Bamse-bláđi 150. nummira gudnin Bamse boahtá Sápmái. Kirsi Paltto bargá ABC-Company E-skuvllas, ja lea jorgalan ja heivehan bláđi sámemánáide 2013 rájes.
Ođđasamos bláđis lea muitalus das, mo Bamse boahtá veahkehit iežas oarpmeali Bireha gitta Johkamohkkái. Bamse beassá dán muitalusas boazomeahccái, go Bireha bohccot leat jávkamin. Dát nummir lea maid suoma- ja ruoŧagillii.
Kirsi Paltto mielas lea erenomáš dehálaš, ahte sámemánát besset dál oaidnit Bamse sidjiide oahpis birrasis.
– Bamsehan lea hui dávjá dakkár eksohtalaš birrasis, de dathan buktá dan olles máinnasmáilmmi muhtinláhkai olu lagabui go dat lea min máilmmis maiddái. Dat buktá maid sápmelaččaid oidnosii earáide ja min dat fas nanne, go beassat leat mielde.
150. nummir lea almmustuvvan dán vahkus.
