Sámediggeláhkaođastus orru bisánan ja dan mieđiha maiddái riekteministtar Anna-Maja Henriksson.
– Lea váidalahtti, ahte mii eat leat stáhtaráđđehusas beassan ovttaoaivilii ja danin sámediggeláhka ain orostaddá.
Ulbmilin lei fidnet ráđđehusa evttohusa ođđa sámediggelágas ovddos guvlui riikkabeivviide giđđadálvvi, muhto nu ii šaddan.
Sámedikkisge eai sáhte eará go vuordit dan, goas áššiin besset ovdánit, ja geargágo láhka ovdal boahtte jagi sámediggeválggaid, muitalii Sámedikki ságadoalli Tuomas Aslak Juuso miessemánus.
Riekteministtar šálloša Sámediggeláhkaođastusa dili.
– Láhkaevttohus lea gal dahkkon ja livččii teoriijadásis vejolaš geiget evttohusa riikkabeivviide, muhto eat dieđusge sáhte ovddidit ášši ovdalgo ráđđehusbellodagain leat oktasaš ipmárdus áššis, muitala Henriksson.
Maiddái Ilta-Sanomat čállá stáhtaráđđehusa sierramielalašvuođain sámediggeláhkaevttohusas. Ráđđehusa láhkaevttohusat fertejit geigejuvvot riikkabeivviide maŋimustá skábmamánu 17. beaivve, vai dat gerget gieđahallamii vel dán válgabaji. Seammás lahkonit maiddái boahtte giđa riikkabeaiválggat.
Ráđđehusas leat geahččalan maiddái gávdnat soabatčovdosa
Henriksson mieđihage, ahte ášši dilli orru leamen hui váttis. Áššis leat gal geahččalan ráđđádallat, muhto dat ii oro ovdáneamen.
– Duogážis lea dat, ahte guovddášbellodagashan leamašan sierraoaivil bargojoavkku láhkaevttohussii. Ii leat mihkkige suollemasvuođaid dat, ahte guovddášbellodahkii lea váttis dohkkehit láhkaevttohusa, Henriksson čilge ášši.
Suoma Guovddáš -bellodaga vástádusas muitalit, ahte barggu sámediggelágain ferte joatkit nu, ahte dasa gávdnošii soabatčoavddus. Bellodaga mielas dálá evttohusas buot sámejoavkkut eai bisošii ođastusa maŋŋá mielde.
Ráđđehusas leat geahččalan maiddái gávdnat soabatčovdosa.
– Leat geahččalan ráđđádallat maiddái soabatčovdosiin, muhto gal dat dieđusge lea dehálaš, ahte maiddái Sámediggi miehtá láhkaođastusa sisdollui ja buoret evttohusa eat leat gávnnahan, son dadjá.
Dilli leamašan juo guhkká nu, ahte dan leamašan váttis čoavdit.
– Mu mielas dálá evttohus lea hui govttolaš ja vástida maiddái daid gáibádusaide, maid leat ovdanbuktán Supmii Ovttastuvvan našuvnnaid eamiálbmotlávdegottis, son muitala.
Henriksson lohká, ahte guovddášbellodaga duhtameahttunvuođas lea sáhka válgalogaldat áššis ja das, geat dohko lohkkojuvvojit.
– Mu mielas lea hui dehálaš maiddái, ahte Suopma váldá duođas fuomášuhttimiid, maid leat ožžon. Dát dálá dilli ii leat buorre.
Henriksson čujuha dasa, go Suopma oaččui álgogeasi fuomášuhttima Ovttastuvvan našuvnnaid nállevealaheami vuostásaš komiteas. Čovdosa mielde Suopma lea rihkkon nállevealaheami vuostásaš riikkaidgaskasaš soahpamuša sápmelaččaid válgalogahallanáššis.
Ášši dievasmahtton 12.7. diibmu 11.15 Suoma Guovddáš -bellodaga vástádusain.
Beaivvi ságaid ja Yle Ođđasiid Sámis sáhtát maid guldalit Yle Areenas.
