Dán áigge máilbmi jorrá dihtoriid ja telefoniid birra. Mánát ja nuorat golahit olu áiggi beaivvis neahtas spealuid ja sosiála mediaid máilmmis. Muhto diehtitgo mii ollesolbmot, mii doppe dáhpáhuvvá ja makkár láhttema mánát vásihit neahtas?
Suojellaan Lapsia -searvvis hálidit oahpahit mánáid ja vánhemiid johtit dorvvolaččat digimáilmmis. Dál searvi lea jorgališgoahtán digidorvodáidduin plakáhtaid maid davvisámegillii.
– Mii hálidat, ahte juohke mánás lea vuoigatvuohta digidorvodáidduide iežas gillii, dadjá doaimmajođiheaddji Nina Vaaranen-Valkonen.
Searvi dutká ja analysere lobihis govvamateriálaid, mii guoskkaha mánáid. Sii leat gávnnahan, ahte nuorat ah´nuorat mánát gártet neahttamáilmmis seksuálarihkosiid gillájeaddjin.
– Lea dehálaš oahpistit máná ja seammás sihkkarastit, ahte mánás lea dorvvolaš johtit digijohtolagas, muittuha Vaaranen-Valkonen.
Vuosttas ášši maid searvvis rávvejit bargat lea váldit digiáššiid ságastallama vuollái beaivválaččat. Searvvi neahttasiidduin lea guđa rávvaga muitolistu vánhemiidda, mo eallit mánáiguin digiárggas.
Buot materiálat gávdnojit nuvttá Suojellaan Lapsia -searvvi neahttasiidduin. Vaaranen-Valkonen ávžžuha vánhemiid ja earáidge oahpásmuvvat plakáhtaide.
– Livčče buorre, jus sámegiela oahpaheaddjitge váldet daid atnui oahpahussii, sihke printejit ja heŋgejit daid vaikko luohká seinniide. Dat muittuhit ja oahpahit mánáid das, mii lea lobálaš sisdoallu ja mii fas ii, rávvesta Vaaranen-Valkonen.
Suojellaan Lapsia -searvi buvttada davvisámegielat sisdoalu ovttasbarggus Norgga beale doaibmiin ECPAT Norgein.
Beaivvi ságaid ja Yle Ođđasiid Sámis sáhtát maid guldalit Yle Areenas.