Ohcejogas rahpe otne vuossárgga Giellagárdi-nammasaš giellaguovddáža. Norggas giellaguovddášdoaibma leamaš jo guhká, muhto dát lea vuosttas giellaguovddáš, mii álggaha doaimmas Suoma beale Sámis.
Máŋggagielatáššedovdi Laura Arola Deanuleagis sámástit -prošeavttas dadjá, ahte dát lea illubeaivi sidjiide.
– Mis leamašan guokte jagi stuorra Interreg-prošeakta. Mis leamašan deháleamos ulbmilin justa rahpat deike albma, bissovaš giellaguovddáža ja min fidnus leamašan Norgga bealde maid oasseváldit.
Arola joatká, ahte sii leat beassan oahpásmuvvat Norgga beale giellaguovddášdoaimmaide ja dál siige leat viimmat joavdan dán rádjái, ahte leat rahpandoalut.
– Lea dieđusge hui stuorra ja dehálaš ášši Ohcejoga gildii, muhto mun jáhkán ahte maiddái Suoma sámi servodahkii.
Ohcejoga gielda mearridii jagi 2022 bušeahttagieđahállamis vuođđudit giellaguovddaža. Giellaguovddaža nammagilvvu vuittii namma Giellagárdi. Giellaguovddáš lea sámegiela ealáskahttima guovddaš, mii lágida sámegillii giellaarenaid, ovddida gielabirrasa ja nanne gielalaš vuoigatvuođaid.
Yle Sápmi sáddii njuolggosáddaga rahpandoaluid álggus Yle Areenas. Ohcejoga gielda sáddii maid iežas njuolggosáddaga rahpandoaluin, man sáhtii čuovvut Teams bokte.
Rahpandoaluid prográmmas muitaledje Giellagárddi plánaid ja Ohcejoga gielladili birra, sámegiela ealáskahttimis rávesolmmožin ja gulle Laura Tapiola juoigamin Máttuid árdna -luđiid.
Beaivvi ságaid ja Yle Ođđasiid Sámis sáhtát maid guldalit Yle Areenas.