Njuike sisdoaluide

Stáhtabudjeahtas miljonbeali lasáhus Sámedikki hálddahusa nannemii

Stáhta budjeahttaárvalusas 2023 lea Sámedikki hálddahusa resurssaid nannemii lasáhus. Oahppamateriála ruhtadeapmi bissu stáđisin.

Suoma oaiveminister Sanna Marin deaivvadii Sámedikki ovddasteaddjiiguin Anáris geassemánus 2022. Govva: Vesa Toppari / Yle

Sanna Marin ráđđehus lea addán Suoma stáhta boahtte jagi ruhtadoalloárvalusa riikkabeivviide. Stáhtta laige dán vuoro bealle miljon euro lasáhusa sápmelaččaid kulturiešmearrideami ollašuhttimii. Mearreruđa olles submi lea badjelaš 4,4 miljon euro.

Lasáhus boahtá riekteministeriija hálddahussuorggis. Mearreruđa lasiheamis stuorámus oassi lea oaivvilduvvon Sámedikki hálddahusa resurssaid buorideapmái, čállá riekteministeriija dieđáhusastis.

Dárkilabbot budjeahttaárvalusas máinnašuvvo dat, man veardde lea oaivvilduvvon almmolaš doaimmahaga, sámegiela doaimmahaga ja sosiála- ja dearvvasvuođasuorggi resurssaid nannemii.

Kulturmearreruđa olles submi lea boahtte jahkái 4 422 000 euro. Golmma ovddit jagi dát mearreruhta sápmelaččaid kulturiešmearrideami ollašuhttimii leamaš vuollái 4 miljon euro.

Oahppamateriálaruhta bisson guhká seamma sturrosažžan

Mearreruhta sámegielat oahppamateriála buvttadeapmái lea bisson juo guhkit áigge bealle miljon euros, ja nu ráđđehus evttoha boahtte jahkáige.

Borgemánus ruhtadoalloministeriija almmuhii iežas budjeahttaárvalusa. Dalle juo máinnašuvvui, ahte momeanta, mas lea dássážii várrejuvvon mearreruhta sápmelaččaid duohtavuohta- ja soabadanproseassa várás, váldojuvvo eret stáhtabudjeahtas. Proseassa várás lea ovddit stáhta budjeahtain čujuhuvvon ruhta ja das lea báhcimin jahkái 2023 oassi, sullii 150 000 euro.

Jagi 2023 stáhta ruhtadoalloplánas lea váldojuvvon vuhtii, ahte boahtte jagi ordnejuvvo sámediggeválga, ja dan várás lea juo várrejuvvon mearreruhta.

Suoma ruhtadoalloministeriija almmuhii budjeahttaárvalusa (siirryt toiseen palveluun) vuossárgga čakčamánu 19. beaivve eahkedis.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat: paketissa on 10 artikkelia