Pohjas-Karjalan alovehel liikkuu moizii jouččenii da toizii vezilunduloi, kudamil on hädä vilun siän da syömizien vajavuon täh. Linduloin muuttomatku on keskevynnyh libo jäi todevumattah ezimerkikse sendäh, gu ei täydynyh vägie libo lindu oli sattavunnuh.
SEY:n pohjaskarjalazen elättivardoičusnevvojan Niina Kettuzen mugah loppusygyzyl da algutalvel joga vuottu tulou ilmoitustu vaigevuksis olijoih jouččenih da vezilinduloih näh.
– Ilmoitustu ei tule ylen äijiä, ga yhtelläh mingi verdu niidy on suadu. Kaikkih vaigevuksis olijoih linduloih näh myö pahakse mielekse emmo tiijusta, sanou Kettunen.
Nygöi suuri lumenpano da järvilöin rutto jiädymine vaigevutetah linduloin syömizien suandua da kestavytty.
Linduloil ei ole vältämättäh sattavustu, ga muuttomatkan keskevytändy libo perävyttämine voibi vaikuttua äijäh dieloh. Ezimerkikse syömizien vajavus on voinnuh viijä linduloin väit.
Jouččenii voibi olla vaigei avvuttua, sendäh gu äijät niilöis varatah ristikanzua da pajetah jiäle, konzu rahvas opitah tulla abuh.
Jiälpäi linduu ei pie ičel ottua: se on pellastuslaitoksen ruado.
Jouččenet dogaditah kebjiembäh, ga toizilgi vezilinduloil on hädä
Jouččenet rahvas dogaditah muidu linduloi kebjiembäh, sendäh gu net ollah suuret, ga sežo toizilgi linduloil on hädä vilun siän da vezistölöin jiädymizen täh.
Nähnet vilus kärzijän jouččenen libo muun vezilinnun, soita pellastuslaitoksele libo elättivardoičusnevvojale.
Sattavunnuos luonnonelätis ilmoita soittamal hädäkeskuksen noumerah 112.
Elätin liikkehii maksau kaččuo ilmoituksen libo soiton jällesgi, da nenga sit lindu voijah teriämbäh löydiä.