielmmá deaivvadanbáikkit giddejuvvojit. Sivvan lea koronaepidemiija.

Vuohčus giddenmearrádus guoská Mokta-viesu, Anáris searvvi doaibmaviesu, Ohcejogas čoahkkananbáikkiid Gáregasnjárggas, Ohcejohnjálmmis ja Njuorggámis, ja Eanodagas Luovatupa.

Searvvi bargit goittot fitnet deaivvadeamen olbmuid dárbbu mielde ja bargiide fidne oktavuođa juogo telefovnnain dahje e-mailla bokte.

24.2 dii. 8.30 Koronastrategiija čavgemis mearriduvvo otne?

Lappi eanangotti koronaepidemiijadilli soaitá leat vearrát go maid dihtet. Maiddái Uusimaa eanangotti dilli lea ain vearráneamen. Ráđđehus mearrida otne sirdašuvvamis koronastrategiijas dássái guokte dáid eanangottiid oasil.

Bargo- ja buresveadjimalágádus THL ávžžuha čavget koronastrategiija earret eará Mátta-Suoma vearrás dili dihte.

Lappi oasil dili dahká váttisin dat, go njoammudávddaidregisttariin eai oadno olgobáikegoddelaččaid njoammumat. Koronastrategiijas dássi guokte oaivvilda, ahte dihto ávžžuhusat nuppástuvvan mearrádussan ja lassiráddjemat maid leat vuordimis.

Mearrádusat gusket ovdamearkan máskkageavaheame ja gáiddusoahpahusa- ja barggu. Juos dássái golbma šaddet mannat, dalle leat maid mátkkoštanráddjemat Suoma rájáid siskkobealde vejolaččat.

23.2. dii. 16.58 Lappi rádjegozáhus: Suoma čađa Norgii vuodjin ii leat šat vejolaš ihttá rájes

Lappi rádjegozáhus dieđiha, ahte Suoma čađa ii beasa šat vuodjit Norgii ihttá rájes. Suoma čađa sáhtii vuodjit dan dihte, go E6-geaidnu lei steaŋggas Romssa ja Álttá gaskkas muohtauđasvára ja heittot siivvu dihte. Dál Norgga virgeoapmahaččain boahtán dieđu mielde E6-geaidnu lea fas rabas Álttá ja Romssa gaskkas.

Nuba gaskavahku 24.2. rájes Suoma bokte Norgii vuodjin ii leat šat vejolaš. Jus fal muohtadilli váikkuha ođđasit geainnuide, de Lappi rádjegozáhus dieđiha áššis ođđasit.

23.2. dii. 13.59 Lappi koronanjoammunlogut loktaneamen

Lappi koronanjoammunlogut leat loktaneamen árat mánotbajiid ektui, muitala Lappi buohccedikšunbire bajit infekšuvdnadoavttir Markku Broas. Njoammunmearit loktanišgohte juo mannan vahkus.

Lappi buohccedikšunbire guovllus leat gávnnahan odne ovcci ođđa koronanjoammuma.

Golbma njoammuma leat Roavvenjárggas, golbma Kolaris, okta Pellos, okta Gihttelis ja okta Pelkosenniemi Pyhätunturis.

Vel ii leat čielggas, leago dáid dáhpáhusain sáhka virusvariánttas vai árat virushámis.

23.2. dii. 11.40 Levis šadde giddet gávppi korona dihte

Levi K-Market LevinPoro šadde giddet gaskaboddosaččat.

Levi čuoiganguovddážis Gihttela gielddas K-Market LevinPoro lea šaddan gaskaboddosaččat giddet uvssaidis koronaepidemiija dihte. Mannan lávvardaga gávpái buktojuvvui gálvoguorbmi, ja ikte vuossárgga buot bargit šadde karantenii.

Gávppi goit bastet fas rahpat ihttin gaskavahku ovcci áigge, go Avvilis ožžot lassiveaga. Avvillaš k-gávpejaspárra ovttas bargoveagain boahtá veahkkin. Gávppis leat maid pakeahttabálvalusat, muhto dat bissot gitta njukčamánu 8. beaivvi rádjai.

Levi čuoiganguovddážis leat dál ollu olbmot, rehkegiid mielde sullii 20 000 luopmolačča.

22.2. dii. 11.32. Anáris bearjadaga gávdnon koronanjoammun lei boastto positiiva

Dearvvašvuođa- ja buresveadjinlágádusa koronakárttá mielde Anáris lea gávnnahuvvon okta ođđa koronanjoammun bearjadaga 19.2. Anára gieldda jođiheaddji doavttir Outi Liisanantti mielde njoammun gávnnahuvvui boastto positiivan. Anáris eai leat su mielde ođđa njoammumat.

Maiddái maŋŋebárgga 16.2. Dearvvašvuođa- ja buresveadjinlágádusa koronakárttá mielde Anáris lei gávnnahuvvon okta ođđa koronanjoammun. Liisanantti muitalii dalle, ahte buohccán olmmoš lea anárlaš, muhto son ii leat dál gieldda guovllus nappo Anár gielddas ii leat oktage gártan njoammunáitaga vuollái.

Njoammumat registrerejuvvojit buohccán olbmo virggálaš ruovttubáikki mielde.

22.2. dii. 10.15 Njoammundávdalága rievdadusat bohtet fápmui odne – guovlluid eiseválddit sáhttet giddet ovttaskas lihkadanbáikkiid

Odne bohtet fápmui čavgadut ráddjehusat korona leavvama eastadeapmin.

Njoammundávdalága rievdadusat addet guovlluid eiseválddiide vejolašvuođa giddet ovdamearkka dihte priváhta lihkadanbáikkiid, álšasáliid ja lávggodanbáikkiid.

Dán rádjai ná leat sáhttán dahkat dušše gielddaid sajiin, mat gullet gielddaide. Láhkarievdadusat gusket maiddái joavkoastoáiggedoaimmaide geavahuvvon earret eará duhkoraddanbáikkiid ja ealliidgárddiid sajiid siste.

Rievdadusat eai guoskka ovdamearkka dihte čuoigan- ja čierastallanguovddážiid dahje ealliidgárddiid sajiid olgun.

19.2. dii. 17.10 Njoammundávdalága rievdadus nannejuvvon – guovlluid eiseválddiide buoret kontrolla virusdilis

Njoammudávdalága rievdadus lea nannejuvvon, ja dat boahtá fápmui vuossárgga 22.2.2021. Láhkarievdadus nanne báikkálaš ja guovlolaš eiseválddiid vejolašvuođaid dahkat ovddalgihtii eastadeaddji ja jođánis doaimmaid koronavirusa leavvama eastadeapmin.

Lága mielde eiseváldi sáhttá ásahit guovlolaš ráddjehusaid ealáhus- ja astoáiggedoibmii dalle, go dat lea vealtameahttun epidemiija leavvama eastadeapmin. Geatnegasvuođat ja ráddjehusat vuođđuduvvet olbmuidgaskasaš fysalaš kontávttaid garvimii.

Váldooassi rievdadusain lea fámus 30.6.2021 rádjái.

Sosiála- ja dearvvašvuođaministeriija ollislaš dieđáhusa gávnnat dáppe.

19.2. dii. 16.59 Anára gieldda dieđáhus epidemiijadilis ja ođđa ávžžuhusain

Anára gielda dieđiha, ahte Lappi buohccedikšunbire lea sirdásan epidemiija vearrádeami muddui (su. kiihtymisvaihe). Buohccedikšunbire guovllus leat máŋggat njoammumat, maid gálduid eai leat ožžon čielggasin. Maiddái virusvariántta leat gávnnahan buohccedikšunbire guovllus.

Anára gielddas váldet ođđa ráddjehusid ja ávžžuhusaid geavahussii. Lappi buohccedikšunbire guovllus badjel 20 olbmo dilálašvuođat leat Lappi guovlohálddahusdoaimmahaga mearrádusa mielde gildojuvvon 22.2.–21.3.2021.

Dieđáhusas čállet, ahte Anára gieldalaččain leat raporteren guokte koronavirusnjoammuma maŋimuš vahku áigge ja njoammunáitaga vuollái gártan olbmuid leat gárten. Anára gielda ávžžuha gáiddusbarggu buohkaide, geain dasa lea vejolašvuohta. Lassin ávžžuhit máskka geavaheami bargosajiin ja almmolaš báikkiin. Máskka geavaheami ávžžuhit maiddái badjedási ja logahaga oahppiide.

Joavkoastoáiggedoaimmaid ávžžuhit gaskalduhttit badjel 16-jahkásaččaid oasil čuovvovaš golmma vahkkui. Anára gielda ávžžuha sakka, ahte speallandoaimmaid eai ollašuhte gieldda rájiid olggobealde lávvardaga 20.2. rájes.

Lassin Avvila dearvvašvuođaguovddáš ávžžuha ohcalit koronatestii vuollegis šielmmáin. Koronateasttaide beassá álkit. Teasta lea nuvttá ja bohtosa oažžu diimmu siste.

19.2 dii. 11.48 Lappi buohccedikšunbire guovllu čoahkkananráddjehusat čavgejuvvojit

Epidemiijadili vearráneami dihte ja koronanjoammumiid leavvama eastadeapmin Lappi buohccedikšunbire gielddain buot almmolaš sis- ja olgodáhpáhusat, maidda oassálastet badjel 20 olbmo leat gildojuvvon.

Siste ja ráddjejuvvon olgosajis sáhttá goittotge ordnet álbmotdilálašvuođaid ja almmolaš čoahkkimiid, maidda oassálastet eanemusat 20 olbmo dainna eavttuin, ahte oahpahus- ja kulturministeriija ja dearvvašvuođa- ja buresveadjinlágádusa njoammuneastadanrávvagat vuhtiiváldojuvvojit.

Lappi guovlohálddahusdoaimmahaga mearrádus lea fámus 22.2.–21.3.2021. Dat guoská Lappi buohccedikšunbire guovllu, nappo Eanodaga, Anára, Gihttela, Giemajávrri, Kolari, Muoná, Pelkosenniemi, Pello, Posio, Ranua, Roavvenjárgga, Salla, Suovvaguoikka, Soađegili ja Ohcejoga gielddaid.

Lappi buohccedikšunbire lea sirdásan epidemiija vearráneami muddui.

19.2 dii. 10.15. Lappis rádjerasttildeaddjiid koronatestema háliidit čielggadit beaktilabbot – oktavuođadieđut girjejuvvošedje

Lappi buohccedikšunbire háliida čuovvut rádjerasttildeaddjiid koronavirustestema dili beaktilabbot go dál.

Bajit infekšuvdnadoavttir Markku Broas mielde buohccedikšunbire ja rádjegozáhus leat válmmaštallamin geavadaga, mas rádjerasttildeaddjis jerret oktavuođadieđuid, vai gielddaid njoammundávdaeiseválddit sáhttet leat sidjiide oktavuođas.

Broas mielde persovnnalaš oktavuođaváldimiin háliidit stivret rádjerasttildeaddji koronatestii. Geavadat dárkkálmuvvá vahku áigge. Dat guoskkašii Lappi guovllu rádjestašuvnnaid, muhto ii Durdnosa.

Ášši gávnnat suomagillii dáppe.

18.2. dii. 17.25 Lappi buohccedikšunbires epidemiijadilli lea sirdáseamen vearráneami muddui

Bajit infekšuvdnadoavttir Markku Broas mielde Lappi buohccedikšunbire evttoha koronakoordinašuvdnabargojovkui, ahte lassánan njoammundáhpáhusaid dihte Lappis sirdášuvašedje vuođđomuttus epidemiija vearráneami muddui. Bargojoavku dahká vejolaččat ihttin mearrádusaid ođđa ráddjehusain.

Njoammundáhpáhusaid mearri lea sakka lassánan maŋimuš guovtti vahku áigge. Mannan vahkus gávnnahedje 30 ja dán vahkus 25 njoammundáhpáhusa.

Duorastaga Lappi buohccedikšunbires gávnnahedje gávcci ođđa koronanjoammuma. Njeallje njoammumiin leat Kolaris, guokte Pelkosenniemis ja guokte Pellos.

Länsi-Pohja buohccedikšunbires bohte odne dihtui guokte ođđa njoammuma. Guovllu vejolaš vuosttas rievdan virusvariánttas ii leat vel boahtán sihkkarastojuvvon diehtu.

18.2. dii. 15.55 Suopma joatká rájáid gohcima

Suoma stáhtaráđđi lea mearridin joatkit sihke sis- ja olgorájá gohcima njukčamánu 18. beaivvi rádjai. Ráddjehusaid sisdoallu ii leat rievdan.

Sisrádjájohtolagain dárkkuhit Schengen-guvlui gullevaš riikkaid gaskasaš johtima. Suopma lea ráddjen riikii boahtima buot eará Schengen-guovllu riikkain earret Islánda.

Suoma vuođđolága mielde Suoma riikkavuložis ja Suomas ássi olbmos lea álo riekti máhccat Supmii ja maiddái vuolgit Suomas, jus rievtti eai lágain rievdat. Stáhta ávžžuha vealtit buot dárbbašmeahttun mátkkošteami olgoriikkaide.

17.2. dii. 16.38 Lappi eanagottis 10 ođđa koronanjoammuma

Lappi buohccedikšunbire guovllus leat gávnnahan odne gaskavahku ovcci ođđa koronanjoammuma.

Golbma leat vuolgán Pyhätunturi njoammunbálgás. Sihke Roavvenjárggas ja Kolaris leat guokte njoammuma olbmuin, geat leat erremis.

Pellos okta njoammun laktása árat njoammunbálgái ja Soađegilis okta njoammun lea gávnnahuvvon olgobáikegottálaš mátkkálaččas, gii lea erremis.

Lassin Länsi-Pohja buohccedikšunbires leat gávnnahan ovtta ođđa njoammuma.

16.2. dii. 15.30 THL kárttá mielde okta ođđa njoammun Anáris – Sáhka lea anárlaš olbmos eará sajis

Dearvvašvuođa- ja buresveadjinlágádusa koronakárttá mielde Anáris lea gávnnahuvvon okta ođđa koronanjoammun. Avvila dearvvašvuođaguovddáža jođiheaddji doaktára Outi Liisanantti mielde buohccán olmmoš lea anárlaš, muhto son ii leat dál gieldda guovllus nappo Anár gielddas ii leat oktage gártan njoammunáitaga vuollái.

Njoammumat registrerejuvvojit buohccán olbmo virggálaš ruovttubáikki mielde.

16.2. dii. 7.21 Soađegilis boahkuhit badjel 80-jahkásaččaid dán vahkus

Soađegili gieldda badjel 80-jahkásaččat sáhttet várret áiggi otná rájes koronaboahkuhussii. Soađegili gielda oažžu dán vahku áigge ođđa eari koronaboahkuhanávdnasa.

Gielda boahkuha daid badjel 80-jahkásaččaid, geat eai oaččo ahkeolbmuide oaivvilduvvon bálvalusaid dego ruovttudivššu dahje ássanbálvalusaid.

Boahkuhanáiggi sáhttá várret otná rájes telefon bokte nummiris 020692884 árgabeivviid diibmu 8.00-14.00.. Boahkuhanáiggit leat duorastaga, bearjadaga ja lávvardaga.

15.2. dii. 15.08 Pellos vihtta ođđa koronanjoammuma, Roavvenjárggas golbma

Pellos leat gávnnahan vihtta ođđa koronanjoammuma vahkuloahpa ja vuossárgga áigge. Njoammumat laktásit seamma bálgái, man álggus ii leat vel diehtu.

– Dáhpáhusain lea oktavuohta eará guvlui Supmii ja Ruŧŧii, muitala Lappi buohccedikšunbire bajit infekšuvdnadoavttir Markku Broas.

Roavvenjárggas ođđa njoammumiid gávnnahedje vahkkoloahpas golbma. Dain guokte leat gávnnahan olbmuin, geat leaba erremis ja okta Ounasvaara logahagas.

Lassin Kolaris lea sihkkarastojuvvon njoammun olbmos, gii lea erremis ja Soađegilis fas njoammun olgobáikegottálaččas.

Lappis gávnnahedje mannan vahkus 50 koronanjoammuma, main 31 ledje Lappi buohccedikšunbires ja 19 Länsi-Pohja buohccedikšunbires.

15.2. dii. 15.01 Ounasvaara logahagas čuođi olbmo erremii – skuvla gáiddusoahpahusas vuossárgga

Roavvenjárgga Ounasvaara logahagas leat gávnnahan koronavirusnjoammuma lávvardaga 13.2.

Dan dihte logahat lea leamaš odne vuossárgga gáiddusoahpahusas.

Vahkuloahpa áigge dearvvašvuođafuolahus mearridii sullii čuođi olbmo erremii. Njoammunáitaga vuollái gártan olbmot leat ožžon dieđu áššis, muitalit Roavvenjárgga gávpogis.

Ounasvaara logahat doaibmá maŋŋebárgga guovvamánu 16. beaivve rájes lagašoahpahusas. Erremii mearriduvvon olbmuin lea riekti čuovvut oahppodiimmuid Meet-oktavuođain.

15.2. dii. 11.12 Lappi rádjegozáhus dárkkálmahttán rávvagiid rádjejohtinnjuolggadusain

Rádjegozáhus lea dárkkálmahttán iežas rávvagiid rádjejohtinnjuolggadusain. Stáhtaráđi mearrádusa vuođul rádjerasttildanbáikkiid rabasáiggiid olggobeale lobálaš johtolat lea gažaldagas dalle, go lea Suoma stáhtaborgár dahje Suomas orrunlobi ožžon olmmoš, geas lea bargui laktáseaddji sivva rasttildit rájá 15.2. rájes.

Maiddái dát olgoriikalaččat sáhttet rasttildit rájá rabasáiggiid olggobealde, geain lea:

• Servodaga geahččanguovllus mearkkašahtti bargu, mii gáibida rájá rasttildeami
• Dearvvašvuođasuorggi ja gádjunlágádusaid olbmot, vuorrasiidfuolahusa bargit barggus, virgeoapmahaččaid vealtameahttun virgedoaimmat
• Dávvirjohtolat
• Diplomáhtat, riikkaidgaskasaš organisašuvnnaid bargit, soalddátbargit ja veahkkeservviid bargit bargodoaimmain
• Stáhtaid ovddasteaddjit, geat oassálastet riikkaidgaskasaš ráđđádallamiidda ja riikkaidgaskasaš servviid bargguide oassálasti olbmot

Rádjegozáhus muittuha vuhtiiváldit dan, ahte vuođđolágalaš riekti boahtit Supmii ja vuolgit Suomas ii atte rievtti mátkkoštit rádjerasttildanbáikkiid bokte rabasáiggiid olggobealde. Rádjerasttildanbáikkit leat priváhta johtolaga oasil rabas rabasáiggiid olggobeale dušše árat máinnašuvvon dáhpáhusain. Lassedieđuid gávnnat dáppe.

12.2. dii. 14.33 Roavvenjárggas gávnnahedje koronavirusa británnialaš variántta

Guovtte roavvenjárgalaččas leat gávnnahan muhttašuvvan koronavirusa. Guktuin lea oktavuohta Ruoŧa Skielleha báhtterfabrihkkii. Olbmuid leat testen Roavvenjárggas.

– Leavvanfárta dagaha fuola, ahte dat sáhttá leavvat jođánit ja lasihit buohcceviesu bargonoađi, dadjá bajit infekšuvdnadoavttir Markku Broas.

Broas muitala, ahte dál birrasiid 150 olbmo leat erremis. Buohkanassii miehtá Suoma leat birrasiid 30 olbmo, geat leat buohccán Skielleha báhtterfitnodagas covid-19-dávdii.

– Lohku sáhttá vel rievdat, muhto buohkat, geat leat njoammunáitaga vuolde, leat dál erremis.

Roavvenjárggas lea sáhttán gártat británnialaš koronavirusvariántta njoammunáitaga vuollái guovtte restoráŋŋas mannan sotnabeaivve, 7.2. Broas ávžžuha buohkaid, geat leat dalle leamašan Shell Napapiiris diibmu 13.30–14.15 ja Kansanpubis diibmu 20.30–22.15, mannat testii, vaikko sis eai livččege koronai laktáseaddji dávdamearkkat.

12.2. dii. 10.34 Norga pláne giddet rájáid maiddái dearvvašvuođabargiide

Norgga ráđđehus čielggada vejolašvuođa giddet rájáid maiddái dearvvašvuođasuorggi bargiide. Áššis muitala Ávvir-aviisa.

Aviissa mielde Norgga riektedepartemeanta lea dáhtton gielddaid árvvoštallat, makkár váikkuhusat das livčče, jus ráját giddejuvvojit Suoma ja Ruoŧa rádjejohttiide, geat barget dearvvašvuođa-ja fuolahussuorggis.

Deanu gieldda sátnejođiheaddji Helga Pedersen sávvá riektedepartemeantta hilgut evttohusa. 40 proseantta Deanu buohccidivššáriin ásset Suomas. Jus ráját giddejuvvojit dearvvašvuođabargiide, dagaha dat Pedersen oainnu mielde duođalaš bargoheahtedili dearvvašvuođa- ja fuolahusbálvalusaide.

11.2. dii. 15.55 Lappi buohccedikšunbires logi ođđa njoammuma

Lappi buohccedikšunbires leat gávnnahan odne logi ođđa njoammuma. Dain njeallje leat Pyhätunturis.

Roavvenjárggas gávnnahedje guokte njoammuma ja Kolaris golbma njoammuma. Njoammuma ožžon olbmot ledje juo erremis.

Maiddái Gihttelis lea gávnnahuvvon okta njoammun.

11.2. dii. 14.51 Stáhtaráđis muhtun rievdadusat riikii boahtimii

Stáhtaráđđi mearridii odne 11.2. muhtun rievdadusain riikii boahtimis 15.2. rájes.

Vuossárgga 15.2. rájes Suoma ja Norgga gaskasaš riikkarájá rádjerasttildanbáikkiid sihke Suoma ja Ruoŧa gaskasaš rájás Gárasavvonis, Kolaris, Muonás ja Pellos rádjerasttildanbáikkiid rabasáiggiid ráddjejit. Suoma ja Norgga gaskasaš riikkarájá rádjerasttildanbáikkit leat rabas diibmu 9.00–21.00.

Suoma ja Ruoŧa gaskasaš rájis Gárasavvona, Kolari, Muoná ja Pello rádjerasttildanbáikkit leat rabas diibmu 7.00–21.00.

Rabasáiggiid ráddjehusat eai guoskka dávvirjohtolaga eaige vealtameahttun priváhta johtolaga, masa lea ákkastallon sivva rasttildit rájá rabasáiggiid olggobealde.

Rievdadusain geahččalit geahpedit rádjejohtolaga ja eastadit koronavariántta leavvamis.

Ráddjehusat leat fámus 25.2. rádjai.

11.2. dii. 7.30 Lappis 6,9 proseantta olbmuin boahkuhuvvon

Olles Lappis leat 10 400 olbmo ožžon vuosttas doronaboahkku piikka. Nuppi piikka leat ožžon sullii 2000 lappilačča. Oktiibuot 6,9 proseantta Lappi olbmuin leat dál boahkuhuvvon.

Dearvvašvuođa- ja buresveadjinlágádusa mielde Lappi buohccedikšunbires boahkuhuvvon olbmuid oassi lea dál stuorámus olles Suomas.

Lappi guvlui ožžot eanet boahkkuid dán vahkus.

10.2. dii. 17.16 Sámediggi muittuha rievttis rasttildit rájá, go johtin laktása sámi ealáhusaide ja kultuvrii

Stáhtaráđi mearrádusa mielde sámi ealáhusain ja kultuvrrain bargan lea vealtameahttun ja maiddái vuođuštallon sivva boahtit riikii.

Sámediggi muittuha, ahte stáhtaráđi mearridan sisrádjegohcima máhcaheami áigge sámit sáhttet ain rasttildit sihke Suoma ja Ruoŧa ja Suoma ja Norgga gaskasaš riikkarájá ja rádjejogaid fievrruiguin, maiddái eará sajiin go rádjerasttildanbáikki bokte. Dat guoská Suoma rájá rasttildeami.

Sisrájáid rasttildeami oktavuođas galgá vuhtiiváldit maiddái Norgga ja Ruoŧa virgeoapmahaččaid mearrádusaid ja rávvagiid.

Ođđa ráddjehusat bohte fápmui 27.1. ja dat leat fámus 25.2. rádjai.

Sámedikki dieđáhusa sáhtát lohkat dáppe.

9.2. dii. 17.12 Lappii bohtet lasi boahkuhanávdnasat

Lappii bohtet dán vahkus lasi koronaboahkut. Lappi buohccedikšunbirei bohtet 1100 Pfizer ja 900 Astra Zeneca boahku. Boahkut juhkkojuvvojit guovllu gielddaide.

– Pfizer boahkuin joatkit badjel 80-jahkásaččaid boahkuhemiid. Astra Zeneca boahkuid addet vuos vuollel 70-jahkásaččaide, geain lea riska buohccát vearrát koronadávdii, muitala Lappi buohccedikšunbire bajit infekšuvdnadoavttir Markku Broas.

Moderna boahkku ii boađe Lappii árat vurdojuvvon mearri. Broas mielde Lappii vurde dán vahkkui 4800 boahku ovddas Moderna boahkuhanávdnasa, muhto dat juhkkojuvvojitge Suomas eará guovlluide.

– Vel ii leat dieđus, man olu ja goas Moderna boahkku boahtá lasi Lappii, árvala Broas.

9.2. dii. 15.45 Lappis čieža ođđa koronanjoammuma – aŋkke okta laktása Ruoŧa báhtterfitnodaga njoammunbálgái

Lappis leat gávnnahan čieža ođđa koronanjoammuma odne maŋŋebárgga. Dain njeallje leat Roavvenjárggas, okta Kolaris, okta Pelkosenniemis ja okta Länsi-Pohja buohccedikšunbires.

Roavvenjárgga njoammumiin guokte leat olbmuin, geat leaba erremis. Ovtta njoammuma álgu lea oaivegávpotguovllus ja ovtta njoammuma álgu ii leat vel dieđus, muitalit Lappi buohccedikšunbires.

Okta Roavvenjárgga njoammumiin laktása Ruoŧa báhtterfitnodaga njoammunbálgái.

Kolari njoammun lea gávnnahuvvon olbmos, gii lea juo erremis ja Pelkosenniemi njoammuma álgu lea olgoriikkas. Länsi-Pohja njoammuma čielggadeapmi lea ain gaskan.

9.2. dii. 14.10 Ruoŧa báhtterfitnodaga njoammunbálgás fas ođđa njoammumat Suomas

Ruoŧa Skellefteå nappo Skielleha báhtterfabrihka njoammunbálgás leat gávnnahan lasi njoammumiid Suomas. Dán dilis njoammumiid leat gávnnahan 29, main ođđasamos lea Nuorta-Suomas. Njoammumat leat dál vihtta eambbo go ikte veaigin.

Lappis njoammumat leat oktiibuot guhtta, main njeallje leat Roavvenjárggas, okta Giemajávrris ja okta Länsi-Pohja guovllus.

Lappi buohccedikšunbire bajit infekšuvdnadoavttir Markku Broas jáhkká, ahte buot suopmelaččat, geat barget fabrihkas, leat fáhtejuvvon. Sus eai leat dieđut, man gallis sis leat fitnan koronateasttas.

– Jus sii eai leat fitnan koronateasttas, de sii rávvejuvvojit testii ja nuppi testii, go Supmii máhccamis lea gollan golbma beaivvi, dadjá Broas.

Suopmelaš bargiid positiiva koronačájánasaid leat dolvon Helssegii dearvvašvuođa- ja buresveadjinlágádus THL dutkanláhkai vejolaš virusvariánttaid dihte. Dutkanbohtosat eai leat vel boahtán.

Ášši gávnnat suomagillii dáppe.

8.2. dii. 13.19 Ruoŧa báhtterfitnodaga njoammunbálgás juo 16 njoammuma leavvan Supmii

Suomas leat gávnnahan odne vuossárgga juo 16 koronanjoammuma, mat laktásit Skellefteå nappo Skielleha báhtterfabrihka njoammunbálgái. Eanemus njoammumat leat gávnnahuvvon Keski-Pohjanmaa guovllus.

Njoammumiid leat gávnnahan lassin Lappi, Länsi-Pohja, Pohjois-Pohjanmaa, Pirkanmaa, Päijät-Häme, Vaasa ja HUS guovlluin.

Lappi buohccedikšunbire bajit infekšuvdnadoavttir Markku Broas mielde njoammundáhpáhusaid leat gávnnahan muhtun veardde eambbo sotnabeaivvi maŋŋá. Ikte sotnabeaivve muitaluvvui, ahte teasttain ledje gávnnahan 10 njoammundáhpáhusa. Njoammunteasttaid leat dahkan dál juo sullii 45.

Broas mielde fitnodagat leat juo dieđihan stuorámus oassái bargiide njoammunáitaga vuollái gártamiin ja rávven sin teasttaide. Lassin njoammundávdaeiseválddit váldet oktavuođa buot olbmuide, geat leat bargan maŋimuš guovtti vahku áigge Northvolt fabrihkas.

Northvolt fabrihkas Skiellehis barget sullii 1100 bargi miehtá máilmmi. Fabrihkas leat maiddái sullii 200 suopmelaš bargi.

Ruoŧa báhtterfabrihkas koronaepidemiija lea leavvan sakka: sullii 1000 bargi joavkkus 150 bargi leat gávnnahan koronapositiivan ja dain 27 leat rievdan koronavariánttat.

Ášši gávnnat suomagillii dáppe.

8.2. dii. 11.22 Lappis leat gávnnahan 21 ođđa koronanjoammuma

Lappis leat gávnnahan vahkkoloahpas oktiibuot 21 ođđa koronavirusnjoammuma. Dain 12 leat Länsi-Pohja buohccedikšunbires ja loahpat Lappi buohccedikšunbires.

Roavvenjárggas leat vihtta ođđa njoammuma.

– Dat leat vuolgán olgoriikain dahje nuppi báikegottis, muitala Lappi buohccedikšunbire bajit infekšuvdnadoavttir Markku Broas.

Kolaris ođđa njoammumat leat golbma ja Giemajávrris okta.

8.2. dii. 11.00 Anára gielddas eai ođđa koronanjoammumat

Anáris eai leat gávnnahan ođđa koronavirusnjoammumiid. THL koronastatistihkain oidnui bearjadaga, ahte Anáris livččii okta ođđa njoammun. Anára jođiheaddji doavttir Outi Liisanantti muitala, ahte loguin lei šaddan feaila.

8.2. dii. 9.34 Norga gáibida suopmelaš bargiin koronateastta oktii vahkus

Davvi-Suopma meroštallojuvvo Norggas fas rukses guovlun otná rájes. Dat dárkkuha dan, ahte Suoma riikkavuložiin, geat barget Norggas, gáibiduvvo koronateasta juohke 7. beaivve.

Norgga koronaráddjehusaid mielde buot Suomas ja Ruoŧas ássi bargomátkkálaččat, geat johtet dávjá ássanriikkaset ja Norgga gaskka, eai dárbbaš leat karantenas jus fal testejuvvojit jeavddálaččat.

Dálá ráddjehusaid mielde goittot dušše dat bargit, geat barget servodahkii dehálaš surggiin, besset rasttildit rájá barggu dihtii.

Dárkkálmahtton 9.2. dii. 8.35 dieđuin servodahkii dehálaš surggiid bargiid rievttis rasttildit rájá.

8.2. dii. 7.30 Ođđa koronavirusváriantta leavvan Lappii Ruoŧas

Ođđa koronavirusvariántta ballet leavvat Supmii Ruoŧas. Skellefteå nappo Skielleha báhtterfabrihkka Northvolt bargiin leat ilbmán logiid mielde ođđa koronavirusnjoammumat, main lea sáhka namalassii dán ođđa virusvariánttas.

Fabrihkas barget sullii 200 suopmelačča, geain ain jo logis leat buohccán.

Buohccán suopmelaš bargit leat maiddái Lappi guovllus.

Buot fabrihka bargit, geat leat boahtán Supmii Skiellehis ođđajagimánu 23. beaivve maŋŋá, galget ohcalit ođđasit vel koronatestii vaikko livččiige testen negatiivan jo fabrihkas dahje Ruoŧa rájá alde.

5.2. dii. 13.49 Lappi buohccedikšunbires eai ođđa njoammumat

Lappi buohccedikšunbire guovllus eai leat gávnnahan dán rádjai odne bearjadaga ođđa koronavirusnjoammumiid.

4.2. dii 15.16 Ráđđehus evttoha: Restoráŋŋaid ráddjehusat joatkašuvašedje geassemánu lohppii

Ráđđehus lea dahkan evttohusa riikkabeivviide gaskaboddosaš njoammunlága rievdadeamis láhkan. Dainna jotket restoráŋŋaid ráddjehusaid geassemánu loahpa rádjai. Árat ráddjehusat leat fámus guovvamánu lohppii.

Sosiála- ja dearvvašvuođaministeriija lea almmuhan dieđáhusa áššis.

4.2. dii. 14.10 Lappis guhtta ođđa koronanjoammuma

Lappis leat gávnnahan duorastaga guhtta ođđa koronanjoammuma. Guokte dain leat roavvenjárgalaččain ja okta Gihttelis.

Golbma njoammuma leat Länsi-Pohja buohccedikšunbires.

3.2. dii. 17.02 Ruoŧŧa gáibidišgoahtá negatiiva koronateastabohtosa riikii boahtti olgoriikalaččain

Ruoŧa oaiveministtar Stefan Löfven muitalii odne veaigin dieđihandilálašvuođas, ahte Ruoŧŧa áigu gáibidišgoahtit negatiiva koronateastabohtosa riikii boahtti olgoriikalaččain.

Ásahus boahtá fápmui lávvardaga 6.2. ja dat lea fámus njukčamánu loahpa rádjai. Sivvan dasa leat koronavirusvariánttat, mat levvet jođánit eará riikkain.

Riikii besset dušše dat olbmot, geain lea duođaštus negatiiva koronavirusteasttas. Duođaštus sáhttá leat eanemustá 48 diimmu boaris. Ođđa ásahus guoská olgoriikalaččaid. Ruoŧa stáhtaborgáriin lea ain riekti boahtit riikii ja vuolgit riikkas.

Sisministtar Mikael Damberg dajai, ahte ođđa geavadiin eai hálit váttásmahttit badjelmeari daid olbmuid eallima, geat johtet ráji rastá barggu dihte. Bargomátkkálaččaide reahkká negatiiva teastaduođaštusa čájeheapmi oktii vahkus.

Ášši gávnnat suomagillii dáppe.

3.2. dii. 9.14 Lappi gielddat njunnožis boahkuhanstatistihkain

Lappi buohccedikšunbiires leat lihkostuvvan oažžut buorebut koronaboahkuid go eará guovllus riikkas. Lappis leatge boahkuhan olbmuid mealgat olu eanet go muđui riikkas.

Stuorámus sivva dasa lea, ahte Lappii ožžo Supmii boahtán measta 5 000 Moderna boahkuhanávdnasa. Dat addojuvvojedje Lappii go dáppe leat guhkes gaskat ja Moderna boahkuhanávdnasa lea álkkit seailluhit ja jođihit go eará koronaboahkuhanávdnasiid.

THL loguid mielde Ohcejoga, Muoná ja Salla gielddat leat njunnožis boahkuhemiin, daid gielddain leat boahkuhan sullii 15 proseantta ássiin. Olles Lappis leat boahkuhan 5,4 proseantta ássiin ja olles riikkas fas 2,6 prosentta.

2.2. dii. 8.13 Ráđđehus válmmaštallá láhkaevttohusa bákkolaš testemiin Suoma rájáid alde

Ráđđehus geahččala jođánis áigetávvaliin ovddidit láhkaevttohusa Supmii boahtti olbmuid bákkolaš testemiin Suoma rájáid alde. Láhkaevttohusa ulbmilin lea, ahte eiseválddit sáhtášedje mearridit karantenii daid rájirasttildeaddjiid, geat beahttalit koronatestemis.

Vel eai leat mearridan, testešedjego buohkaid, geat bohtet olgoriikkain, vai dušše daid, geat bohtet guovlluin, gos koronavirus leavvá vearrámusat.

Dálá plána mielde testema rájá alde eai gáibidivčče daid olbmuin, geat leat jo buohcan koronavirusa dagahan dávdda, geain lea boahkohanduođaštus dahje geain lea varas duođaštus negatiiva koronateasttas.

Ráđđehusas leamašan mihttomearrin fidnet láhkaevttohusa riikkabeivviid gieđahallamii jo dán vahkus, muhto mearrádusa dahkan soaitá vel ádjánit.

1.2. dii. 12.25 Ruoŧa álbmotdearvvašvuođaeiseváldi evttoha ráđđehussii: Olgoriikalaččain galgá gáibidit rájá alde negatiiva koronateastta

Ruoŧa álbmotdearvvašvuođaeiseváldi evttoha ráđđehussii, ahte Ruoŧas álggahivčče gáibidit negatiiva koronateastta, go boahtá riikii. Evttohusa mielde tasta sáhtášii leat váldon eanemusat 48 diimmu árat.

Riikii boahtima eavttuid čavgemiin eiseválddit háliidit eastadit koronavirusvariánttaid leavvama Ruoŧas. Álbmotdearvvašvuođaeiseváldi evttohusa mielde rádjeguovllu bargiide reahkkášii oktii vahkus váldon koronateasta.

Ruoŧa stáhtaborgáriid fas geatnegahtášedje koronatestii seamma beaivve, go boahtá riikii ja lassin ođđasit viđa beaivvi siste. Dán áiggi testejuvvon olbmo ja suinna seamma dálus ássi olbmuid galggašii eallit erremis. Ruoŧŧa lea juo árat gidden rájáid Dánmárkui ja Norgii.

Ášši gávnnat suomagillii dáppe.

29.1. dii. 11.20 Norga lea gidden rájáid

Norga lea gidden rájáid mannan ija. Fápmui bođii čavga riikiiboahtingielddus. Norgii besset dušše dat olgoriikalaččat, geain lea fásta orrunsadji Norggas dahje eará bákkolaš sivva boahtit riikii, muitalit Norgga Ráđđehusa dieđáhusas.

Norga lea čavgen koronadoaimmaid maŋimuš áiggiid, go koronavirusa ođđa variánta lea leavvan Oslo guovllus. Dearvvašvuođaministtara mielde doaimmaiguin háliidit eastadit dan, ahte ođđa virusvariántta njoammumat eai leavvagoađe sakka.

Ášši gávnnat suomagillii dáppe.

29.1. dii. 9.19 Roavvenjárgga skuvlenguovddážis njoammumat

Lagabui 90 olbmo leat biddjon erremii Roavvenjárggas, go Lappi skuvlenguovddáš Redu guovtti ossodagas leat gávnnahan koronavirusnjoammumiid. Njoammumat leat gávdnon guovtti stuđeanttas, nubbi Porokatu ossodagas ja nubbi fas Jokiväylä ossodagas.

Porokatu ossodagas koronai buohccán olmmoš lea leamašan maŋimuš skuvllas bearjadaga 22. beaivve.

Jokiväylä ossodagas fas koronai buohccán olmmoš lea leamašan vuossárgga 25. beaivve ja maŋŋebárgga 26. beaivve.

Guktuin dáhpáhusain eará olbmot leat sáhttán gártat njoammunáitaga vuollái boradeami oktavuođas gaskabeai sulain.

Loga áššis eambo suomagilliidáppe.

28.1. dii. 17.36 Durdnosleagi ráđđi háliida álkidahttit barggus johtima ráji rastá

Durdnosleagi ráđđi gáibida čielggasmahttima rádjeguovlluid ássiid doaibmarávvagiidda. Čielggasmahttima sávvet testemiidda, rádjestašuvnnaid rabasáiggiide ja vealtameahttun bargguide, mat addet rievtti boahtit Supmii.

Ráđđi oaidná ruossalassan dan, ahte olgoriikalaš sáhttá boahtit Supmii, jus sus lea stohpu dahje moarsi, muhto son ii sáhte boahtit dattege ánsobargui. Ráđđi háliida namalassii álkidahttit barggus johtima.

Dat maiddái ávžžuha fas rádjeguovllu ássiid garvit dárbbašmeahttun rádjerasttildeami.

28.1. dii. 7.38 Norgga ráját gitta

Norga gidde rájáidis boahtte ija rájes praktihkas buot olbmuin geat eai ása Norggas, čállá NRK.

Norgii luitet dušše beare dakkár olbmuid, geain lea áibbas bággu beassat riikii, dego dearvvašvuođasuorggi bargiid, muitalii Norgga stáhtaminister Erna Solberg ikte eahkes.

Rájáid giddemiin Norga háliida eastit ođđa koronavirusvariántta leavvama Norggas. Norga árvvoštallá ráddjehusaid ođđasit guovtti vahku geažes.

27.1. dii. 7.23 Rádjesearvvušmeroštallan ii leat šat fámus

Suoma ja Ruoŧa, sihke Suoma ja Norgga gaskasaš rádjesearvvušmeroštallan ii leat šat fámus mannan ija fápmuiboahtán čavgejuvvon rádjejohtinmearrádusaid dihte. Rádjesearvvušmeroštallan lea guoskan rádjegielddaid olbmuid, ja sis leamašan dihto eavttuiguin lohpi fitnat ránnjáriikkas lagamuš rádjegielddas.

Olbmuin ii leat maid šat lohpi rasttildit rájá eará sajiin go virggálaš rádjerastildanbáikkiin. Sápmelaččain goit bissu riekti hárjehit iežaset ealáhusasja kultuvrra, ja sii ožžot ain rájá rasttildit mohtorfievrruin, juos leat ealáhussii gullevaš barggus.

27.1. dii. 7.21 Lappis eanemus boahkuhusa ožžon olbmot

Lappi buohccedikšunbires leat prosentuálalaččat boahkuhan eanemusat olbmuid Suomas.

Boahkuhuvvon olbmuid oassi lea olles Lappi buohccedikšunbires 7,6 proseantta, go Suomas obalohkái boahkuhuvvon olbmuid ossodat lea dušše 2 proseantta.

Suomas leat addojuvvon dál sullii 110 000 boahku, main Lappis leat addojuvvon 4 654.

26.1. dii. 8.20 Ohcejogas gártet šluhttet oasi boahkuhanáiggiin

Ohcejogas gártet šluhttet oasi riskajoavkkuide várrejuvvon boahkohanáiggiin, go gielda ii leat ožžon boahkuid doarvái. Gieldda dearvvasvuođafuolahus váldá persovnnalaččat oktavuođa daid boahkohanáiggi várren olbmuide, geaid áigi šluhttejuvvo. Gáregasnjárgga ja Njuorggáma almmuhuvvon boahkohanbeaivvit goit ollašuvvet.

Gielda áigu dieđihit ođđa boahkohanbeivviin dalán, go ožžot sihkkaris dieđu ođđa boahkuid mearis ja áigetávvalis.

Váttisvuođat boahkuid fidnemis váikkuhit maiddái Anára gieldda boahkohemiide. Dál gielddas sáhttet vel bidjat boahkuid daid badjel 80-jahkásaččaide, geat ledje várren áiggi. Earát galget vuordit ja sidjiide almmuhti, go boahkut leat fas fidnemis.

Dálá dieđu mielde Anára gielddas jotket boahkohemiid fas 1.3.2021 rájes.

Soađegili giela sávvá iežas dieđáhusas ain mášu vuordit iežas boahkuhanvuoru. Dán muttus gieldda koronarávventelefovdnii dahje infekšuvdnavuostáváldimii ii galggašii riŋget koronaboahkuhemiid áigetávvala dahje boahkuid áigevárrema birra.

– Dál lea deháleamos sihkkarastit boahkuhemiid fidnašuvvama vuos dakkár riskajoavkkuide, geat leat stuorámus buohccánáitaga vuolde. Buohkat geat háliidit, bohtet fidnet boahkuid vuorustis, dieđiha Soađegili gielda.

25.1. dii. 15.05 Lappi guovlohálddahusdoaimmahat jotkkii badjel 50 olbmo dilálašvuođaid ráddjehusaid

Badjel 50 olbmo dilálašvuođat leat gildojuvvon Lappi buohccedikšunbire guovllus maiddái guovvamánus. Lappi guovlohálddahusvirgedoaimmahat lea mearridan joatkit čoahkkananráddjehusaid, mat leat leamašan árat fámus. Sivvan lea koronavirusnjoammumiid eastadeapmi.

Siste ja olgun ráddjejuvvon sajiin sáhttá goittotge ordnet álbmotdilálašvuođaid ja almmolaš čoahkkimiid, maidda oassálastet eanemusat 50 olbmo. Dilálašvuođain galgá čuovvut eiseválddiid njoammuneastadanrávvagiid.

Lappi guovlohálddahusvirgedoaimmahaga mearrádus lea fámus áigodagas 1.–28.2.2021. Dat guoská Lappi buohccedikšunbire guovllu nappo Eanodaga, Anára, Gihttela, Giemajávrri, Kolari, Muoná, Pelkosenniemi, Pello, Posio, Ranua, Roavvenjárgga, Salla, Suovvaguoikka, Soađegili ja Ohcejoga gielddaid.

Ášši gávnnat suomagillii dáppe.

25.1. dii. 10.56 Lappi buohccedikšunbire: Valástallangilvvuide ii galgga vuolgit iežas buohccedikšunbire olggobeallái

Valástallangilvvuide dahje eará lihkadandáhpáhusaide ii galgga vuolgit iežas buohccedikšunbire olggobeallái, ávžžuha Lappi buohccedikšunbire infekšuvnnaid bissehanossodat.

Ávžžuhus lea fámus otnážis guovvamánu 21. beaivvi rádjái.

Ávžžuhus guoská buotahkásaččaid, seamma láhkai joavkovalástallama go maiddái ovtta valástalliid olgo- ja sislihkadeamis. Ávžžuhus ii guoskka riikkajoavkodoaimma iige SM- dási ja 1. divišuvnna dási gilvvohallamiid.

25.1. dii. 10.54 Ruoŧŧa steŋge Norgga rájá

Norggas ii beasa otná gaskaija rájes Ruŧŧii. Ruoŧa ráđđehus áigu dáinna lágiin bissehit Stuorra-Británnias boahtán koronavirusvariántta, mii dál leavvá Oslo guovllus.

Norggas gal sáhttá ain beassat Ruŧŧii ovdamearkka dihte barggu dahje bearašsivaid dihte. Dát njuolggadusat leat fámus gitta guovvamánu 14. beaivve rádjai. Gielddus sáhttá guhkiduvvot, dieđiha Ruoŧa ráđđehus.

Áššis čállá NRK Sápmi.

23.1. dii. 9.15 Suopma čavge rádjejohtinnjuolggadusaid – rádjesearvvuš ii beasa šat friija johtit Supmii gaskavahku rájes

Suoma ráđđehus mearridii bearjadaga čavget rádjejohtima Suoma rájáin, amas ođđa koronavirusvariánta leavvat Supmii.

Ođđa ráddjehusaid dihtii rádjeservošis ii leat šat sierra lohpi johtit ránnjáriikkas gaskavahku rájes. Rájá rasttildeaddji ávžžuhit maiddái báhcit eaktodáhtolaš karantenii.

Geavadis johtinráddjehus guoská earáid go Suoma riikkavuložiid, daningo suopmelaččain ja Suomas ássi olbmuin lea ain riekti rasttildit rájá vuođđolága mielde. Olgoriikkain Supmii ožžot mátkkoštit suopmelačča ja Suomas ássi olbmo náittosguoibmi, guoibmi, mánná, váhnemat dahje áhkut ja ádját.

Ráddjehusat bohtet fápmui maŋŋebárgga ja gaskavahku gaskasaš ija 27.1.2021 ja dat leat fámus 25.2.2021 rádjai.

22.1. dii. 13.25 Lappis gávnnahan njeallje ođđa koronanjoammuma

Lappis leat gávnnahan njeallje ođđa koronavirusnjoammuma. Guokte dáhpáhusa leat Sallas olgoriikkas boahtán olbmuin.

Okta njoammun lea Roavvenjárggas ja okta Länsi-Pohja buohccedikšunbiire guovllus.

Länsi-Pohjas epidemiija lea vearráneami muttus, eará guovllus Lappis virusdilli lea vuođđomuttus.

22.1. dii. 10.11 Lappi mátkeealáhusa lihttu bivdá Meahciráđđehusa geahpedit turismafitnodagaid láigguid beliin

Lappi mátkeealáhusa lihttu háliida, ahte Meahciráđđehus vuolida turismafitnodagaid láigguid beliin loahppajahkái.

Lihtu mielde mannan giđa ja geasi mieđihuvvon láiggu vuolideamit ledje stuorra veahkki fitnodagaide, muhto dál dárbbašit ođđa ja guhkitáigásaš doaibmabijuid.

Lappi turismafinodagaid hálddašeaddji muittuha, ahte koronapandemiija lea bissehan riikkaidgaskasaš turismma dán dálvái. Mátkeealáhus vuordá riikkaidgaskasaš boađuid Lappi guvlui easkka boahtte dálvái.

Lihtu mielde riikkaidgaskasaš turisma buktá sullii 70 proseantta Lappi mátkeealáhusa vuovdimiin, main stuorámus oassi boahtá dálvvi áigge.

Ášši gávnnat suomagillii dáppe.

21.1. dii. 16.16 Koronavirusboahkuhusat soitet bisánit máŋgga vahkkui

Koronavirusboahkuhusat soitet bisánit Lappis máŋgga vahkkui, go dálkkasfitnodagat eai bastte doaimmahit boahkuhanávdnasiid doarvái jođánit.

Ovdamearkka dihte Anára gielda boahkuha vel dán ja boahtte vahkus riskajoavkkuid, muhto dálá dieđu mielde čuovvovaš háve boahkuhusaid ožžot easka njukčamánu álggus.

Ođđa joavkkuid eai goit soaitte beassat boahkuhit ovdal go guovvamánu bealle muttu maŋŋá. Sivvan lea dat, go dat geat vuosttaš vuorus leat ožžon boahkuhusa,galget vuoruhuvvot maiddái nuppi boahkuhusa oažžumis.

– Dáin doaimmahusmeriin mat dál leat, de eat beasa boahkuhit ođđa joavkkuid árabut. Jus AstraZeneca oažžu vuovdinlobi boahtte vahkus, de oažžut lasi boahkuhemiid. Muhto dat ii jođálmahte min barggu, čilgeLappi buohccedikšunbiire infekšuvdnadoavttir Markku Broas.

Loga lasi: Koronaboahkuhusat soitet bisánit Lappis máŋgga vahkkui, go boahkuhanávdnasat eai leat oažžumis – Broas: “Davvin buoret dilli go máŋggain eará guovlluin”

21.1. dii. 16.13 Gávcci ođđa njoammuma Lappis

Lappis leat gávnnahan gávcci ođđa koronavirusnjoammuma. Njeallje dain leat Länsi-Pohja buohccedikšunbire guovllus, guokte Kolaris ja guokte Roavvenjárggas.

Kolari njoammumat laktásit báikegottis árat gávnnahuvvon njoammunbálgái, man vuosttas njoammun lei boahtán eará guovllus Suoma. Nubbi njomohallan olmmoš lei olgobáikegoddelaš.

Ovtta Kolari njoammunbálgá njoammumiin gávnnahedje Äkäslompolo skuvlla oahppis. Kolari gielda muitalii gaskavahku, ahte njoammunáitaga dihte olles skuvlla leat bidjan erremii, ja skuvla sirdása gáiddusoahpahussii. Buohkanassii njoammunbálai laktásit goittot vihtta njoammuma, main golbma Kolaris ja guokte eará guovlluin.

21.1. dii. 9.54 THL ávžžuha doallat badjel guovtti mehtera dorvogaskka

Suoma dearvvašvuođa- ja buresveadjinlágádus THL attii gaskavahku ođđa dorvogaskaávžžuhusa. Dál olbmuid ávžžuhit doallat badjel guovtti mehtera dorvogaskka earáide. Dasa lassin lagaškontavttaid galggašii ain geahpedit.

Ođđa ávžžuhusa ákkastallet ođđa koronavirusvarianttaiguin, mat njommot ja levvet beaktilabbot go ovdal.

Muohtomáskka galggašii geavahit almmolaš sissajiin, vaikko doppe livččiige vejolaš doallat badjel guovtti mehtera dorvogaskka. THL muittuha maiddái, ahte lea dehálaš fuolahit giehta- ja gossanhygienas ja geavahit Koronavilkku-applikašuvnna.

THL ávžžuha maiddái ohcalit koronatestii unnimusge sivaid dihtii.

Gáldu: STT

21.1. dii. 8.24 Lappis gávnnahedje gaskavahku logi ođđa njoammuma

Lappis leat gávnnahan gaskavahku logi ođđa koronavirusnjoammuma. Oarje-Lappi guovllus leat guhtta ođđa njoammuma, main stuorra oassis sis ásset Ruoŧabealde.

Kolaris leat golbma ođđa njoammuma ja dat laktasit seamma njoammunbálgái, man vuosttas njoammun lea boahtán eará guovllus Suoma.

Dan lassin okta ođđa njoammun lea sihkaraston Gihttelis olgobáikegoddálaš turisttas.

19.1. dii. 17.26 Durdnosleagi ráđđi: Rádjeguovllu olbmot galggašedje garvit dárbbašmeahttun rádjerasttildeami Suoma ja Ruoŧa rájis

Durdnosleagi ráđđi ávžžuha buot rádjeservošiid olbmuid garvit dárbbašmeahttun rádjerasttildeami Suoma ja Ruoŧa rájis.

Ávžžuhusa ákkastallet rievdan koronavirushámi leavvama eastadeapmin ja ráji rasttildeaddji bargomátkejohtolaga dorvun.

Suoma ja Ruoŧa gaskasaš rádjeservošii gullet Suoma bealde Duortnus, Badje-Duortnus, Pello, Kolari, Muoná ja Eanodat. Ruoŧa beale servošii gullet Haparanda, Bájil, Badjeduortnus ja Giron.

Loga ášši suomagillii dáppe.

19.1. dii. 16.15 Ohcejoga gielda boahkuhišgoahtá dán vahkus riskajoavkkuid

Ohcejoga gielda boahkuhišgoahtá dán vahkus koronaboahkuin riskajoavkkuide gullevaš gieldalaččaid. Sii leat badjel 70 jagi deavdán olbmot ja sii, geain leat vuođđobuozalmasvuođat, mat heajudit geahppáid, váimmu dahje vuostálastinnávccaid doaibmama. Boahkuheapmái ferte várret áiggi.

Boahkuhanáigetávval badjel 70-jahkásaččaide ja riskajoavkkuide:

• Gáregasnjárga 21.1. ja 4.2.
• Ohcejohka 22.1., 29.1. ja 4.2.
• Njuorggán 28.1.

Lassedieđuid gávnnat dáppe.

18.1. dii. 8.35 Anár gielda ávžžuha Supmii boahtti olbmuid mannat koronateasttas

Suoma dearvvašvuođa- ja buresveaddjinlágadus sihke sosiála- ja dearvvašvuođaministeriija ávžžuha buot Supmii boahtti olbmuid fitnat eaktodáhtolaš koronavirusteasttas. Dát ávžžuhus ii guoskka rádjeservoša ássiid. Anár gielda ordne testema Avvila dearvvašvuođaguovddážis. Nu gohčoduvvon jođánis teastta boađus gárvána 15 minuhta siste ja dat lea nuvttá.

Koronatesttii sáhttá várret áiggi Avvila dearvvašvuođaguovddážis árgabeivviid diibmu 8.15-10.00 ja diibmu 13.00-14.00. Hohpolas áššiin sáhttá riŋget gohcci buohccedivššára nummirii birra jándora.

18.1. dii. 8.28 Norga testegoahtá olbmuid rájá alde

Norgga ráđđehus lea mearridan álggahit koronavirustestema rájá alde otne vuossárgga diibmu 18 Suoma áigge. Sámeguovllus giddejit Njávdáma rájá, dasgo dohko ii reahkká testenkapasitehta.

Deanu, Kárášjoga ja Geađgeluobbala/Guovdageainnu rádjá lea rabas diibmu 9.00-21.00.

Norgga boles sáhttá sáhkuhit daid, geat eai eat testejuvvon albma siva haga.

Lassidieđuid gávnnat dás.

15.1. dii. 16.35 Lappii vurdet boahtte vahkkui Moderna boahkuid

Lappii lea boahtimin vuosttas Moderna koronavirusboahku doaimmahus boahtte vahkus. Lappi buohccedikšunbiire vuordá boahtte vahku doaimmahusas boahtit sullii 5000 boahku.

Dearvvašvuođa- ja buresveadjinlágádus THL muitalii duorastaga, ahte Lappi oažžu Moderna boahku vuosttažettiin Suomas. Bajit infekšuvdnadoavttir Markku Broas mielde sivvan lea dat, ahte Lappis orrot olu vuoras ruovttudivššu áššehasat, geaidda Moderna boahku lea álkit doaimmahit go Pfizer ja Biontech boahku.

– Pfizer ja Biontech boahkku seailu dušše vihtta jándora suddadeami maŋŋá, go fas Moderna boahkku seailu juoba mánotbaji galbmaskáhpe temperatuvrras.

Moderna boahku lassin Lappi buohccedikšunbiirei lea boahtimin Pfizer ja Biontech boahkku boahtte vahkus sullii 1000 boahkkui. Pfizer ja Biontech boahkku lei vuosttaš koronaboahkku, mii bođii Supmii. Dainna álggahedje boahkuhemiid Lappis ođđajagimánu 4. beaivve. Dát boahkku boahtá lasi vahkkosaččat aŋkke ođđajagimánu loahpa rádjai.

Nuppi Moderna sullii 5000 boahku doaimmahusa vurdet boahtit Lappii guovvamánu álggus.

Ášši gávnnat suomagillii dáppe.

15.1. dii. 15.01 Sámiráđđi gáibida rádjeguovlluid sámiid eamiálbmotrivttiid gudnejahttima koronadilis

Sámiráđđi lea dahkan cealkámuša, mas sii gáibidit riikkaid gudnejahttit rádjeguovlluid sápmelaččaid eamiálbmotrivttiid maiddái koronadilis.

Cealkámusaš oaivvildit, ahte koronapandemiija ráddjehusat juhket bearrašiid ja servošiid, geat orrot miehtá riikkarájiid. Cealkámušas máinnašit, ahte Sápmi lea juhkkojuvvon njealji riikka rájiiguin ja máŋggat sámebearrašat ellet ja barget badjel riikkarájiid. Lassin deattuhit, ahte ráddjehusain leat leamaš mearkkašahtti váikkuhusat árbevirolaš sámi boazodollui.

Sámiráđđi oaivvilda, ahte eiseválddit eai leat vel árvvoštallan, mo čavgejuvvon rádjegohcin váikkuha sápmelaččaid kollektiivvalaš rivttiide. Seammás Sámiráđđi oaidná, ahte stáhtat galget bargat ovttas guovllu stáhtaiguin ja sámiiguin, vai rádjeguovlluid dilli buorránivččii.

15.1. dii. 7.47 Ráđđehus háliida čavget oarjeráji johtima

Suoma oarjeráji bargomátkejohtolahkii soitet boahtet ođđa karantena- ja testenvuogádagat. Dál Ruoŧa bargomátkejohtolagas eai leat anus karantenat ja testemat.

Sisáššiidministtar Maria Ohisalo muitala Ylei, ahte buot spiehkastagat koronanjuolggadusain mannojit čađa ja gehččojuvvo leatgo dat vealtameahttumat. Ohisalo mielde vejolaččat maiddái bearašsivaid geažil dáhpáhuvvan mátkkošteami rádjegohtet.

Sisáššiidministeriija válmmaštallá čavgenevttohusaid rádjejohtolahkii boahtte vahku bearjadahkii.

14.1. dii. 14.05 THL: Moderna boahkku vuosttažettiin Lappii – vel ii leat diehtu, goas boahkuid ožžot davás

USA fitnodat Moderna koronavirusboahku doaimmahit vuosttažettiin Lappii, dadjá Dearvvašvuođa- ja buresveadjinlágádusa THL bajit doavttir Taneli Puumalainen.

Moderna boahkuhanávdnasa lea álkit gieđahallat go Pfizera ja Biontecha. Moderna boahku sáhttá vurkkodit -20 galbmaceahkis ja juohkinbáikkiin dan sáhttá seailluhit mánotbaji dábálaš galbmaskáhpes. Biontech ja Pfizer boahkku gáibida seailluheapmái -70 galbmaceahki temperatuvrra.

Moderna boahkuhanávdnasa vurdet Supmii 5000 boahku mađe dán vahkus. Vel ii leat dieđus, goas boahku ožžot Lappii.

– Vel lea rabas, goas ja man olu Moderna boahkku boahtá Lappii, dadjá Lappi buohccedikšunbiire bajit infekšuvdnadoavttir Markku Broas.

Dán dilis Lappis boahkuhit olbmuid Pfizer ja Biontech boahkuhanávdnasiin. Broas muitala, ahte dán boahkuhusa ožžon olbmot boahkuhuvvojit nuppe háve seamma mearkka boahkuin golmma vahku siste vuosttas boahkuheamis.

Ášši gávnnat suomagillii dáppe.

14.1. dii. 11.15 Ráđđehus válmmastallá čavgemiid rádjejohtolahkii

Suoma ráđđehus áigu čavget rádjejohtima. Ráđđehus lea mearridan, ahte sisministeriija válmmastallá evttohusa rádjejohtolaga čavgemis rievdan koronavirushámi leavvama eastadeapmin dálá láhkaásaheami ja dan stáhtaráđđái addin mearridanvuoigatvuođa olis. Dan lassin linnjejedje, ahte olgoministeriija válmmastallá mátkkoštanráddjehusaid beaivádeami.

Ráđđehus geahččá maid, ahte gielddain ja guovlluin lea ain dárbu joatkit sosiála- ja dearvvašvuođaministeriija rávagirjjis ovdanbuktojuvvon ráddjehusdoaimmaid. Lea dehálaš, ahte leavvanmuttu doaibmabijut čađahuvvojit vuđolaččat ja seammaláhkai buot virusa leavvanmuttu guovlluin.

Dan lassin SDM ja eará ministeriijat válmmastallet evttohusa eará dárbbašlaš lassedoaibmabijuin rievdan koronavirushámi leavvama eastadeapmin ráđđehusa boahtte vahku ráđđádallamiidda.

Ráđđehus gieđahalai ráđđádallamiin ikte gaskavahku 13.1. doaimmaid koronavirusa rievdan koronavirushámiid leavvama ja epidemiija vearráneami eastadeapmin.

14.1. dii. 7.40 Suomas ja Norggas suokkardallet ođđa koronaráddjehusaid

Suoma ráđđehus lea ikte eahkes ráđđádallan ođđa koronaráddjehusain ja muitala dain otne iđitbeaivve áigge. Stáhtaministtar Sanna Marin muitalii ovdal ráđđádallamiid, ahte eanarájiide hálidit eanet testema ja maiddái čavget mátkkoštanráddjehusaid. Oktan molsaeaktun Marin mielde lea diktit dušše vealtameahttun bargomátkejohtolaga.

Sosiála- ja dearvvasvuođaministeriija kansliijahoavda Kirsi Varhila mielde eahkeda ráđđádallamiin eai suokkardallan bággotestema.

Norgga ráđđehus fas ráđđádallá vahkuloahpas ođđa koronaráddjehusain, muitala NRK. Norggas joaktašuvvet vejolaččat ain ođđajagimánu 18. beaivvege maŋŋá garra korona doaibmabijut, mat leat doaimmas dál.

Norggas háliidit maid bidjat johtui bákkolaš koronaiskama Norgga rájáin. Dan háliidit dahkat dan dihtii go njoammun lassána olgoriika mátkkošteaddjiin.

13.1. dii. 16.36 Lappi guovllus golbma ođđa koronanjoammuma

Lappis leat gávnnahan golbma ođđa koronanjoammuma.

Njoammumiin guokte leat gávnnahuvvon Länsi-Pohja buohccedikšunbiires ja dat leat boahtán Ruoŧas.

Lappi buohccedikšunbiire ođđa njoammun lea gávnnahuvvon Gihttelis olgobáikegottálaš mátkkálaččas, gii lea erremis.

Lappi buohccedikšunbiires epidemiijadilli lea ain ráfálaš, muitala bajit infekšuvdnadoavttir Markku Broas Lappi buohccedikšunbiires.

13.1. dii. 10.17. Suoma rádjesearvvuš ii beasage johtit Norgii testema haga guovtti vahkkui

Norgga dearvvašvuođadirektoráhta dieđiha, ahte rádjegielddaid olbmot, geat mátkkoštit Norgga bealde Supmii, eai dárbbaš váldit koronateastta go máhccet fas Norgii. Dat guoská sihke oanehaš gávpetuvrraid sihke guhkkit reaissuid.

Spiehkastahkan leat sii, geat leat fitnan Suomas ovdal ođđajagimánu 11. beaivve. Sii galget testehit iežaset maŋimušta ođđajagimánu 24. beaivvi.

Maiddái Suoma beale rádjegielddaid olbmot galget váldit koronateastta jándora siste das, go leat mannan Norgii. Sivvan dasa lea dat, go olles Lappi leamašan rukses guovlu maŋimuš guokte vahku siste. Dát njuolggadus lea fámus 24.1. rádjai.

Njuolggadusaide ja daidda laktáseaddji spiehkastagaide sáhttá oahpásmuvvat dárkkilabbot Helsenorge.no-neahttasiiddus.

12.1. dii. 15.55 Lappi buohccedikšunbiire ávžžuha vealtit mátkkošteami Ruŧŧii

Lappi buohccedikšunbiire ávžžuha vealtit dárbbašmeahttun mátkkošteami Ruŧŧii. Sivvan lea Davvi-Ruoŧa vearránan koronavirusdilli.

Infekšuvdnabajitdoavttir Markku Broas dadjá, ahte Lappi buohccedikšunbiires leat gávnnahan máŋggaid njoammumiid, maid vuolggasadji lea Ruoŧas dahje Länsi-Pohja buohccedikšunbire guovllus.

Mannan vahkus Davvi-Ruoŧas gávnnahedje 544 koronavirusnjoammuma, mii lea logi geardde eambo go Lappis. Lappis gávnnahedje mannan vahkus oktiibuot 46 njoammuma.

12.1. dii. 14.26 Soađegili gielda lea álggahan koronaboahkuhemiid

Soađegili gielda lea odne 12.1. maŋŋebárgga boahkuhišgoahtán koronavirusa vuostá. Vuosttažettiin boahkuhuvvojit sosiála- ja dearvvašvuođabálvalusaid bargit. Ássanbálvalalusaid ássit ja bargit boahkuhuvvojit ođđajagimánu áigge. Gieldalaččaid boahkuheamit álget maŋŋelis ja das almmuhuvvo sierra earret eará gieldda neahttasiidduin.

Soađegili gieldda koronaávžžuhusat leat fámus 31.1. rádjai. Áššis dieđiha Soađegili gielda.

12.1. dii. 7.17 Anár gielddas boahkuhišgohtet

Anára gielddas boahkuhišgohtet maŋŋebárgga 12.1. koronavirusdávdda vuostá.

Vuosttažettiin boahkuhuvvojit sosiála- ja dearvvašvuođafuolahusa bargit ja vuosttašveahkkedivššárat. Seammás álget maid bálvalandáluid ássiid ja bargiid boahkuheamit.

Gielddas čuvvot dearvvašvuođa- ja buresveadjinlágádus THL rávvagiid ja gieldda dieđáhusas muitalit, ahte Anáris besset dálá dieđuid mielde boahkuhisgoahtit badjel 80-jahkásaččaid ja sin oapmahašdivššáriid lagas vahkuid áigge.

Anára gieldda jođiheaddji doavttir Outi Liisanantti muittuha, ahte boahkuhusa maŋŋá lea ain dehálaš joatkit dorvogaskaid doallama gaskka, máskkaid geavaheami ja giehta- ja gossanhygieniijas fuolaheami.

11.1. dii. 15.07 Roavvenjárggas ahkeolbmuid ruovttudivššu bargis koronanjoammun – 11 bargi erremii

Roavvenjárgga gávpoga ahkeolbmuid ruovttudivššu bargis lea gávnnahuvvon koronavirus. Njoammuma dihte 11 bargi leat mearriduvvon erremii.

Njoammun lea gávnnahuvvon sotnabeaivve 10.1. ja njoammuma ožžon olmmoš lea leamašan barggus duorastaga 7.1. ja lávvardaga 9.1. Gávpoga mielde bargi lea barggustis suddjen iežas, nu ahte áššehasat eai mearriduvvo erremii. Sii goittotge testejuvvojit sihkkarvuođa dihte.

Koronadilli lea dál ráfálaš Roavvenjárggas, muhto njoammunmearit leat vehá loktanan, gávnnahii Roavvenjárgga gávpoga hehttehusdili jođihanjoavku odne vuossárgga. Mannan vahkus Roavvenjárggas gávnnahedje njoammumiid oktiibuot 11. Dat leat ožžon álggu eanemus osiin Lappi guovllu olggobealde.

Roavvenjárgga gávpot muittuha, ahte koronatestii galgá ohcalit ain vuollegis šielmmáin.

Ášši gávnnat suomagillii dáppe.

11.1. dii. 14.10 Vahkkoloahpa koronanjoammumat: vihtta ođđa njoammuma Lappi buohccedikšunbiires

Lappi buohccedikšunbiires leat gávnnahan vihtta ođđa koronanjoammuma vahkuloahpa áigge.

Njoammumiin golbma leat Roavvenjárggas, okta Gihttelis ja okta Kolaris.

– Golmma dáhpáhusas olbmot leat leamašan juo gárvvisin erremis. Gihttela Levis njoammuma lea ožžon olgobáikegottálaš. Ovtta Roavvenjárgga njoammuma álggu eai vel dieđe, muhto dan čielggadit, muitala Lappi buohccedikšunbiire bajit infekšuvdnadoavttir Markku Broas.

Länsi-Pohja buohccedikšunbiires dávdadilli vearrána ja doppe raporterejedje vahkkoloahpa áigge ovcci njoammumis.

Ášši gávnnat suomagillii dáppe.

11.1. dii. 8.11. Norgii beassá fas, muhto juohkehaš dárkkistuvvo

Lappi buohccedikšunbiire guovllus beassá fas johtit Norgii, go errengáibádus lea váldojuvvon eret. Rievdadusa olis besset maid Norgga bealde fitnat gávppášeamen Suoma rádjegiliin. Suomas oktiibuot čieža buohccedikšunbiire leat dál nu gohčoduvvon fiskes guovllut ja dain sáhttá fas johtit Norgii.

Finnmárkku boles čilge Facebook-beaivádusastis, ahte vaikko errengáibádus ii šat leatge, buohkat Norgii boahtti olbmot dárkkistuvvojit. Fiskes guovllus boahtti olbmuin ii goittot gáibiduvvo registreren, iige jandora siste váldon koronateastta boađus. Finnmárkku boles muittuha, ahte duššiid dihte ii oaččo dál mátkkoštit.

Lappi buohccedikšunbiire lei Norgga listtuin rukses guovlun juovlamánu 12. beaivve rájes.

8.1. dii. 15.52 FHI ođđa ávžžuhusat Suomas Norgii boahtti olbmuide

Norgga álbmotdearvvašvuođa instituhtta FHI ávžžuha burgit errengáibádusaid Keski-Pohjanmaa, Etelä-Savo, Kainuu, Lappi, Pohjois-Savo, Satakunta ja Etelä-Pohjanmaa buohccedikšunbiireid guovllus Norgii boahtti olbmuide.

Rievdadusat bohtet fápmui vuossárgga 11.1.2021 čuovganeapmái.

8.1. dii. 14.36 Lappi guovllus oktiibuot 15 koronanjoammuma jagi molsašuvvama mátkkiin

Juovllaid ja ođđa jagi mátkkálaččaid maŋis leat gávnnahuvvon dán rádjai 15 koronavirusnjoammuma Lappi guovllus. Logus leat mielde olgobáikegottálaččaid 23.12. maŋŋá gávnnahuvvon ođđa njoammumat Lappi buohccedikšunbiires.

Mátkkálaččaid njoammumiin logi leat gávnnahuvvon Gihttelis dahje Levis. Lassin njoammumat leat gávnnahuvvon Roavvenjárggas, Sallas, Anáris ja Kolaris.

– Dilli lea ráfálaš, eaige njoammumat leat dagahan stuorra njoammunáitaga vuollái gártamiid dahje joatkkanjoammumiid Lappis, dadjá Lappi buohccedikšunbiire bajit infekšuvdnadoavttir Markku Broas.

Oassi dearvvašvuođavirgeoapmáhaččain balai jagi molsašuvvama ávvudemiide laktáseaddji njoammunáitaga vuollái gártamiid, maid čuovvumuššan koronavirusnjoammumiid mearri livččii lassánan sakka.

Ášši gávnnat suomagillii dáppe.

8.1. dii. 9.50 Barents guovllus badjel 2000 olbmo jápmán koronavirusa dihte

Barents guovllus leat juo badjel 2000 olbmo jápmán koronavirusa dagahan dávdii, čállá Barents Observer. Vearrámus dilli Barents guovllus lea Davvi-Ruoŧas ja Ruošša davveoarjeosiin.

Koronavirus lea váikkuhan eanemusat Ruošša beale gávpogiidda, muhto doppe lea eanemus olmmoš. Ovdamearkka dihte Murmánska lea máilmmis stuorámus gávpot árktalaš guovllus.

Dán rádjai Murmánskkas leat jápmán 670 olbmo ja njoammumat leat oktiibuot leamašan 37 558. Murmánskka guovllus ásset sullii 700 000 olbmo.

7.1. dii. 17.31 Lappis leat addán 500 koronavirusboahkuheami – olles riikkas badjel 8000

Lappis leat boahkuhan dán rádjai sullii 500 koronavirusboahkuhusa. Dáin 300 leat addojuvvon Lappi buohccedikšunbiires ja sullii 200 Länsi-Pohjas.

Boahkuhemiin álggahedje vuossárgga Lappi ja Länsi-Pohja buohccedikšunbiirein. Vuosttažettiin boahku ožžo sii, geat barget kriitalamos bargguin dearvvašvuođasuorggis.

Lappi gielddat álggahit boahkuhemiid lagaš beivviid. Ohcejoga gielddas vuosttaš boahkuheamit álggahuvvojedje duorasta 7.1.

Lappi buohccedikšunbiires lea ulbmilin boahkuhid ođđajagimánu áigge badjel 4 000 olbmo nappo sosiála- ja dearvvašvuođasuorggi bargiid lassin beavttálmahtton ássama vuorrasat.

Boahkut čuggejuvvojit guktii, válmmašteaddji rávvaga mielde nuppádassii golmma vahku geažes vuosttas čuggemis.

Ášši gávnnat suomagillii dáppe.

7.1. dii. 17.25 Lappis gávnnahuvvon 14 ođđa koronanjoammuma

Lappis leat gávnnahan buohkanassii 14 ođđa koronavirusnjoammuma maŋŋebárgga maŋŋá. Čieža njoammuma leat Länsi-Pohja buohccedikšunbiires ja čieža Lappi buohccedikšunbiires.

Lappi buohccedikšunbiire njoammumiin njeallje leat gávnnahuvvon Roavvenjárrgas, guokte Gihttelis ja okta Soađegilis. Roavvenjárgga njoammumiid ožžon olbmuin guovttis leigga juo gárvvisin erremis, okta njoammun lea boahtán olgoriikkas ja okta eará guovllus Suomas.

Gihttela njoammumat leat gávnnahuvvon Levis fitnan olgobáikágottálaš turisttain.

Soađegili njoammun lea sihkkarastojuvvon olgobáikegottálaččas.

Ášši gávnnat suomagillii dáppe.

7.1. dii. 14.35 Stáhtaráđđi mearridii: Rádjegohcin joatkašuvvá Suoma rájiid alde

Stáhtaráđđi mearridii odne, ahte rádjegohcin joatkašuvvá Suoma rájiid alde. Maiddái rádjejohtolaga ráddjehusat bissot seammaláganin smávva rievdadusaiguin. Sivvan dasa lea koronapandemiija vearráneapmi máŋgga riikkas.

Ráddjehusat leat fámus badjelaš mánotbaji nappo 9.2.2021 rádjai.

7.1. dii. 8.29 Davvi-Norggas álggahan boahkuhemiid, Ruoŧa Norrbottenis álggahit boahtte vahkus

Maiddái Norgga bealde leat álggahan boahkuhemiid dán vahku álggus, ja ikte ožžo maid vuorrasut olbmot koronaboahkuhusa earret eará Kárášjogas ja Deanus.

Ruoŧa bealde Norrbottena guovllus boahkuhišgohtet boahtte vahkus. Ruoŧas boahkuhusa ožžot vuos sii, geat ásset dikšunossodagain sihke ruovttudivššu kundarat ja sin divššárat. Maiddái sii geat ásset dakkár olbmuiguin, leat vuosttažiid joavkkus boahkuhusa oažžumis.

7.1. dii. 7.33 Ohcejogas boahkkuhišgohtet otne

Boahkuheamit Covid-19 dávdda vuostá álget sámeguovllu gielddain. Vuosttažettiin boahkuhuvvojit dikšosuorggi bargit.

Dikšosuorggi bargit Ohcejogas ožžot vuosttas boahkuid otne duorastaga iđitbeaivve. Anár, Eanodaga ja Soađegili gielddain koronaboahkuheamit álget boahtte vahkus.

Boahkuheami ordnemis vástidit gielddat dan boahkuhanortnega vuođul mo dearvvasvuođa ja buresveadjima lágádus THL lea ávžžuhan. Ovdamearkan Avvila dearvvasvuođaguovddášis boahkuhit vuos seaŋgaossodaga bargiid dainna go ovddemustá sii dikšot infekšuvdnabuohcciid. Seammás Anár gielddas álggahit maiddái poliklinihka, laboratoria ja heahtedivššu bargiid. Dasto boahkuid fidnejit bálvalandáluid bargit ja ássit.

5.1. dii. 14.02 Lappi guovddášbuohcceviesu guovtti bargis gávnnahuvvui koronavirus – 21 olbmo gártet erremii

Lappi guovssášbuohcceviesus leat gávnnahan guovtti bargis koronavirusnjoammuma. Nubbi njoammumiin lea beavttálmahtton divššu ossodagas ja nubbi dearvvašvuođadivššu gohcinpoliklinihkas.

Bajit infekšuvdnadoavttir Markku Broas mielde njoammuma ožžon olbmot leaba bargit. Vuosttas njoammun gávnnahuvvui lávvardaga ja nubbi njoammun vuossárgga.

Njoammunáitaga vuollái leat gártan oktiibuot 21 mielbargi, geat leat biddjojuvvon erremii.

– Njoammunáitaga vuollái leat gártan olbmot gáffe- ja boradanbottuin. Pasieantabarggus geavahit máskkaid, man dihte pasieanttat eai leat gártan njoammunáitaga vuollái, dadjá Broas.

Njoammumiid gáldu ii leat vel sihkkarastojuvvon. Broas mielde lea goittotge dieđus, ahte njoammumat eai laktás oktii. Son muitala, ahte buohccán olbmuid dávdamearkkat eai leat vearrát ja soai leaba ruovttudivššus.

5.1. dii. 13.46 Lappis guhtta ođđa koronanjoammuma – Levi dilli lea ráfálaš

Lappis leat gávnnahan guhtta ođđa koronavirusnjoammuma. Golbma njoammuma leat Roavvenjárggas, okta Gihttela Levis ja guokte Länsi-Pohja guovllus.

Eará njoammumiid gáldu lea dieđus, muhto guovtti Roavvenjárgga dáhpáhusa gáldu ii leat vel sihkkarastojuvvon. Levi njoammuma ožžon lea olgobáikegottálaš mátkkálaš, muhto njoammun ii laktás makkárge restoráŋŋii dahje olgobáikái, muitalit Lappi buohccedikšunbiires.

Dán rádjai leat raporteren guđa ođđa njoammumis Levis juovllaid ja ođđa jagi áigodagas.

– Dilli orru leamen Levi oasil justa dál ráfálaš, muitala Lappi buohccedikšunbiire bajit infekšuvdnadoavttir Markku Broas.

Lea goittotge vejolaš, ahte ođđa njoammumat ilbmet maŋŋá.

Loga maid: Yle Sámi koronačuovvoleapmi 5.1. rádjái.