Päivännouzu-Suomen yliopisto on pannuh rattahile karjalan kielen elvytysprojektan. Ezmäzikse projektan hantuzis kyzelyankietan vuoh kerätäh yhteh karjalanpagizijoi sego karjalan kielen suvaiččijoi.
Karjalan kielen tilandehtu tahtotah tiijustua parem, sendäh gu karjalankielizet eletäh Suomen eri čuril.
– Karjalan kielen elvytändy eruou ezimerkikse saamen elvytändäs sil, gu saamelazil yhtelläh on oma kodirandu pohjazes, nenga sanou Päivännouzu-Suomen yliopiston karjalan kielen da karjalazen kul’tuuran professoru Helka Riionheimo.
Karjalastu videodu da paginua tahtotah enämbi
Elvytysprojektah tahtotah synnyttiä pienembii projektazii, kudamii voit todevuttua projektan hantuzis: karjalankielizii kerholoi, pidoloi libo opastundumaterjualoin luajindua.
Riionheimon mugah projektah äijäl tahtottas suaja moizii projektazii, kuduat liityttäs audiovizualizen materjualan luajindah.
– Niilöis on suurdu vajavuttu karjalan kielen opastandas. Ei tävvy ezimerkikse videomaterjualua vuoropaginois, kudamien vuoh vois opastua pagizemah karjalakse.
Riionheimon mugah projektan hantuzis tahtottas luadie enäm ruaduo lapsienke paistavah karjalan kieleh niškoi.
– Myöhäi tiijämmö, gu suomeksegi lapsienke pagizemmo eri luaduh, migu aiguhizienke. Olen sidä mieldy, gu perehet, kudamis on lastu, tahtottas suaja tugie moizen kielen opastundas.
Suurembat tavoittehet vuotetah
Karjalan kielen elvytysruado mulloi siirdyi Päivännouzu-Suomen yliopistole bankrotakse mennyön Karjalan kielen seuralpäi. Yliopisto on suannuh kahtekse vuottu elvytysprojektah niškoi kaikkiedah 200 000 euruo.
Karjalan kielen elvyttämizeh liittyy sežo suurembiigi tavoittehii, kudamien todevuttamizeh ei ole mahtuo nämmien kahten vuvven aigua, nenga sanou Riionheimo.
Niilöih tavoittehih näh vuotetah valdivon kielipoliittistu programmua, kudamua nygöi varustetah oigevusministerstvas.