Otne bearjadaga lei čakčajorggáldat dahjege čakčadássebeaivi áhkkorat diibmu 4.04. Čakčajorggáldat lea Sámi mearkabeaivi, dalle idja ja beaivi leaba ovtta guhku. Dadjet, ahte dalle šaddá jagi seavdnjadeamos idja, go ii leat vuos muohttán.
Čakčajorggáldagas beaivváš báitá beanta badjeloaivve eatnanspáppa govahallon gaskasárgá alde. Gaskasárggis juohká eatnanspáppa davve- ja máttabeliide. Dan dihte beaivi lea otne sullii ovttaguhkkosaš birra máilmmi.
Dás beaivvit oatnugohtet Sámis, ja lávvardaga beaivi lea juo váile logemat minuhta oanehut go otne. Beaivvit otnot gitta dálvejorggáldahkii juovllaid vuollai. Ovdamearkka dihte Ohcejogas beaivváš iđii otne ovdalaš čieža ja luoitá juo dalán čieža maŋŋá eahkedis.
Sámis ellet dál Áhtemasvahku
Čakčamánus leat dáid áiggiid earáge mearkabeaivvit. Čakčamánu goalmmát vahkku lea Áhtemasvahkku. Dalle eai láve biekkat ja lea goalki. Dán gohčodit maiddái Máhtesmeassovahkkun. Ruški lea buot buoremus muttus, eanalottit hirrasat ja guolli báhtara čiekŋalassii. Dát lea maiddái álgoragatáigi.
Čakčamánu maŋimuš vahkkuges gohčoduvvo Mihkkalmasvahkkun. Dan muttus láve dávjá borga ja dan gohčodit Mihkkalmasdálvin. Čakčamánu ja golggotmánu doajáldagas bárbmolottit girdilit máttás bárbmui.
Loga lasi Sámi mearkabeivviin Kuátis, Sámi árrabajásgeassima materiálabáŋkkus.
Yle Ođđasiid Sámis ja Beaivvi ságaid sáhtát maid guldalit Yle Areenas.