Njuike sisdoaluide

Guldal jiena: Sámedikki stivra máhcaha duohtavuođa- ja soabadankomišuvnna ášši dievasčoahkkimii

Sámedikki stivra áigu maiddái gullat čálalaččat sámeservviid ja ovttaskas sápmelaččaid áššis.

Sámedikki stivra lea mearridan, ahte duohtavuođa- ja soabadankomišuvnna ášši galgá gieđahallat ođđasit Sámedikki dievasčoahkkimis. Govva: Ville-Riiko Fofonoff / Sámediggi | Saamelaiskäräjät

Duohtavuođa ja soabadankommišuvdnaášši ja dan joatkkadoaimmat máhcahuvvojit Sámedikki dievasčoahkkima beavddi ala. Sámedikki stivra mearridii áššis čoahkkimisttis gaskavahku 31.8.

Dievasčoahkkin mearridii borgemánu álggus, ahte proseassa bissehuvvo doaisttážii ja das váldet boddu. Stivra gávnnahii, ahte mearrádusa ii sáhte ollašuhttit. Ággan lea, go dievasčoahkkimis ii lean diehtu, ahte jus bargu bissehuvvo, de kommišuvnna bargiid ferte bidjat eret barggus ja kommišuvnna bargu dan oasil nohká.

Sámediggi gieđahallá duohta- ja soabadankommšuvdnaášši badjelmearalaš dievasčoahkkimis čakčamánu 30. beaivve. Ságadoalli Tuomas Aslak Juuso ii hálit dán muttus vel spekuleret, mo ášši de ovdána.

– Geavatlaččat mii galgat juogo válljet komissáraid dahje heaittihit komišuvnna barggu.

Sámedikki stivra lea maiddái mearridan, ahte dat gullá čálalaččat sámeservviid ja ovttaskas sápmelaččaid áššis.

Stivra doarju nuortalaččaid siidačoahkkima sávaldaga, ahte proseassa joatkašuvvá nuortalaččaid oasil. Stivra sávvá, ahte duohtavuođa- ja soabadankommišuvnna bargu ovddiduvvo nuortalaččaid oasil Sámedikki dievasčoahkkima mearrádusas fuolakeahttá.

Sámesearvvit ja ovttaskas sápmelaččat sáhttet 19.9.2022 diibmu 16 rádjái addit čálalaš kommeanttaid (siirryt toiseen palveluun) stivrii duohtavuođa- ja soabadankomišuvnna dilis ja ođđa komissáraid válljemis.

Beaivvi ságaid ja Yle Ođđasiid Sámis sáhtát maid guldalit Yle Areenas.

Beaiváduvvon 5.9. dii. 14.00: Lasihuvvon diehtu ođđa dievasčoahkkima áigetávvalis.

Dievasmahtton 5.9. dii.14.18 Tuomas Aslak Juuso kommeanttain.

Ođđasamosat: paketissa on 10 artikkelia