Njuike sisdoaluide

Säiʹmm pohtt määusteʹmes sääʹmkulttuur šõddmõõžžid Porotila Sanilaaʹje da Äʹvv-muʹzeeja tän neäʹttel

Säiʹmm jääʹrjast kueʹhtt määusteʹmes sääʹmkulttuur šõddmõõžž 21.–22.9.2022 Porotila Sanilast da Äʹvv-muʹzeeʹjest. Šõddmõõžži teeʹmmen lie ǩiõtt-tuâj da Peäccam vuuʹd historia.

Sääiʹm vuäzzla Venke Törmänen, Tuuli Malla, Mirva Tapaninen, Maria Kemi Rein, Maria Nordvall da Mari Gauriloff jäʹrjste fiʹlmmčuäjtõõzzid Jokkmookkâst mõõnni ǩiiđ. Govva: Tuuli Malla

Porotila Sanilast Kirakkajääuʹrest lij 21.9.2022 lääiʹjtuâjai tuâjjpõrtt da čuäʹjtummuš Ruõcc peäʹl säʹmmlai vuäʹddtuâjai pirr. Äʹvv Saaʹmi muʹzeeʹjest Njauddmest prääzkjet 22.9.2022 Unelma Jäämerestä – Petsamo kartoissa -čuäjtõõzz ääʹvummuž.

Šõddmõõžži jäʹrsteei lij Säiʹmm. Mõõnni eeʹjj vuâđđuum Säiʹmm jääʹrjast sääʹmkulttuur šõddmõõžžid Lääʹddjânnmest, Ruõccâst da Taarâst. Sääiʹm vuäzzla lie projeʹkttkoordinaattor Tuuli Malla, Sääʹmkulttuurfondd, Äʹvv-muʹzei, Jokkmookk Ájtte-muʹzei, Hanna-Maaria Kiprianoff da Venke Törmänen. Sääiʹm tååim tuärjjad Tâʹvvjânnam ministersuåvtõs.

Tän räjja mij leäʹp jäʹrjstam digitaalʼlaž čuäjtõõzz da fiʹlmmčuäjtõõzzid Jokkmookkâst. Täʹst lij jurddjen puʹhtted õʹhtte kulttuurtuâjjlaid Sääʹmjânnmest, särnn Malla.

Sääʹmkulttuur šõddmõõžž čuäjtâʹlle ǩiõtt-tuâj da Peäccam historia Porotila Sanilast da Äʹvv-muʹzeeʹjest

Seärad 21.9.2022 čiâss 14–17 tuejjeet lääiʹjtuâjaid Porotila Sanila kuäʹđest. Tuâjjpõõrt jååʹđteeʹjen tåimma Mirva Tapaninen da Venke Törmänen. Tuâjjpõʹrtte ij taarbâž puʹhtted jiijjâs lääiʹjid ni ǩiõtt-tuâjjneävvaid, peʹce puk lij puhttum vuässõõttjid valmmša määusteʹmes tuâjjpõʹrtte.

Tuâjjpõõrt ääiʹj Ájtte-muʹzeei Maria Nordvall mušttal Jokkmookk vuuʹd vuäʹddtuâjai pirr.

Maria maainast eŋgglõsǩiõl da mij vueiʹttep jåårǥlâʹtted. Vieʹǩǩtep kueiʹmeen fiʹttjed, ceälkk Malla.

Neljdpeeiʹv 22.9.2022 čiâss 16.30–19.30 Taar ääiʹj prääzkjet Äʹvv-muʹzeei ođđ čuäjtõõzz ääʹvummuž. Ääʹvummša lij määusteʹmes sizzpiâssâm.

Norldõk lij lääinast Ruäʹvnjaarǥ gååradǩeʹrjjpõõrtâst. Ääʹvummšest lij Irja Jefremooff looǥǥâlm Peäccam saaʹmi čõõđäiggsaž jälstemsââʹjjen. Kuullâp še Hanna-Maaria Kiprianooff leuʹddjummuž.

Looǥǥâlm vuäitt seuʹrrjed livestream pääiʹǩ. Jõs taarbaš säätt ääʹvummša, vuäitt väʹldded õhttvuõđ Tuuli Mallaaʹje, Sääʹmkulttuurfoʹndde leʹbe Äʹvv-muʹzeeja.

Lââʹzz sääʹmǩiõllsaž ođđsid vuäitak ǩiõččâd Yle Ođđâz-seeidast da kuvddled Nuõrttsäämas-seeidast Yle Areenast.

Ođđasamosat: paketissa on 10 artikkelia