Päivännouzu-Suomen yliopiston karjalan kielen opastuksel tänä sygyzyn on olluh poikkevuksellistu kyzyndiä. Sygyzys algajen karjalan kielen da kul’tuuran perusopindot voit suorittua sežo avvonazes yliopistos.
Enzimäzile kursoile on ilmoitannuhes rekordumiäry opastujua: ezimerkikse karjalan kielen da karjalazen kul’tuuran opastuskursal on enäm 70 opastujua da livvinkarjalan peruskursal piäl 50. Ligakuul algajale varzinaskarjalan suvimurdehen kursale sežo on tulemas tavanmugastu enämbi opastujua.
Yksi syy opastujien suureh miäräh on se, gu opastus on organizuittu muga sanotunnu hibriduopastuksennu, kuduas vuitti opastujis on paikal luvendozualas da vuitti opastumas loitoči. Sen ližäkse on mahtuo opastuo luvendotallendehien vuoh. Loitto-opastuksen täh opastujua on tulluh Suomen eri čurilpäi.
Professoran Helka Riionheimon mugah suurel vuitil opastujis ollah karjalazet juuret. Joukos on äijy mostu nuordu, ket tahtotah opastuo omassah suvun kieleh da kul’tuurah.
Päivännouzu-Suomen yliopisto vuvven allus algajen on vastannuh karjalan kielen elvytändän puoles Suomes. Yliopisto on suannuh elvytysprojektah niškoi finansiiruičendua kahtekse vuottu kaikkiedah 200 000 euruo.