Mánotbaji geažes šaddá Anára girkosiiddas oalle hušša, go lea áigi ávvudit Sámi girkobeivviid. Lágideamit leat jo buori muttus, muitala girku sámebarggu čálli Erva Niittyvuopio.
– Dál álget leat jo buot dahkkit čoahkis ja buot báikkit dieđus ja nu ain.
Oassálastiid girkobeivviide vurdet 350–500, nu mo jo lávejitge girkobeivviin dábálaččat. Fáddán lea dán jagi Bassi dolla - Bassi álbmot.
– Dat fáddá dieđusge čohkke olbmuid oktii, dát sámi girkolaš eallin, árbevirolaš sálmmaid lávlun.
Dán jagáš fáttás Niittyvuopio deattuha dola mearkkašumi sámiid eallimis.
– Dola ektui badjánit máŋggalágan jurdagat, jus jurddaša vaikko lávostallama. Dolla lea dat mii čohkke daid olbmuid oktii. Ja maiddái juogadit dasto nisttiid ovttas ja dollagáttis sáhttá lonuhit jurdagiid.
Dollii laktásit iešguđetlágan mearkkašumit.
– Dolla lea dakkár fáddá, masa sáhttá čatnat ollu dehálaš áššiid, lagas olbmuid oktavuođa ja oskku.
Sámi girkobeivviin beassá vásihit sámegielaid riggodaga
Na maid de beassá olmmoš vásihit Sámi girkobeivviid? Dán gažaldahkii Niittyvuopio diehtá vástádusa.
– Don beasat vásihit dan, go olbmot čoahkkanit sierra sámeguovlluin oktii, buot daid gielaid riggodaga, Niittyvuopio muitaladdá.
Son ávžžuha oassálastiid maid searvat girkobeivviid semináraide, maid lágidit sihke bearjadaga ja lávvardaga.
– Doppe fidne buriid jurdagiid, ságastallamiid ja oktavuođa. Ja maiddái ollu dieđu, vejolaččat dakkár áššis, maid it leat vel fuomášan smiehttat.
Dasa lassin girkobeivviin beassá návddašit buori musihkas, Niittyvuopio lasiha.
– Bearjadaga sálbmakonsearttas beasat maiddái ieš lávlut ja lávvardaga guldalit Aimo Aikio ja Tero Harju, Anna Morottaja ja Iŋgá-Máret Gaup-Juuso, son logahallá.
Ja mo de gánneha ráhkkanit Sámi girkobeivviide? Gávdno aŋkke okta ášši, man gánneha váldit vuhtii Sámi geasis.
– Jurddašan gal go Gáregasnjárggas ledjen vehá áigge, ahte várra čuoikavuoiddas lea hirbmat vuogas leat fárus. Divrrit ledje ollu, Niittyvuopio čaimmiha.
Maiddái fuolkkástallan gullá girkobeivviide
– Dat sáhttá leat seammás maiddái dakkár fuolkedeaivvadeapmi, go olbmot bohtet Norgga bealde ja Ruoŧa bealde čoahkkái, muittuha girku sámebarggu čálli Erva Niittyvuopio.
Dán jagi lea goittotge váidalahtti, go Ruošša beal sámit eai máilmmi dili geažil beasa oassálastit dáid girkobeivviide
– Dat manai dál dat máilmmi dilli dánu ja dainna ferte eallit, šálloša Niittyvuopio.
Niittyvuopio ávžžuha olbmuid oassálastit girkobeivviide ja sávvá buohkaide bures boahtima.
Sámi girkobeivviid lágidit Anáris 5.–7.8.2022. Girkobeivviid prográmma gávnnat Suoma evangelalaš-luteralaš girku neahttasiiddus (siirryt toiseen palveluun). Girkobeivviid prográmmii oassálastin lea nuvttá, iige dáhpáhussii dárbbaš sierra almmuhit.
Beaivvi ságaid ja Yle Ođđasiid Sámis sáhtát maid guldalit Yle Areenas.
