Suvi- da Väli-Suomen hiihtolomanedälit tänä vuon viettih Himoksele rekordumiärän mägihiihtäjiä. Suvi-Suomen lomanedälil registriiruittih hiihtopäivih nenga 5 prosentan da Väli-Suomen lomanedälil pandih kirjoih kai läs 15 prosentan kazvandua mullozih lomanedälilöih verraten.
Viijen iellizen kavven keskiarvoh verraten kazvandua oli läs 30 prosentua. Kaikkiedah hiihtolomanedälilöile 8 da 9 pandih kirjoih nenga 55 000 hiihtopäiviä da läs 920 000 liftannouzendua. Hiihtoloman sezonan vuitti Himoksen kaiken kavven liikehvaihtos on nenga 30 prosentua.
– Kodimuanmatkuandan da talvilajien suvaičendan kazvandu koronatilandehen hätkembäkse roites on kazvatannuh sežo meijän käyjien miäriä täl kavvel, kuigi päivänpastoine da čoma talvisiä, sanou toimitusjohtai Elsi Ojala tiijoittehes.
Koronarajoitukset ollah jälgiaigua loppiettuhes, ga ezimerkikse restoranois on viegi nevvottu käyttiä maskua da klijentoin miäriä on rajoitettu.
– Hos koronah liittyjien rajoitustoimiloin täh erähis kohtis on mendy tukkuh, klijentoilpäi on tulluh enimite pozitiivistu työndyö hyväs palvelus kui rindehil, mugai rinnehpalvelulois, sanou Ojala.
Himoksen kevät eistyy edehpäi nenga, gu sulakuul mägihiihto jatkuu ruadopäivin pohjazil rindehil da nedälinlopul kaikil rinnehalovehil Äijähpäivässäh. Äijänpäivän jälles avvoi ollah pohjazet rindehet nedälinlopul, perindön mugah Vappussah.