Njuike sisdoaluide

Guldal jiena: Nuortariikalaš Stefan Palosaari fárrii Supmii ja lohkagođii gielaid – dál eallin lea dolvon su riikkaviidosaš láibungilvui

Palosaari beroštahttet gielat ja láibun. Son hállá njuovžilit davvisámegiela ja lea mielde Koko Suomi leipoo -nammašas tv-prográmmas.

Stefan Palosaari lea giellaberošteaddji ja erenomážit su beroštahttá fuolkegielaid veardádallan. Govva: MTV / Saku Tiainen

Stefan Palosaari fárrii Supmii vuosttas háve 16-jahkásažžan logahaga molssastudeantan.

– Dalle mun liikostin Supmii ja mun jurddašin, ahte hálidan fárret dohko nu johtilit go vejolaš, son dadjá.

Nuortariikalaš Palosaari fertii máhccat ruovtturiikasis vel moatte jahkái, ovdalgo beasai fas ruovttoluotta Supmii.

Son fárriige de Oului gazzat duiskkagiela váldoávnnasoahpu Oulu universitehtii. Dasa lassin Palosaari logai earáge gielaid, nu maiddái davvisámegiela.

– Mun lean álo liikon gielaide, lohká son.

Davvisámegiela son logai álggos vierisgiellan ja dan maŋŋáges ozai eatnigielagiid beallái joatkit oahpuidis. Sámegiela son logai dieđusge suomagiela bokte ja suomagiela son oahpahallagođii jo Nuortariikkas.

"Njuovžilit mun máhtán viđa giela"

Palosaari máhttá bures aŋkke viđa giela.

– Mu eatnigiella lea duiskkagiella, Nuortariikkas hállet duiskkagiela. Njuovžilit mun máhtán viđa giela, dat leat duiskkagiella, suomagiella, eaŋgasgiella, fránskkagiella ja davvisámegiella, son logahallá.

Dasa lassin giellaberošteaddji lea lohkan vel earáge gielaid.

– Lean lohkan olu olu gielaid ja máhtán vehá hállat maiddái kiinnágiela. Ledjen universitehtas guhtta mánu Kiinnás molssastudeantan, muhto dál in gal šat máhte nu bures kiinnágiela.

Son lea lohkan vehá maiddái iirragiela, nuortalašgiela ja ruoššagielage.

Fuolkegielaid lohkan beroštahttá

Mielamiel giela lea váttis namuhit, muhto fuolkegielaid lohkan ja veardádallan lea Palosaari miela mielde.

– Mun liikon hui olu suomagillii ja sápmelaš gielaide. Mun liikon unna gielaide, nugo maiddái iirragillii.

Son smiehtai álggos maiddái ungáragiela lohkama, muhto dat lei menddo gáiddus fuolkegiella. Esttegiella fas lei menddo lahka suomagiela. Dalle Palosaari gávnnahii ahte sámegielat heivejit sutnje.

– Mun smihtten ahte livččii somá lohkat muhtin suoma fuolkegiela. Mu mielas lea hui gelddolaš guorahallat fuolkegielain, mii áššiid lea seammalágan dahje earálágan, son čilge.

Gielaid lohkama lassin Palosaari liiko láibut

Palosaari lea ássán Suomas juo guhkká ja gielaid lohkama lassin son liiko láibut. Son lea mielde Koko Suomi leipoo -nammasaš láibungilvvus. Isidis lei hásttuhan Palosaari ohcat gilvui ja nu son beasaige dasa mielde.

– Dat lei hui hui somá, son čaimmiha.

Prográmma govvejuvvui geassemánus ja dat oidno dál maiddái televišuvnnas.

– Mun liikon láibut ja lean jo mánnán oahppan eatnis láibut, son muitala.

Palosaari mielas lei somá beassat oahpásmuvvat eará oassálastiide.

– Lei maiddái miellagiddevaš oaidnit mo tv-prográmma dahket, son lasiha.

Láibun son liiko geahččaladdat ođđa gáhkuid ja reseapttaid, muhto moallodáiggi (su. murotaikina) son láve dávjá duhppestit.

– Dan ohppen mánnán eatnis ja dan geavahan hui olu, son lohká.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat: paketissa on 10 artikkelia