Njuike sisdoaluide

Sámegielddat veahkehit dárbbu miel olbmuid boahtte dálvvi šleađgarehkegiin – Kirsti Paadar ii leat vel suorganan šleađgahattis

Liggengoluid divrun sáhttá buktit ruđalaš váttisvuođaid máŋgasii boahtte dálvve. Sámegielddat eai leat dahkan dárkilut ráhkkananplánaid veahkehit olbmuid, muhto veahkehit gal dárbbu miel heahtedilis.

Kirsti Paadaris eai dalán noga hálggut gaskan. Son dárbbu miel viežžala muoraid ránttehis go dárbbaša dolastallat. Govva: Vesa Toppari / Yle

Davvin olbmot ásset guhká iežaset bearašviesuin. Daid liggen soaitá šaddat divrrasin boahtte dálvvi áigge go elrávnnji hatti einnostit leat erenomáš badjin. Ohcejohkalaš Kirsti Paadar dállu lieggana oljuin ja áibmoliggenpumppain, mii geavaha šleađgga. Son goittot ii leat vel fuolas liggengoluid divrumis.

– Dan gal in leat jurddašan duođi eanet, go dathan lea vehážiidda divron ja divron, badjánan ja badjánan, muhto dat lea dál nie, de dashan ferte dohkkehit, smiehtada Paadar gievkkanbeavddi guoras.

Paadar lea luđen nieiddas vehkiin applikašuvnna telefonii, mas čuovvu šleađgahatti ja dan goas gánneha ovdamearkan bassaladdat.

– Árraiđit lea hálbbimus, dalle galgá bassaladdat. In mun dalle bija bassaladdanmášena go iđđes. Mushan lea dalle áigi bassaladdat. Beaivithan dat loktana, go olbmot geavahit šleađgga, muitala Paadar.

Son jáhkká dálá šleađgarehkeda lassánit beliin, muhto jáhkká iežas burssa vel gierdat dan.

– Moson dat lea 100 euro sullii leamaš dál mánotbajis, muhto jos dat nubbi 100 euro, de gal dat várra gierdá.

Kirsti Paadar Ohcejogas ii leat vel suorganan šleađgahatti divrumis. Son jáhkká nákcet ain máksit boahtte dálvvige šleađgarehkegiid veahki haga. Govva: Vesa Toppari / Yle

Gielddat lohpidit veahkehit heahtedilis

Liggengoluid divrun sáhttá buktit ruđalaš váttisvuođaid. Sámegielddat eai leat dađe eanet dahkan ráhkkananplánaid veahkehit olbmuid, muhto veahkehit gal dárbbu miel jus ruđat nohkket iige bastte šat máksit elrávdnjerehkegiid.

– Dieđus mii ovddemužžan ávžžuhit váldit oktavuođa Álbmotealáhatlágádus Kelai ja ohcat doppe ruhtadoarjaga, muhto jus ii doppe oaččo, de dasto suokkardallat eará čovdosiid, lohpida Ohcejoga gieldda sosiálahoavdda sadjásaš, dikšobarggu jođiheaddji Päivi Kontio.

Olbmot eai leat vel váldán olus oktavuođa sidjiide, muhto jáhkkimis oktavuođaváldimat lassánit dálvvi áigge, dadjá Päivi Kontio. Govva: Vesa Toppari / Yle

Ohcejoga, Eanodaga ja Anára gielddaid sosiáladoaimmas muitalit, ahte šleađgga divrun dovdui olbmuid burssain jo diibmá. Oktavuođaváldimat heajos ruhtadili dihte bohte muhtin veare jo mannan dálvve. Soađegili gielddas ii leamaš vel stuorát dárbu veahkehit olbmuid liggengoluin.

Sosiáladoaimma bealde ávžžuhitge olbmuid váldit áiggil oktavuođa, jus orru ahte ii nákce máksit šleađgarehkegiid. Muhtimin lea geavvan joba nu, ahte olbmuin leat botken šleađgga go rehkegat leat báhcán mávssekeahttá.

Olbmot geahččalit hutkat vugiid, mo seastit šleađgga

Anára sosiáladoaimmas muitalit, ahte gilibargit leat dán čavčča murren olu. Olbmot geahččalit gávdnat koansttaid seastit šleađggas.

Maiddái Kirsti Paadar geahččala iežas stobus unnidit liggengoluid dainna, ahte dolástallá buollašeamos áiggiin. Sus leat rántet dievva muorat dálvvi várás. Murremii son lea ožžon veahki oahppásiin.

– Go mushan lea duo dat gos muorra boaldin, duot uvdna. Gosa mun láven dálvit go lea buolaš, dola bidjalit. Ja de sávnnis, ii mus doppe leat elektriska, mus lea muorra. Dainna mun liggen sávnni, muoraiguin, muitala Paadar.

Nubbi vuohki man Paadar lea váldán atnui, lea stellet loikasut prográmma bassaladdanmášenii.

– Go bassalattan, de in bija go 40 gráđđii. Ja mun duo geahččalin, ahte mo dalle geavvá jus mun 30 gráđđii bijan, bohtetgo buhtes biktasat. De fal bohte, čilgesta Paadar.

Kirsti Paadar lea ráhkkanan maid ullosuohkuiguin dálvvi várás. Beassá siste váccašit liegga suohkut juolggis. Govva: Vesa Toppari / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Ođđasamosat: paketissa on 10 artikkelia