Kanzoinväline valličendukomissii on vallinnuh Kuhmon vuvven 2023 suomelas-ugrilazekse kul’tuurupiälinnakse. Pagin on enzimäzes kerras, konzu on vallittu suomelaine paikkukundu.
Kuhmos vuotetah, gu kul’tuurupiälinnan nimi lujendau linnan kul’tuurumatkuandan kehittämisty sego andau tugie kul’tuuruperindön da suomelas-ugrilazien kielien säilyttämizeh da elvytändäh kogo suomelas-ugrilazes muailmas.
Kuhmon rinnal toizennu kilbuniekannu oli Viron Iisakun linnu. Kuhmon pakičus nouzi parem nägövih omassah monipuolizen programman täh. Programmah kuuluu perindöllizii festivualiloi, kudamih suomelas-ugrilaine tiemu voibi päitä ylen hyvin.
Kuhmon kul’tuurupiälinnan programmas tuliekse vuottu on planiiruittu enäm 100 piduo. Piätapahtumu on kezä-heinykuun vaihtos piettävy rahvahanmuuzikan pruazniekku Sommelo.
Ližäkse Kuhmos pietäh ezimerkikse suomelas-ugrilazien kandurahvahien kielien azemua kaččelii kanzoinväline konferensii da Ison Karhun Kantapäillä -tapahtumu, kuduas piätiemannu on kondien merkičys suomelas-ugrilazien rahvahien mifolougies. Tiemu nägyy sežo Kuhmon kamernois muuzikas.
Avainorganizaciennu Kuhmon pakičuksen luajindas oli Runolaulu-Akademii, kudai on sežo tapahtumien keskeine pidäi yhtes Juminkevon da Kuhmon linnan kel.
– Kuhmol on äijy annettavua kogo suomelas-ugrilazele muailmale. Tämä merkiččöy tugie kielien da kul’tuuruperindölöin säilyttämizeh tutkimuksen, taijollizien tapahtumien da aktiivizen vuorovaikutuksen vuoh, nenga sanou Pekka Huttu-Hiltunen Runolaulu-Akademiespäi.
Aijemba suomelas-ugrilazen kul’tuurupiälinnan azema oli annettu yheksäle kyläle da linnale: Bugin kyläle Udmurties (2014), setukyläle Obinitsale (2015), vengrielazele Iszkaszentgyörgyn kyläle da Veszpréman linnale (2016), karjalazele Vuokkiniemen kyläle (2017), Šorunžan kyläle Marinmual (2019), marinkielizele Miškan kyläle Baškortostanas (2020), Abja-Paluojan linnale Viros (2021) da Baiterekan kyläle Udmurties (2022).