Sámediggi ráđđádalai eana- ja meahccedoalloministeriijain mannan vahku bearjadaga 18.2. boazojámuid eastadanbargguin ja boazovahátlága heiveheamis dán dálvvi oasil. Ráđđádallamiin eai goittotge beassan ovtta oaivilii, dieđiha Sámediggi.
Sámedikki dieđáhusa mielde eana- ja meahccedoalloministeriija ii atte doarjaga Sámedikki evttohan boazojámuid eastadanbargguide iige boazovahátlága heiveheapmái dán dálvvi oasil.
– Ministeriija mielas dán dálvvi dili ii sáhte atnit spiehkastahkan, danin go arvemearit leat unnit, muitalit Sámedikki dieđáhusas.
Sámedikki nuppi várreságadoalli Leo Aikio mielas dilli lea dál vel duođalut go mannan goavvejagi 2019–2020 áigge. Dán jagi dilli guoská sullii logemat bálgosii. Vearrámus dilli lea oarjin muhto maiddái Anáris. Ovdamearkka dihtii Sállevári bálgosis dárbbašit hohpolaš doarjaga.
– Dál orru, ahte doarjja ii gávdno váttes dillái ministeriija bealis ja sii leat guođđimen boazoealáhusa birget okto dán dilis, dadjá Aikio.
Aikio lea fuolas eana- ja meahccedoalloministeriija áššedovdamušas, daningo ministeriija čuovvu boazodoalu dili dušše fal arvemeriid vuođul. Aikio oaivvilda, ahte ministeriijas eai leat dieđut guohtoneatnamiid guohppundilis dahje muohttaga čavgatvuođas.
– Luondduriggodatguovddáža galggašii bivdit čielggadit dili, das livčče sihkkarit buoret vejolašvuođat čađahit dan dutkamuša, son árvala.
Eana- ja meahccedoalloministeriija Sámedikkiin ráđđádallan virgeolbmot leat luomus, iige Yle Sápmi leat ožžon ministeriijas kommeantta.
Luondduriggodatguovddáš lea gearggus dahkat čielgadeami juos dakkára bivdet
Luondduriggodatguovddáža spesiáladutki Jouko Kumpula muitala, ahte sii eai leat vel ožžon eana- ja meahccedoalloministeriijas dieđu, ahte livččii dárbu álggahit čielggademiid dahje dutkamušaid.
– Luondduriggodatguovddáš lea goittotge gearggus álggahit, juos ministeriija bivdá dakkára dahkat, muhto dakkár bivdda ii leat vel boahtán, dadjá Kumpula.
Sámediggi lea behtton ráđđádallamiid bohtosii ja dasa, ahte ministeriijas eai ádde boazodoalu katastrofalaš dilli, oaivvilda ságadoalli Tuomas Aslak Juuso Sámedikki dieđáhusas.
Heajumus dilis buohkain ii leat vejolašvuohta joatkit boazoealáhusain boazojámuid geažil, juos dillái eai daga maidige. Sámeguovllu bálgosiin lea váttis dilli. Čakčat muhtii suhtes eatnama ala, manin máŋga báikkis bohccuid biebmu, šattut, leat guhppon. Muohta lea jikŋon dálvvi áigge nu, ahte bohccuid biebmogoaivun lea measta veadjemeahttun.
Beaivvi ságaid ja Yle Ođđasiid Sámis sáhtát maid guldalit Yle Areenas.