Detnui leat gorgŋon uhccán luosat dán geasi. Luondduriggodatguovddáža dieđuid mielde vel moadde vahku dassái dili orui mannamin buoret guvlui, muhto de luosaid mearri uhccui sakka ja vel buoremus goargŋunáiggi.
Luondduriggodatguovddáža dutki Panu Orell árvala sivvan liegganan čáziid báhkka dálkkiid geažil.
– Luossamearit galggašedje dál jo lassánit, jus mearas leš luossa vel goargŋumin.
Liikká dilli orru leamen heittot, mieđiha Orell. Luosa mearrabivddu leat geahpedan maŋimuš 30 jagis garrasit. Lágalaš áhpebivddu leat heaitán ja Norgga riddobivddu fas sakka geahpedan. Dasa lassin Deanuvuonas ja Deanus lea bivdingielddus.
– Dan dáfus Deanu goargŋunlogut leat issoras heajut, Orell dadjá.
Orell muitala maiddái, ahte máŋgga máttit jogas leamašan seammalágan dilli juo 20–30 jagi, iige bivdin dáin jogain leat šat vejolaš. Muhto vuos ii gánnet vuollánit, muittuha Orell.
Deanu goargŋunstatistihkaid sáhttá čuovvut Luondduriggodatguovddáža neahttasiiddus (siirryt toiseen palveluun).
Njávdámis leat maiddái dán geasi álgán vuosttas háve rehkenastit goargŋumiid skádjaseasaniin. Statistihkaid Njávdánjoga goargŋundilis gávnnat Luondduriggodatguovddáža neahttasiiddus (siirryt toiseen palveluun).
Beaivvi ságaid ja Yle Ođđasiid Sámis sáhtát maid guldalit Yle Areenas.