Soađegilis lea vihtta jagi doaibman davvisámegielat giellabeassi Muohtačalbmi. Doppe leamašan goittotge unnán mánát ja ovddeš mánát šaddet ja vulget skuvlii.
Boahtte jagi Soađegili giellabeasis livčče sadji ođđa mánáide, muhto mo vánhemat beroštuvašedje ohcat mánáide giellabeassebáikki? Okta vuohki lea juohkit dieđu giellabeassedoaimmas.
– Dán vahku maŋŋebárgga lágiduvvo giellabeasseeahket, mas muitalit giellabeassedoaimmas ja giellalávgunmetodas, muitala Muohtačalmmi árrabajásgeassinoahpaheaddji Rebecka Kohvakka, guhte lea iešge mielde dilálašvuođas.
Justa dál Muohtačalbmi-giellabeasis leat oktiibuot guhtta máná, muhto buoremus jagiid leamašan duppal mearri das.
Giellabeassejođiheaddji: Diehtojuohkin lea vuosttaš lávki
Sámedikki giellabeassejođiheaddji Niina Aikio-Siltala muitala, ahte sihke Vuohčus ja Soađegilis leamašan unnánmánát giellabesiin. Guktuin giliin lea okta davvisámegielat giellabeassi.
Guktuin giellabesiin lea dál buorre dilli ja doarvái mánát. Livčče goittotge dehálaš oažžut lasi mánáid, vai bastet sihkkarastit giellabesiid doaimma maid boahtteáiggis, dadjá Aikio-Siltala.
– Dalle mii smiehtaimet giellabeassejođiheddjiin ja bargiiguin, ahte maid sáhtášeimmet ášši ovdii bargat vai doaibma joatkašuvvá ain maid Soađegilis ja Vuohčus. Dát diehtojuohkin lea vuosttaš lávki.
Giellabeassemánát sirdojit giellalávgunluohkkái
Soađegilis mánáin lea vejolaš joatkit sin sámegielat giellabálgá maiddái skuvllas. Dán jagi Soađegilis lea vuosttaš jagi leamašan giellalávgunluohkká, masa golbma giellabeassemáná leat sirdásan.
– Dál lea áinnas vejolaš, muhto dieđusge in dieđe mo boahttevuođas. Dat dieđusge váikkuha, ahte makkár joavkkut leat, leatgo doarvái mánát, dadjá Rebecka Kohvakka.
Kohvakka muitala, ahte sis leat oalle unnán sámegielat dáhpáhusat Soađegilis. Muhtun ovttaskas sámegielat dáhpáhusat leat duollet dálle ja dain son illuda sakka.
– Muhto árgabeaivvis juos mii johtit gosnu márkanis, de eat mii doppe nu olu beasa gullat sámegiela. Dathan livčče hirbmat somá, ahte mii beasašeimmet gullat sámegiela eanet. Juos leat buorit evttohusat, de sáhttit gulahallat, ahte mo mii ovddidit giellabirrasa dáppe Soađegilis.
Giellabeasseeahket lágiduvvo 16.11. diibmu 18 Soađegilis. Dilálašvuohta lea rabas buohkaide. Lassedieđuid sáhtát lohkat Soađegili gieldda neahttasiidus.
Beaivvi ságaid ja Yle Ođđasiid Sámis sáhtát maid guldalit Yle Areenas.