Filbmadahkki Suvi West lea álggahan Gieddegeašgálgu bálvaleaddjit -nammasaš podcásta. West vuolgá podcástas ohcat vugiid sámáidahttit filbmamáinnasteami ja dan bokte son vuoddju maid sámeservodaga rašes gažaldagaide.
Podcásta vuosttas oassi lea almmustuvvan otne bearjadaga. Vuosttas oasis guossin lea sápmelaš-blackfoot filbmadahkki Elle-Máijá Tailfeathers.
Podcástas leat čieža oasi, main leat mielde oktiibuot guhtta guossi. Guossin leat Tailfeathersa lassin sápmelaš filbmadahkkit ja mediasuorggi bargit Aslak Paltto, Jorma Lehtola, Silja Somby, Pauliina Feodoroff ja Ánne Kirste Aikio. Singuin West sagastallá earret eará tabufáttáid gieđahallamis, bassi báikkiid govvemis, filbmabargiid heajos dietnasis ja nissoniid sajádagas sámeservodagas.
Suvi West oaččui jurdaga podcástii Siidaskuvla-fidnu olis. Siidaskuvllas leat mielde dáiddárat, dutkit ja servodatberošteaddjit. West bargun fidnus lei guorahallat sámi máinnastanárbevieru filmmaid bokte.
– Dat lea mu persovnnalaš beroštupmi diehtit, ahte mo mii sáhtášeimmet bargat sámefilmmaid nu, ahte dat leat sámi vugiin dahkkon iige nu, ahte sápmelaš bargá oarjemáilmmi vugiin filmma. Dás lea olles dat jurddašeapmi vuolgán johtui.
"Vuolggasadjin lea ráhkisvuohta"
Filmmaid lassin podcást gieđahallá servodatlaš áššiid ja sámeservodaga čuolmmaid. West háliidii hukset ságastallama, mas beassá ovttas gussiin guorahallat daid áššiid čiekŋalit.
– Jurddan lea, ahte mii galggašeimmet ráhkadit sámeservodagas dakkár báikki, mii lea buorre báiki buot lahtuide. Ja viggat smiehttat, mo min servodat livččii lieggasut ja válddášii vuostá buotlágan olbmuid, leš dál sáhka seksuálavehádagain ja sis, geat leat fárren eret Sámis.
– Jurddan lea guorahallat, ahte mo mii sáhttit veadjit buorebut álbmogin. Vuolggasadjin lea ráhkisvuohta. Jus mii eat ráhkistivčče dán álbmoga, de eathan mii beroštivčče, lasiha Suvi West.
Yle ja Siidaskuvlla buvttadan podcástas almmustuvvá ođđa oassi juohke bearjadaga diibmu 12.00. Ođđa oasi sáhttá guldalit Yle Areenas ja seamma beaivve diibmu 18.30 Yle Sámi rádiokanálas.