Giehtaruohtas lea beroštahttán jo máŋggaid jagiid ruvkefitnodagaid. Dan dihte ođđa guovlovárrenalmmuhus Ruoššačerrui ii boahtánge vuorddekeahttá Giehtaruohttasa bálgosa, Gova-Labba siidda badjeolbmui Per Ánde Labbai.
Dorvvolašvuođa- ja kemikálavirgedoaimmahat Tukes almmuhii gaskavahku, ahte dat lea dohkkehan badjel 280 njealjehaskilomehtera sturrosaš Element92 Suomi -oasusfitnodaga guovlovárrema Eanodaga Ruoššačerrui.
Guovlovárrema viidodat goittot suorggahii Labba.
– Dat olu viidasit maid ovdal lea leamašan. Dát dutkanguovlu botkelii min orohaga. Jus ruvki boahtá, de gal dat muhtimiidda dagalii loahpa. Dat boazohoidu rievddalii oalát. Giella ja kultuvrage javkálii muhtin osiin, čilge Labba vejolaš ruvkedoaimmaid váikkuhusain.
Gárvá vuostildit
Ruvkelága mielde ruvkeeiseválddi dohkkehan guovlovárren ii vuos atte lobi čađahit minerálaohcamiid. Várren addá baicca ovdavuoigátvuođa ohcat málbmaohcanlobi.
Ruvkefitnodat Element92 Suomi navdá ovddit dutkamušaid vuođul, ahte Ruoššačearus gávdno nihkkel, veaiki ja kobolta.
Gova-Labba siida lea goit gárvvis bealuštit iežaset čakča- ja dálveorohaga Ruoššačearu guovllus.
– Dás šaddá váidagiid dahkat. Eat mii goit vuollán, dás leat olbmuid ealáhusat gitta, lohká Per Ánde Labba.
Mearrádusa sáhttá váidit Davvi-Suoma hálddahusriektái miessemánu 27. beaivvi rádjai.
Beaivvi ságaid ja Yle Ođđasiid Sámis sáhtát maid guldalit Yle Areenas.
