Pakingan olimpiiskoloin kižoin jälgimäine päivy toi Suomele kaksi medalii. Leijonat suadih omassah histourien enzimäzen olimpiiskoin kullan voittamal jiäkur’oin ottelus Ven’an olimpiiskoin komitietan joukkovehen lugemin 2–1.
Suomen kuldazen medalin suannuos hokkein joukkovehes keräl oli viizi omassah taibalehen aigua Kajuanin Hokis kižannuttu brihua: Atte Ohtamaa, Joonas Nättinen, Sakari Manninen, Saku Mäenalanen da Frans Tuohimaa. Hokki-kazvatti Joonas Kemppainen jäi jälgikodvazel iäres joukkovehespäi koronatartundan täh.
Sotkamolaine Kerttu Niskanen omas puoles sai bronzahizen medalin naizien 30 kilometrin vällän hiihtotavan kilvas. Medali ratkei jälgimäzen kilometrin lujas hiihtos, kuduas Niskanen ajoi läs kaiken matkan bronzas kiinni olluon Ruočin Ebba Andersonan rinnal**.**
– On ylen hyvä mieles. Sanon, gu se oli moine kova hiihto, kuduas bronzu ozutahes voitokse. Oli luja kiža da olen ozakas, gu lykystyin ottamah olimpiiskoin medalin välläl hiihtotaval, sanoi Niskanen kilvan jälles.
Kuldah hiihti Norvegien Therese Johaug, da hobjazen medalin sai Yhtysvalloin Jessie Diggins.
Suomen Krista Pärmäkoski oli kižas 10:s, Kainuun hiihtoseuran Anne Kyllönen 20:s da Johanna Matintalo 23:s.
Kyllözele rodih kilvas paha mieles, hos kanzoinväline sijoitus on olluh taibalehen paras välläl hiihtotaval.
– Allus oli pidänyh raviembah oppie lähtie parembih joukkoloih. Opiin sit aiga äijäl hiihtiä jonos da tavata iel menijöi. Igävy dielo, sit yhtelläh olis mahto suaja teräsija, nenga Kyllönen kommentiiruiččou kilbua Suomen olimpiiskoin komitietan saital.