Dán vahkkus de ollašuvai máŋgga giellaberošteaddji niehku, go emeritusprofessor Pekka Sammallahti sámi-suoma-sátnegirjjis viimmat almmustuvai ođđa prentehus.
Ovddit prentehus sámi-suoma-sátnegirjjis nogai juo badjel 20 jagi áigi ja dan maŋŋá dat ii leat leamaš šat fidnemis.
Duodji Shop Anáris lea jođihan ođđa sátnegirjji dego varas láibbi. Vuovdi Marjinga Sara muitala, ahte beaivvis leat vuovdán jo máŋga logi sátnegirjji.
– Gal lea leamašan stuorra beroštupmi dan ektui, ahte mii leat dál beaivvi vuovdán ja gal oba máŋgasat leat fitnan juo oastime. Mii leat bidjan maiddái neahttagávpái dan, de olbmot leat doppe maiddái diŋgon, geat eai beasa dáppe gávppis fitnat oastime dan, muitala Sara.
Sara árvala, ahte sii nohkkojit oalle jođánit ja gártet vuoddját Norgga beallái viežžat girjjiid lasi prentenlágádusas.
– Olbmot leat dan vuordán nu guhká. Ja dat lea dakkár man juohkehaš gal háliida, dadjá Sara.
“Jus nohkko, de árvvoštallat deaddilit lasi”
Sátnegirjji ođđa viiddiduvvon prentehusas leat lagabui 53 000 ohcansáni, mii lea 20 000 sáni eanet go nu gohčoduvvon boares ránes sátnegirjjis.
Prentenlágádus Davvi Girjjis leat movttegat, go ođđa sátnegirji lea viimmat almmustuvvan. Lágádusa oahpponeavvodoaimmaheaddji Seija Guttorm muitala, ahte olbmot eai gal dárbbaš ballat, ahte eai fidnešii sátnegirjji.
– Mii leat deaddilahttán dan mađe, ahte buohkaide galggašii leat girji ja dan meari maid mii jurddašit, ahte márkan dárbbaša. Jusmat nohkko, dehan mii árvvoštallat deaddilit lasi daid, dadjá Guttorm.
Guttorm jáhkká, ahte sáme-suoma-sátnegirji boahtá vuovdit bures.
– Jusmat geahččá nie guhkkit áiggi, de sáhttá lohkat ahte Davvi Girji lea vuovdán olu dieid dáro-sámi-sátnegirjjiid ja sámi-dáro-sátnegirjjiid. Dat gal leat máŋgii deaddiluvvon ođđasit ja dat sátnegirjjit leat mis álot vuorkkás gal. Sátnegirjjit johtet, dieidda lea álot dárbu, dadjá Guttorm.
Yle Ođđasiid Sámis ja Beaivvi ságaid sáhtát maid guldalit Yle Areenas.