Njuike sisdoaluide

Guldal jiena: Bohccoduljiin ráhkadit beatnagiidda suoskanrullaid – ođđa dienasvejolašvuohta boazodoalliide, muitalit Sámi oahpahusguovddážis

Gaskavahku ja duorastaga lea vejolašvuohta boazodoalliin dahje duojáriin fitnat oahpásmuvvamin, mo duoljis ráhkadit suoskanrulla.

Outi Jääskö ja Leena Aikio leigga maŋŋebárgga ráhkkaneamen ja navildeamen duljiid gurssa várás. Govva: Anneli Lappalainen / Yle
Susanna Guttorm

Sámi oahpahusguovddáš ordne gaskavahku ja duorastaga gurssa Doaivonjárggas, gos ráhkadit bohccoduljiin suoskanrullaid beatnagiidda. Dat sáhtášii leat ođđa vuohki boazodoalliide dinet, árvala boazodoallooahpaheaddji Outi Jääskö Sámi oahpahusguovddážis.

– Mis lea dárbu ođđa vugiide, mo mii ieža buvttadit duoljis buktaga, man sáhttá vuovdit. Dál lea mannan guokte dálvvi nu ahte mii leat gártan luotnin bálkestit duljiid, joatká Jääskö.

Bohcconáhkis ráhkaduvvon suoskanrullat leat dorvvolačča beatnagiidda. Govva: Leena Aikio / SOGSAKK

Gurssa lea jođiheamen maid prošeaktabargi Leena Aikio. Son muitala, ahte lea gávdnon johtilis vuohki navildit duljiid.

– Sullii jándoris navvánit duoljit dakkár dihtolágan entsyymain, dat ii leat kemikála. Dan maŋŋá go duollji lea luvvan dan entsyymas, de náhkki ii hakso ja dat lea vielgat, muitala Aikio.

Gursii leat bovden njeallje Sámi oahpahusguovddáža oahppi ja dasto dohko vurdet vel moadde olggobeale olbmo. Jus lea beroštuvvan áššis, de sáhttá váldit oktavuođa Jääsköi.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat: paketissa on 10 artikkelia