Paltamon Mieslahtes päivyhoidoh käyjät lapset ollah sanottu julgi rastavanrauhan mečäle da sen elättilöile. Mečän rastavanrauhu kestäy lapsien rastavanloman aijan, pakkaskuussah.
– Lennelkäh kaiken rastavanaijan jogahine lindu rauhas, hyppikkäh jogahine oravu oksalpäi toizele sego jogahine jänöi omal välläl pitkin meččiä da oldahes rauhas kai muutgi mečän eläjät pienet dai suuret. Elettähes hyö omua välliä elostu varuamattah da älgäh niken olgah heijän tiel, nengoine on hoidopaikan rastavanrauhan julgisanomine perehpäivyhoidajan Hanna Karhun lugietunnu.
Rastavanrauhan vuoh Karhula-päivyhoidopaikan lapset da aiguhizet passiboijah meččiä kaikis sen annettavis mahtolois.
– Puaksuh kävymmö lapsienke meččäh, da meil on olluh sie vesselii kižakodvazii, sendäh tahtozimmogi nenga rastavanaigah sanuo julgi rastavanarauhan da viijä mečän eläjile magiembastu, muga sanou perehpäivyhoidai Hanna Karhu.
Nygöi lapset ollah rastavanlomal, da meččy rauhoittuu da hillenöy sen eläjien hyväkse.
– Hos ylen äijäl suvaičemmo sie olla, nygöi meččy voibi rauhoittuo, iloičeh Hanna Karhu.
5-vuodizel Sanni Korhozel on selgei vastavus sih, mindäh rastavanrauhu sanotah julgi.
– Sendäh gu mečän eläjät voidas olla rauhas eigo ni rodei torua eigo ni riidua.
Omal ruandalgi lapset voijah eistiä edehpäi rastavanrauhan todevuttamistu, nečen tiedäy Korhonen.
– Voimmo vardoija elättilöi varattavis dieloiloi.
Karhula-perehhoidopaikku on Kainuun ainavo Luonnos kois -perehpäivyhoidopaikku. Luonnos kois on Suomen Lavun koordiniiruittavua aigazen kazvatuksen ruandua, kuduah kuulutah alalline liikundu luonnon helmas, pihalolendu da luondokazvatus.
Paltamolaiset lapset julistivat tammikuuhun kestävän joulurauhan metsälle ja sen eläimille