Vássán koronajahki leamašan lossat sámi artisttaide go konsearttat leat šluhttejuvvon dahje sirdojuvvon virtuálamáilbmái. Dat ii leat goit goddán sámemusihkkáriid bargomovtta, baicce ođđa musihkka almmustuvvá dál masá jo beaivválaččat.
Ohcejohkalaš musihkkár Anna Näkkäläjärvi-Länsman goit vel nagoda illudit, go beassá bargat musihkain. Näkkäläjärvi-Länsman joavku Ánnámáret almmustahttá dál ođđa skearru sámi álbmotbeaivvi.
– Dát jeđđe dál go lea beassan bargat albumiin ja lea beassan dahkat musihka. Dat lea hirbmat buorre dálkkas dán koronaáiggis, muitala Anna Näkkäläjärvi-Länsman.
Diibmá sámemusihkkaskearrut šaddege olahusmearri. Yle Sámi musihkkalisttuid mielde jagis 2020 almmustuvve juoba 304 ođđa bihtá.
Yle Sámi musihkkadoaimmaheaddji Pentti Kusmin muitala, ahte seamma almmustahttinritma lea joatkašuvvan dán jagi bealde: dušše ođđajagimánus 2021 Yle Sámi musihkkavuogádahkii vurkejuvvojedje juo 55 ođđa bihtá. Dat lea mánotbajis badjel beannot bihtá ovtta beaivvi ala.
Sámemusihkka beaggá viidásit
Sámemusihkka ii leat šat dušše sámiid várás, baicce luohti ja sámeartisttat leat juo mielde stuorra máilmmi lávddiin. Njuolga stuorra nástin lea báitigoahtán ISÁK-joavkku solista Ella-Marie Hetta Isaksen Norggas.
Luohti lea gullogoahtán su ja máilmmibeaggán DJ Alan Walkera bihtáin birra máilmmi. Maŋimus bihttá Sorry almmustahttojuvvui dán jagi bealde. Moadde jagi dassái ISÁK-joavku lei mielde Walkera ja DJ Steve Aoki Are you lonely-bihtás.
– Min musihka báddet olu seamma studioin Alan Walkeriin, ja sii gulle mu luođi, man sehkkejin pop-musihkkii. Sii liikojedje hui bures dán luohtesoundii, muitala Hetta Isaksen.
Hetta-Isaksenii lea dehálaš, ahte sámi musihkkáriin leat vejolašvuođat maid lebbet sojiideaset.
– Luohti, min árbevierut ja min giella, das lea alla árvu, ahte olbmot miehtá háliidit guldalit, ja doppe gávdno olu beroštupmi. Mun sávan dat buktá iešdovddu eará sámi artisttaide maid, oaidná Hetta Isaksen.
ISÁK-joavku olggosattii maid iežas ođđasamos albuma ođđajagimánus 2021. Roassut-nammasaš albumis ISÁK joatká elektrovnnalaš dánsunmusihkain.
Gajánas-joavkku skearru šattai álbmotbeaivái
Dál go sámi álbmotbeaivi lahkona, ođđa skearruid olggosaddimat maid lassánit. Earret eará Felgen Orkester almmustahttá Čuđit -skearru ja Áidna-joavku almmustahttá Viimmat -skearru.
Ohcejohkalaš Hilda Länsman joavku Gájanas buokčala dál progressiivvalaš rock máilbmái sin debyhttaskearruin.
Koronaráddjehusaid dihte Gájanas ii beasa dál johtit čuojaheamen iežas musihka, muitala Länsman.
– Dát orru ahte lea dál hui mávssolaš ja dehálaš, ahte beassá almmustahttit musihka dál, go ii muđui geava mihkkige. Dál lea buorre áigi eambboge báddet musihka, muitala Länsman.
Länsman ieš govvida Gájanasa musihka mátkin. Progressiivvalaš musihkas soitet njuikut máilmmis nubbái juoba gaskkal bihtá.
– Mii mannat vehá maid čiekŋalis máilmmiide ja de leat muitalusat earret eará vehá aktivismamielas, luonddu dili ja dan gáhttema birra ja maiddái vehá vuoiŋŋalašlágan lávlagat, dadjá Länsman.
Gáidduskonsearttain ođđa vuogit guoskkahit gehččiid
Ánnámáret-joavku vel liggedallá almmustahttinkonseartta várás Anára Sajosis. Ođđa _Nieguid dovdagat -_albuma musihkkii beassá sámi álbmotbeaivvi oahpásmuvvat virtuálakonsearttas. Ođđa musihkka lea maid earálágan, go ovddit skearruin leat gullon: váldooasis lea juoigán ja šuokŋa lea elektrovnnalaš.
Solista ieš lea gealdagasas. Virtuálahámát konsearta ii leat seamma ášši go livččii čuojaheamen live-gehččiid ovddas. Son goittotge sávvá, ahte bastá musihkainis guoskkahit olbmuid.
– Dat leage munnje hástalus, mo mun basttán dan gáiddusoktavuođa bokte dahkat. Mun in geavat nu olu sániid. Kánske duođai ferte gosnu roggat daid dovddut vai manná dat ášši guldaleaddjiide, smiehtada Näkkäläjärvi-Länsman.