Kainuun rajavardivoston Twitteras Twitterissä(siirryt toizeh palveluh) mennyt piätteniččän nägyi valvondukameran otettu kuva kondielois, kuduat astuttih toine toizen peräs lammin rannale. Vardivuksen rajavardivoazeman lähäl otetun kuvan on twiitannuh Vardivuksen rajavardivoazeman piälikkö, kapituanu Jouko Kinnunen.
– Mostu vesseliä luondo- da zvierikuvua silloi-toiči tulou meijän tehnizen valvondan kuvih.
Kinnunen ičegi kummastelehes äijän kondien yhtelaigua kamerah tallendumistu. Nennis zvierilöis kapituanu tiedäy sen verran, gu hyö kävväh syömäh rajan mollembil čuril.
– Nygöi duumaičemmo, gu hyö ollah menemäs muate talvekse.
Kondiet mennäh omih talvipezih juuri syvys-kylmykuul syys–marraskuussa(siirryt toizeh palveluh) (Suurpedot.fi). Luonnonvarakeskuksen tutkimusprofessoru Ilpo Kojola sanou, gu tagavuozinnu työnninkagluksen vuoh kačotut emäčyt mendih muate talvekse keskimiärin 12. ligakuudu.
Emäččykondiel voibi olla äijy ižäččyy
Kuvua Twitteras kommentiiruinnuot ollah kummasteltuhes, mindäh yksi kondienpoijis on mustu. Vardivuksen rajavardivoazeman piälikön mugah häi ei rubies kommentiiruimah kondieloin biolougiedu, sendäh gu ei ole sen alan specialistu, ga yhtelläh häi arvelou, gu dielo on geenois.
– Nämmä kolme ollah samazen emäčyn kondienpoijat. Yksi tovengi on muzavembi, mi voibi tulla sen tuatan geenois. Toinah kaksi ižäččyy oli käynnyh kiiman aigua emäčyllyö.
Kojolan mugah on tavalline dielo, gu emäčyl on äijy ižäččykondiedu. Nenga vikse oli silgi kerdua.
– Emäčyt muga luajitah turvuverkuo kondienpoijis ymbäri. Vierahat ižäčyt ollah varaittavat vierahih poigih niškoi, ga omii net ei tapeta, sanou Kojola.
Kuvan tarkua aijanottokodvastu Vardivukses ei malteta sanuo. Jouko Kinnuzen mugah kuva vikse on tallendunnuh mennyt nedälil.
Tehnisty valvondua käytetäh rajoin valvondan avukse da tuvekse. Vardivukses rajavardivoazemal on äijy kamerua. Toiči niilöih puuttuu kondieloin ližäkse hukkua, ahmoidu, reboidu, ilvesty, hirvie, poruo da meččypedrua.
– Onhäi moizis kuvis lykkyygi, konzu zvierit astutah juuri niilöi troppazii myöte, midä myö tahtommo kuvata. Luondo ei tiijä rajoi da luondoelätit voijah tulla dai mennä konzu da kunne tahtotah. Täl kerdua nämmä kondiet puututtih neččih kuvah.