Njuike sisdoaluide

Sámemánát váldojuvvojedje lobi haga máidnut Suoločielggi – oktage ii váldde ovddasvástádusa neahtas almmustahtton govas

Karoliina Juhola nieiddaža gova geavahedje lobi haga turismamáidnosis, mainna márkanfievrridit Suoločielggi. Máinnus lea dál jávkan.

Karoliina Juhola hálida muittuhit fitnodagaid ovddasvástádusa govaid geavahanlohpeáššiin. Govva: Karoliina Juhola

Roavvenjárgalaš Karoliina Juhola hirpmástuvai dieđus, man oaččui ustibis mannan vahkus.

Mu ustit lei oaidnán máidnosa Facebookas ja váldán das šearbmagova. Son sáddii dan munnje ja jearai, ahte leago dát du mánná, muitala Juhola dáhpáhusas.

Elämys Suomi -mátkedoaimmahaga Suoločielggi máidnosa govas ledje golbma máná gávttit badjelis, main okta lea Juhola nieiddaš. Juhola ii lean oaidnán gova ovdal iige dieđe, gii dan lea govven.

Váttis dieđus dadjat, muhto eahpidin dalán, ahte govva lea váldon Ijahis idja -festiválas, várra sullii guhtta–čieža jagi dassái.

Fitnodat válddii gova eret – govvejeaddji ii leat dieđus

Karoliina Juhola dagai šearbmagovas beaividusa Instagramii, mas mánáid muođut ledje gokčon. Son imaštalai beaividusas, mo lea vejolaš, ahte gova leat geavahan máidnosis lobi haga.

Ledjen tággen fitnodaga ja doppe válde oktavuođa sosiála media bokte. Oanehaččat dušše šállošedje ja almmuhedje, ahte govva lea váldon eret.

Elämys Suomi -mátkedoaimmahagas muitaledje oktavuođaváldimis, ahte ledje ožžon gova ovttasbargoguoimmi govvabáŋkkus. Elämys Suomi lea oassi Elämys Group -konsearnas, man várrehoavda Aarni Kotilainen nanne, ahte govva lea olles márkanfievrridanrivttiin skáhppojuvvon Inari-Saariselkä Matkailu -fitnodaga govvabáŋkkus.

Inari-Saariselkä Matkailu -fitnodaga márkanfievrridanhoavda Hanna Kouri muitala, ahte govva lea boahtán sidjiide Ijahis Idja -festiválas. Festiválabuvttadeaddji Oula Guttorm vástida, ahte sii eai leat gova govven eaige leat juohkán dan ovddosguvlui. Ijahis Idja lea Yle Sámi ovttasbargoguoibmi.

Máinnus lea dál váldon eret. Gova oktavuođas ii leat máinnašuvvon govvejeaddji iige oktage dieđe gii gova lea govven.

Máinnusgovaid geavahanrivttiid ferte sierra sihkkarastit

Jurista Elina Koivumäki muitala, ahte Suomas heivehit riikkaidgaskasaš márkanfievrridannjuolggadusaid, maid mielde olbmo ja gova, mas su sáhttá dovdat, ii oaččo geavahit gávppálaš máidnumis almmá govvejuvvon olbmo logi haga. Vuolleahkásaš olbmo buohta lobi ferte jearrat fuolaheaddjis.

Govvabáŋkkuid soahpamušeavttut molsašuddet dan ektui, sáhttágo govaid geavahit márkanfievrrideapmái. Karoliina Juhola ii livčče addán lobi gova almmustahttimii máidnosis.

– Govva ii laktásan mange láhkai máidnosa sisdollui. Das márkanfievrridit Suoločielggi iige dat njuolga laktás sámekultuvrii. Govas leat mánát, geain leat gávttit badjelis.

Maiddái Juhola nieiddaš leamašan ipmašis dáhpáhusa geažil. Govaid lohpeáššit leat oahppásat sutnje, go son leamašan máinnusmodeallan govain ja videoin.

– Sutnje leat máksán dain buhtadusa ja mii leat dárkilit válljen, masa leat miehtan. Son livčče gal sáhttán Suoločielggige máidnut, muhto dalle sus ii livčče gákti badjelis.

Juhola ja su nieiddaš vásiheabage erenomáš unohassan dan, ahte nieiddaža etnisitehta leat geavahan buorrin. Juhola ii leat diktán gáhta alde vierroolbmuid govvet iežas iige iežas mánáid.

– Dat lea áibbas ortnegis, ahte dáhpáhusain leat iežaset govvejeaddjit, geat govvejit olmmošjoavkkuid. Muhto lea dieđus váivi, jus govaid geavahit boasttoláhkai.

Yle Ođđasiid Sámis ja Beaivvi ságaid sáhtát maid guldalit Yle Areenas.

Ođđasamosat: paketissa on 10 artikkelia