Kajuanin linnanteatran uuzin ozutelmu Vienanmeri tuou nägövih päivännouzupuolizen rajan merkičyksen Kainuule da Suomele.
Kanduozutuksen suovattan 26. tuhukuudu suajan ozutuksen lähtökohtannu on ilmanigäine torgumaršruttu, Vienan maršruttu, kudai on kulgenuh Vienanmerelpäi Kainuun kauti Pohjanlahteh sah.
Ozutuksen toine toizeh sidovujis starinois hiihtetäh rajan yli, kaivetah Vienanmeren kanualua, löytäh juuret rajačuran diskotiekas da itkietäh kui pihl’ai rajan tuakse hävinnyzii.
Ozutelman on käzikirjutannuh da ohjannuh Kajuanin linnanteatras sygyzyl ruavon alganuh Anni Mikkelson. Häi pagizutteli ozutukseh näh rahvastu, kuduat ollah liikuttu Kainuun, Karjalan da Ven’an rajoil.
– Vienan maršruttua pitkin on liikkunuh kui tiedomaltuo da rahvastu, mugai eriluadustu torgutavarua vuozisavoin aijan. Viriin Kainuun azemah Karjalan da Ven’an rajačural. Ozutukses pagin on nečis liikkehes rajoil kui enne, mugai nygöi.
Pohjazen arktine aloveh nygöi kiinnostau sežo suurvaldoi. Mikkelsonan mugah ozutus voibi tuvva täh paginah ristikanzanlähästy nägökohtua.
– Puaksuh ezimerkikse suuret poliittizet tapahtumat libo histouries kebjiehgi tulii ellendys ollah moizet jähmiet da buitegu sit, mi tapahtuu kustahto muijal. Neče ozutus tuou ristikanzalližuttu suurih da ilmanigäzih kyzymyksih, nenga sanou Mikkelson.
Vienanmeri-ozutelmu on luajittu yhtehizes ruavos nuantalilazen Meriteatran kel.