Njuike sisdoaluide

Guldal jiena: Sunna Nousuniemi oanehisfilbma lea bálkkašuvvon Nuuk filbmafestiválas – "In lean máhttán dákkára vuordit"

Filbma muitala bagadalli Sunna Nousuniemi iežas vásihan seksuála veahkaválddis. Son lea lihkolaš ja giitevaš, ahte su oanehisfilbma lea beakkehan maid eará guovlluin máilmmis go dušše Sámis.

Sunna Nousuniemi lea ráhkkaneamen dán vahkus govvegoahtit ođđa filmma, man guovddážis lea su áhkku ja iežas soga luođit. Govva: Sáárá Seipiharju / Yle

Anárlaš bagadalli Sunna Nousuniemi dokumentára Boso mu ruovttoluotta lea vuoitán Ruonáeatnamis Nuuk riikkaidgaskasaš filbmafestiválas (NIFF) buoremus oanehisfilmma bálkkašumi. Nousuniemi oaččui dieđu bálkkašumis lávvardaga go lei ustiba heajain.

– Lei muđuige dakkár ávvudovdu, de galhan dat lei illusáhka go gullen. In lean máhttán dákkára vuordit, muitala Nousuniemi iežas álgodovdduin.

Filbma muitala su iežas vásihan seksuála veahkaválddis. Nousuniemi lea lihkolaš ja giitevaš, ahte su oanehisfilbma lea beakkehan maid eará guovlluin máilmmis go dušše Sámis.

– Munnje boahtá dakkár dovdu, ahte lea luohttámuš. Vuosttažettiin ráhkadan filmmaid iežan servoša várás, muhto dasto nubbin leat eará eamiálbmogiid servošat.

Nousuniemi muitala, ahte suopmelaš filbmafestiválaide fas leamaš váttis oažžut filmma čájeheapmái. Siva son ii dasa dieđe, sáhttá dušše árvádallat.

– Mun lean geahččalan dan guorahallat, muhto dan lea váttis dadjat. Doppehan leat iešguđetlágan olbmot válljemin daid filmmaid, olu datge váikkuha. Soaitá dieđusge leat, ahte leago menddo garra fáddá, ahte eaigo olbmot leat gergosat čájehit dan. Dahje eai dieđe mo dat čáhká daid eará filmmaiguin, smiehtadaddá Nousuniemi.

Son lea ráhkkaneamen dán vahkus jo govvegoahtit ođđa filmma. Dan sisdoalus Nousuniemi ii hálit vel olu muitalit.

– Dat lea ovttaláhkai joatkka dan Boso mu ruovttoluotta -dokumentárii, muhto dat lea geahppasut filbma. Das lea guovddážis mu áhkku ja mu soga luođit. Dan sáhtán namuhit goit, dadjá Nousuniemi.

Yle Ođđasiid Sámis ja Beaivvi ságaid sáhtát maid guldalit Yle Areenas.

Ođđasamosat: paketissa on 10 artikkelia