Sámenuoraid dáiddadáhpáhusa vuoitit leat čielgan.
13–20-jahkásaččaid luohká vuittii Ohcejoga sámelogahat ja juhkkojuvvon nuppi sajis ledje Čeavetjávrri skuvla ja Heahtá badjedássi ja logahat.
Vuollái 13-jahkásaččaid luohká vuoiti boahtá Gárasavvona skuvllas, nubbin lea Čeavetjávrri skuvla ja goalmmádin Anára skuvla.
Dasa lassin gudnemáidnašumi oaččui Sámegiela gáiddusoahpahusfidnu oahppiid video.
Sámenuoraid dáiddadáhpáhus dollojuvvui dán jagi gáiddusin interneahta bokte otne maŋŋebárgga. Sámemánát ja nuorat galge muitalit videos das, mas sii leat čeahpi ja gilvui oassálasttege 38 video.
Dáiddadáhpáhus dollojuvvui juo nuppe gearddi maŋŋálagaid gáiddusin koronaepidemiija dihte. Dáiddadáhpáhus lea lágiduvvon juo gitta 1970-logu rájis.
13-20-jahkásaččaid luohká vuoitit
1. sadji: Traditional Goahka Show, Ohcejoga sámelogahat: Senja Aikio, Elle Raudasoja ja Jesse Ruokolainen, bagadalli Solja Magga.
2. sadji: Mij leäʼp čieʼpp mainstõõllâd, Čeavetjávri skuvla: Veera Nykänen, Maija Leivo, Markus Porsanger, Johannes Porsanger, Janna-Maria Semenoff, Inari Jomppanen, Iida Jomppanen ja Anna Lias. Bagadalli Hanna-Maaria Kiprianoff.
2. sadji: Mii leat čeahpit suohtastallat ja ráfáidit, Hetta badjedási ja Eanodaga duottarlogahat: Sara-Elina Valkeapää, Biret Juliánná Hætta, Elen-Anne Juuso, Paulus Labba, Per-Jona Labba ja Máret-Elle Valkeapää. Bagadallit Anne-Mari Kukkonen ja Sinikka Labba.
Vuollái 13-jahkásaččaid vuoitit
1. sadji: Mun lean čeahppi dánsut, Gárasavvona skuvla:Ebba Vallkeapää, bagadallin Taina Syväjärvi.
2. Muäna leäʼp čieʼpp räppjed-Maaski tueʼǩǩen, Čeavetjávri skuvla: Ilmari Leivo ja Aarni Seri. Bagadalli Hanna-Maaria Kiprianof
3. Mii leat čeahppit dahkat vaikko maid, Anára skuvla: Biret-Elle Ruotsala, Sara Ellen Safronova, Ksenja Tervaniemi, Ann-Elle Näkkäläjärvi, Gábrellen Wolfiina Magga, Paulus Rauhala, Uula Kosonen, Juhan-Henrik Magga, Ante Mihkkal Safronov ja Nils-Matti Paltto. Bagadalli Siiri Magga.
Gudnemáinnašupmi: Čepis viiljah, Sámegiela gáiddusoahpahusfidnu: Benjamin Erola ja Kaius Erola, bagadalli Henna Aikio.
Yle Ođđasiid Sámis ja Beaivvi ságaid sáhtát maid guldalit Yle Areenas.