Njuike sisdoaluide

Almmolašvuođas ain golbma komissáraevttohasa – ođđa namat soitet goittotge boahtit ovdan dievasčoahkkimis, geažida Leo Aikio

Sámediggi čoahkkana bearjadaga gieđahallat duohtavuođa- ja soabadankomišuvnna ođđa komissáraid nammadeami ja vejolaš joatkkadoaimmaid áššis. Molssaeaktun lea juogo joatkit dahjege heaittihit soabadanproseassa.

Sámedikki nubbi várreságadoalli Leo Aikio muitala, ahte Sámediggi lea ožžon máŋgalogi cealkámuša soabadanproseassa joatkima bealis. Govva: Anneli Lappalainen / Yle

Sámedikki dievasčoahkkimis bearjadaga čakčamánu 30. beaivve lea vuot áššin duohtavuođa- ja soabadankomišuvnna ođđa komissáraid nammadeapmi ja vejolaš joatkkadoaimmat áššis.

Sámediggi mearridii borgemánu dievasčoahkkimis váldit bottu soabadanproseassas. Maŋŋelis stáhtaráđi kansliija bivddii ođđasit nammadit komissáraid, go dat lea eaktun dasa, ahte oba komišuvnna čállingoddige sáhttá joatkit doaimmas.

– Čielggai, ahte dán ii leat vejolaš gaskkalduhttit ja váldit bottu. Olbmuid ii sáhte doallat barggus bargguid haga, muitala Sámedikki nubbi várreságadoalli Leo Aikio.

Molssaeaktun lea juogo joatkit dahjege heaittihit soabadanproseassa.

Sámedikki stivra bivddiige borgemánu maŋimuš beaivve sámeservošis oaiviliid komišuvnna barggu joatkimis. Mearreáigi nogai čakčamánu 19. beaivve, ja dan áiggis bohte 32 oaivilastima áššis.

Várreságadoalli Leo Aikio muitala, ahte dain stuorámus oassi guottiha komišuvnna barggu dárbbašlašvuođa.

– Gal doppe leat buorit ákkat dasa, Aikio dadjá.

Cealkámušain badjel 90 proseantta guottihit proseassa joatkima

Sámedikki borgemánu dievasčoahkkimis evttohus bottu váldimis oaččui ovtta jiena eanet go stivrra evttohus komissáraid nammadeami bealis. Sámediggi stivrage ii lean jienasteamis ovttaoaivilis, go jienat juohkásedje soabadanproseassas bottu váldima bealis ja vuostá.

– Olbmuin leamašan ja leat ain iešguđetlágan oaivilat dán áššis. Mii leat goittotge beassan ovttaoaivilii das, ahte dát ášši váldo ođđasis gieđahallamii dáid ođđa dieđuid čuovggas, Aikio čilge.

Aikio fuomášuhttá, ahte borgemánus eai vel diehtán dan, ahte bottu váldin ii geavadis leat vejolaš.

– Galhan cealkámušain bohte ovdan oaivilat bealis ja vuostá, muhto badjel 90 proseantta cealkámušain goittotge guottihit soabadanproseassa joatkima. Dat lea čielga mearka midjiide das, maid álbmot hálida, Aikio dadjá.

Almmolašvuođas leat ain golbma komissáraevttohasa, geat ledje ovdan juo borgemánu čoahkkimisge: Juha Lassila, Anne Nuorgam, ja Heikki Paltto. Dasa lassin cealkámušain soitet leat boahtán ovdan ođđage namat, Aikio máinnaša.

– Dan mii oaidnit de čoahkkimis, makkár evttohusat doppe badjánit. Doppe mii beassat de ságastallat, son dadjá.

Ođđasamosat: paketissa on 10 artikkelia