Yle Sápmi deaivvadii Sámi girkobeivviid ráhkkananjoavkkuin Anáris. Girku sámebarggu čálli Erva Niittyvuopio,Sámi girkoráđi nuoraidbargi Sigrid Karine Paulsen ja prošeaktabargi Sara Keränen jáhkket, ahte girkobeivviid ráhkkaneapmi lea ovdánan bures.
Sámi girkobeaivvit lágiduvvojit dán geasi Anáris 5.–7.8.2022. Dán jagáš girkobeivviid fáddán leat Bassi dolla - Bassi álbmot. Prográmmas leat girkostallamiid ja semináraid lassin maiddái konsearttat. Nuoraide lea iežas prográmma olles vahkkolohppii.
Sámebarggu čálli Erva Niittyvuopio muitala, ahte buot dáhpáhuvvá Sajosa šiljus Anáris.
– Sajosa duoga beallái ja Kultahovi-hotella gaskii boahtá girkobeivviid lávvu ja Sajosa ovdda beallái boahtá borramuštealtá. Lávvordaga go mis lea workshop, de mis lea maid Sajos geavahusas, muitala Niittyvuopio.
Nuoraid prográmma álgá juo duorastaga 4. borgemánu.
– Dalle nuorat vánddardit Bielbbájávrre girkui. Obalohkái olgun dáhpáhuvvá olu ja mii sávvat uhcán čuoikkaid, beaivvádaga ja fiinna dálkkiid, dadjá Niittyvuopio.
Vuordimis sálmmat, livđet ja luođit
Girkobeaivelávus gullo sártniid lassin maiddái musihkka. Čále Jesus iežat gova -sálbmakonsearttas loaiddasteaba Anna Näkkäläjärvi-Länsman ja Raimo Paaso.
Girkobeivviid áigge lea vejolaš gullat maid Tero Harju ja Aimo Aikio Čaʹppesrääʹstes-joavku akusttalaš musihkka. Maiddái liđve ja luohti gullojit, go lávdde ala njuikejit Anna Morottaja ja Ingá-Máret Gaup-Juuso ovttas Tundra Electro -joavkkuinis.
Sámi girkobeivviid lágidit juohke njealját jagi, ja dat lea okta sámi girkoeallima mávssoleamos deaivvadansajiin. Sámi girkobeivviid leat dán rádjai lágidan Johkamohkis, Anáris, Muoffies ja Árviesjávrries.
Sámi girkobeivviid ordnejit Suoma evankelalaš-luteralaš girku sámebarggu ráđđádallangoddi, Norgga Sámi girkoráđđi, Ruoŧa Sámi girkoráđđi, Oulu bismagoddi, Anára searvegoddi, Oulu ortodoksalaš bismagoddi ja Davvi-Suoma ortodoksalaš searvegoddi.
Beaivvi ságaid ja Yle Ođđasiid Sámis sáhtát maid guldalit Yle Areenas.