Skállovári skuvlastobu goluin ja muđuige bajásdoallamis vástidišgoahtá Ohcejoga gielda ollislaččat vel dán jagi áigge.
Skállováre skuvlastohpu deavdá boahtte čavčča 30 jagi. Nastola Rotaryklubi skeŋkii gárdeskuvlastohpu, vai boazobearrašiid mánát sáhttet vázzit vánhemiid luhtti skuvlla bigálusaid ja boazobargguid áigge.
Skuvlastobu ceggejedje Skállovári bigálusáidde lusa nastolalaš fitnodateaiggádat ovttas boazosápmelaččaiguin ja stohpu luovahuvvui Guovssu-ovttastusa háldui 4.9.1992. Nastola Rotaryklubis leamašan goittotge stuorra ovddasvástádus 30 jagi áigge doallat báikki ortnegis, muitala Erkki Hämäläinen Nastola Rotaryklubis.
– Min ovddasvástádus leamašan doallat dálu ortnegis ja mátki lea šaddan 2500 kilomehtera. Dál mii leat ahkeolbmot ja min návccat leat hedjonan.
Nastola fitnodateaiggádat sávvet, ahte Skállovári skuvlastobu atnet árvvus maiddái boahttevuođasge.
– Mii leat smávva ovttastussan bidjan olu návccaid skuvlastohpui ja mii sávvat, ahte skuvlastohpu adno árvvus dás ovddos guvluige nu, ahte dat ii mieskkašii duoddarii, muittuha Hämäläinen.
Gárdeskuvla lea áidnalunddot máilmmis. Ohcejoga gielda mielas váldá ovddasvástádusa skuvlastobu goluin, iihan gárdeskuvlla bajásdoallan goit gieldda burssa gurre, muitala gielddahoavda Vuokko Tieva-Niittyvuopio.
– Gielda háliida leat fárus sihkkarastimin gárdeskuvlla doaimma dás ovddos guvlui ja nu gudnejahttit dan barggu, mii lea ollašuhttán dakkár ortnega.
Gielddahoavda Tieva-Niittyvuopio lea dál báhcimin ealáhahkii ja son háliidage giittit Nastola Rotaryklubi das, go sii atnet árvvus kultuvrralašoahpahusa skuvllas. Son rámida maid Guovssu-ovttastusa olbmuid, go sii leat váldán ovddasvástádusa geavatlaččat Skállovári skuvladálus.
Beaivvi ságaid ja Yle Ođđasiid Sámis sáhtát maid guldalit Yle Areenas.