Deanu unnit oalgejogain Njiljogas, Áhkojogas ja Buolbmátjogas leat luosaid gođđunálit sturron guovtte dahje juobe golmma geardásažžan diimmáža ektui. Dattetge nálit leat unnit dásis go gaskamearalaččat, čielgá Luondduriggodatguovddáš Luke dutkamušain.
Oalgejogaide gorgŋon gođđuguolit leamašan eanaš ovtta mearrajagi dittit, muhto stuorát luosat fas leamašan hui unnán. Luke dutki Panu Orell dadjá, ahte Deanu čázadagaid luossabivdogildosis leamašan stuorra mearkkašupmi gođđunáliid stuorrumii.
Ieš Deanu ja stuorát oalgejogaid oasil luosaid goargŋuma čuovvunbohtosat gárvánit easka maŋŋeleappos čakčat. Luke árvalusaid mielde luosat leat goit čielgasit lassánan Deanu čázadagas mannan jagi ektui.
NRK: Detnui gorgŋon 40 000 ruoššaluosa
Deanu čázádahkii leat gorgŋon 40 000 ruoššaluosa dán gease, muitala NRK (siirryt toiseen palveluun). Dál ballet mii dáhpáhuvvá moatte jagi geažes go ruoššaluossa lea gođđán dál Deanu čázádagas.
Norgga dálkkádat- ja birasministeriijas leat ásahan bargojoavkku, mii galgá bargat ovttas báikkálaš doaibmiiguin Deanu luossanáli bealis. Ministeriijas muitalit, ahte Norgga ja Suoma virgeolbmot leat ovttaoaivilis das, ahte fertejit geahpedišgoahtit ruoššaluosa náli Deanus.
Yle Ođđasiid Sámis ja Beaivvi ságaid sáhtát maid guldalit Yle Areenas.
