Njuike sisdoaluide

Sámediggelága ođasmahttin ádjána ain ráđđehusa bargonoađi geažil – Sámedikki ságadoalli: “Dál lea hui hoahppu juo”

Tuomas Aslak Juuso lohká, ahte Sámediggi livččii gearggus gieđahallat ášši, gohan dat fal ovdánivčče Suoma ráđđehusas. Riekteministtar Anna-Maja Henriksson čilge, ahte máilmmidilli lea váikkuhan maid dán ášši ádjáneapmái.

Sámedikki ságadoalli Tuomas Aslak Juuso sávvá, ahte sámediggeláhkaevttohus ovdánivčče jođánit. Juuso govvejuvvon Venezia dáiddabiennála Sámi paviljoŋŋas cuoŋománus. Govva: Linda Tammela / Yle
Linda Tammela

Sámediggeláhka galggai leat riikkabeivviin njukčamánu loahpas, muhto mihkkege das ii leat gullon. Riekteministeriija neahttasiidduin ášši eai leat beaivádan.

Sámediggige bastá dušše vuordit, goas áššiin besset ovdánit Sámedikkis ja geargágo láhka ovdánit ovdal válggaid, muitala Sámedikki ságadoalli Tuomas Aslak Juuso. Čuovvovaš sámediggeválggat leat boahtte giđa ja válgalogahallamii ohcaleapmi álgá, nuba áššiin álgá leat juo hoahppu.

– Min beales lea dieđusge sávaldat ja leamaš juo muhtin áigge, ahte sii livčče sáhttán geargat. Jus galggašii ođđa láhka boahtit fápmui, de dál lea hui hoahppu juo. Válggat leat boahtimin ja válggaid lágideapmi lea álgán juo, čilge Juuso.

Son dadjá, ahte lea iešge gártan dillái, mas galgá dušše vuorddášit stáhta ovdáneame.

– Mishan lea leamaš vuordindilli oalle guhká juo, measta jahkebeali. Min beales lea sávaldat, ahte stáhtaráđđi ovdána áššiin, Juuso lohká.

Juuso: "Sávašin, ahte láhkaevttohus manašii jođánit ovddosguvlui"

Sámedikki ságadoalli Tuomas Aslak Juuso muitala, ahte Sámediggi lea gearggus ordnet dárbbu mielde liigedievasčoahkkima.

Son dadjá, ahte lea dieđusge vejolaš, ahte ášši ollešii geassemánu dievasčoahkkimii. Juuso lohká maiddái, ahte riekteministeriija lea su ipmárdusa mielde lohpidan čoahkkima ruhtadit, jus dakkára galgá ordnet.

– Sávašin goittot, ahte dát láhkaevttohus manašii dál jođánit ovddosguvlui, dadjá Juuso.

Henriksson: "Ášši ii leat nu álki"

Dárkilis diehtu sámediggelága ovdáneames ii leat. Riekteministtar Anna-Maja Henriksson lohpida, ahte ráđđehus galggašii geargat evttohusainis nu, ahte dat geargá Sámedikki ja riikkabeivviid válgabajiid dáfus áiggil.

Son čállá šleađgaboastta bokte vástádusastis, ahte ráđđehusas áššiin leat juo measta geargan.

– Lea duohta, ahte ášši gieđahallan lea ádjánan guhkkelábbui go vuos lei jurddan. Ášši ii leat nu álki, muhto ádjáneapmái lea váikkuhan maiddái áigeguovdilis dilli, ja dan mielde ráđđehusa hui garra bargonoađđi, Henriksson čilge.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat: paketissa on 10 artikkelia