Njuike sisdoaluide

Geahča video: Gárasavvona skuvla Eanodagas beassá viimmatge sadjásaš skuvlalanjaide – boares skuvllas lea fuones sisáibmu

Gárasavvona skuvllas lea vel dán vahku hušša, go sii fárrejit sadjásaš skuvlalanjaide. Skuvlla viđát luohká oahppi Ebba Valkeapää illuda ovttas earáiguin, go beassá vázzit skuvlla buhtes ja dearvvas vistis.

Kaaresuvannon koulun väistötilat.
Gárasavvona ođđa sadjásaš skuvlavistái leat máŋga luohká beassan fárret. Olles skuvla gálgá fárret maŋimustá čakčamánu loahpas. Video: Anneli Lappalainen / Yle

Gárasavvona skuvllas Eanodagas lea daid beivviid áigge fárrenhušša mannamin. Ođđa lanjain lea álgán oahpahus dađe mielde, go luohkáid fárren ovdána. Fárren gálggašii leat meattá bearjadaga.

Gárasavvonlaš skuvlalaš Ebba Valkeapää lea viđát luohká álggahan dán čavčča. Son lea mielas go beassá vázzit skuvlla ođđa, dearvvas dálus. Son muitala iežas gillán fuones sisáimmus sakka.

– Oažžut ođđa skuvlla, vaikko diet leage oalle unni. Boares skuvllas leamašan oalle heajos ilbmi, son muitala.

Ebba Valkeapää: "Oaččut ođđa skuvla vaikko diet leage oalle unni. Boares skuvllas leamašan oalle heajos ilbmi." Govva: Anneli Lappalainen / Yle

Gárasavvona skuvlla jođiheaddji Virpi Labba lea ilus, go skuvla beassá fárret ođđa buhtes vistái.

– Ođđa dálus luohkát leat smávit, muhto gal sii dohko čáhkket, go sis leat smávva oahpahusjoavkkut maid. Vuorkkáid ja eará sajiid ferte dutkat, maid dohko čáhká. Mun váillahan oktasaš čoahkkananbáikki, go dat váilu ođđa skuvlalanjain.

Virpi Labba geahččá boahtteáigái juo ja vuordá golmma jagi siste dan, ahte ođđa skuvlavisti, máŋggadoaimmadállu válmmaštuvvá Gárasavvonii. Son sávvá dan, ahte dat lea boahtte jagi plánain fárus.

– Gal mis lea mielas dat ođđa skuvla, mii boađášii dán boares skuvlla sádjái.

Virpi Labba sávvá, ahte gielda várre ruđa boahtte jagi bušehttii ođđa skuvla plánemiid ja boares skuvla gaikkodeapmái. Govva: Anneli Lappalainen / Yle

Sadjásaš skuvlalanjat galge leat garvá atnui borgemánu álggus, muhto fárren lea dál mannamin ođđa skuvlalanjaide. Ollásit skuvla gálgá lea ođđa sadjásaš visttis dán mánu loahpas.

Sadjásaš skuvlavisti lea gaskaboddosaš. Dalle go ođđa skuvlavisti gárvána, de Gárasavvon fidne das láigodálu.

Gárasavvona skuvllas gávnnahedje fuones sisáimmu diibmá. Skuvllas ledje mikrobat ja dat ii deavdán dearvvaslaš sisáibmui ásahuvvon gáibádusaid.

Beaivvi ságaid ja Yle Ođđasiid Sámis sáhtát maid guldalit Yle Areenas.

Ođđasamosat: paketissa on 10 artikkelia