Suomen riistukeskus on andanuh Pohjas-Savoh 42 poikkevuslubua ilveksenmečästykseh. Riistukeskus andoi enämbän kannanhoijollistu poikkevuslubua sinne, kus ilvesty on enäm.
Kolme ilvesty suat mečästiä Kuavil, Koillis-Savos, Leppävirda-Varkaus-alovehel, Pielaviel, Sonkajärvel, Varpaisjärvel da Vieremäl.
Luonnonvarakeskus arvivoiččou, gu Pohjas-Savos nygöi on läs 240 vähimyölleh vuvven igähisty ilvesty. Kanduarvivo on vähäzel pienennyh mullozeh verraten.
Poikkevuslubua annettih mullostu vähembi, da nenga Muaningan aloveh jäi nygöi luvittah. Kaikkiedah muakunnas kyzyttih poikkevuslubua 108 ilveksen kuadamizeh.
Poikkevusluvat nevvotah käyttämäh mahtollizen vahingokohtan libo eländypaikan lähäl liikkujan zvierin kuadamizeh niškoi. Mennyt mečästyskavvel Pohjas-Savos kuattih 45 ilvesty.
Ilveksen mečästysaigu on talvikuun allus tuhukuun loppussah.