Ohcejogas leat báhcán golbma boares skuvlavistti guorosin dan maŋŋá, go gieldda giliguovddážiidda Ohcejotnjálbmái, Njuorggámii ja Gáregasnjárgii huksejedje ođđa skuvllaid. Dál guorahallagohtet maid daiguin sáhttá bargat.
– Mii leat vuođđudan bargojoavkku čielggadit, maid guoros visttiide berre dahkat. Bargojoavku guorahallá vejolaš ođđa geavahanvugiid dahje juos ii gávdno visttiide makkárge geavahanvuohki, de ferte guorahallat dange, doallágo daid galmmasin dahje joba visttiid gaikodeami dahje vuovdima, muitala Ohcejoga gieldda giddodatinšenevra Mirja Savolainen.
Boares skuvllaid liggemis ja fuolaheames šaddet badjelmearálaš golut gildii.
– Elrávdnji ja olju mákset badjel 100 000 euro jagis ja dasa vel visttiid fuolaheamis čoggojit golut, maid sáhttá vel geardut guktii, golbmiige. Gal mii fertet mo nu fidnet goluid vulos, joatká Savolainen.
Ohcejoga gielddas áigot dál čohkket rávvagiid giddodagaid geavaheaddjiide, mo ovdamearkan šleađgageavaheami sáhttá geahpedit.
– Ii gánnet duššiid doallat čuovggaid alde ja áibmomolsuma ferte stellet buorebut, logahallá Savolainen.
Beaivvi ságaid ja Yle Ođđasiid Sámis sáhtát maid guldalit Yle Areenas.