Lappi universitehta professor Jarno Valkonen dutkagoahtá dutkanjoavkkuinis Deanu luossapolitihka, go Suomen Akatemia juolludii dutkanfidnui 300 000 euro ruhtadeami. Luossapolitihkain sii dárkkuhit Deanu luossanáli regulerema, muitala Valkonen.
– Mii leat beroštuvvan das, makkár iešguđet dieđuide mearrádusat vuođđuduvvet, ja mo mearrádusain váldet vuhtii iešguđet dieđuid.
Valkonen čujuha dás ovdamearkka dihte báikkálaš dihtui ja guollebiologiijai. Valkonen namuha, ahte luossabivddu mearrádusaid vuođđun geavahit muhtinlágan dieđuid. Sin dutkijoavku leage beroštuvvan diehtit, makkár dieđuide mearrádusat rievtti mielde vuođđuduvvet.
Dutkanfidnu bistá njeallje jagi ja dat álgá čakčamánu álggus. Dutkijoavku vuordá barggu álgima buriin movttain. Valkonen máinnaša, ahte dutkandieđut gávdnojit jo ovddežis báikkálaččaid vásáhusaid birra.
– Báikkálaččat vásihit, ahte sin árbevirolaš dieđuid ja joga árbevirolaš hálddašanvuogádaga eai váldde vuhtii stáhta mearrádusain, son lohká.
Valtosa dutkanjoavku jáhkká, ahte báikkálaččatge hálidit oassálastit fidnui. Dát livččii dehálaš vai fidnešedje sámi árbevirolaš luossahálddašeami ja -bivddu báikkálaš vugiid vuhtiiváldot maiddái oassin guolástanmearrádusaid dahkama.
– Lea dehálaš ahte mis lea buorre gulahallanoktavuohta báikkálaš olbmuiguin ja ahte fidnet sin jiena gullosii, Valkonen dadjá.
Loga áššis lasi Lappi universitehta dieđáhusas (siirryt toiseen palveluun).
Beaivvi ságaid ja Yle Ođđasiid Sámis sáhtát maid guldalit Yle Areenas.