Ingá-Máret Gaup-Juuso ovddasta sámiid odne bearjadateahket Tønder-festiválain Dánmárkkus Liet-lávlungilvvus. Son vuittii beassážiid áigge Sámi Grand Prix -gilvvus lávlunoasi, ja árbevirolaččat Sámi Grand Prix vuoiti ovddasta sámiid.
Riikkaidgaskasaš unnitlogugielaid Liet-lávlungilvvut leat ordnejuvvon jagi 2002 rájes. Gilvui oassálastet 13 čuojahanjoavkku miehtá Eurohpá.
– Dat lea dego unnitlogugielaid iežas Eurovision- dáhpáhus, muitala Gaup-Juuso.
Gárasavvonlaš Gaup-Juuso illuda, go beassá ovddastit sámiid Dánmárkui. Son vuordá, ahte deaivvada seammás eará artisttaiguin ja musihkkajoavkkuiguin.
– Mus lea stuorra illu ja gudni vuolgit ovddastit olles Sámi. Ja mun dieđusge geahččalan mu buoremusa dahkat dan eahkeda.
Sámi artisttat leat birgen bures Liet-lávlungilvvus. Vuoittuid leat dohppen Transjoik jagis 2003, Niko Valkeapää jagis 2004, Johan Kitti ja Ellen Sara Bæhr jagis 2005, Somby-joavku jagis 2009 ja Ella Marie Hætta Isaksen jagis 2017.
Beaivvi ságaid ja Yle Ođđasiid Sámis sáhtát maid guldalit Yle Areenas.