Njuike sisdoaluide

Britannia lea beroštuvvan árktalaš guovllu áššiin – golmma davviriikka ambassadevrra gallededje Gilbbesjávrris

Galledeami temán ledje árktalašvuohta, dálkkádat ja dorvvolašvuohta. Ambassadevrrat deaivvadedje Eanodaga gieldda ja Sámedikki ovddasteaddjiid.

Britannian Suomen ja Ruotsin suurlähettiläät keskustelevat Saamelaiskäräjien edustajan kanssa.
Britannia Suoma, Ruoŧa ja Norgga ambassadevrrat leat dán vahkus galledan Gilbbesjávrris golmma riikka rájá alde. Video: Jyri Tynkkynen ja Susanna Guttorm / Yle

Britannia Suoma, Ruoŧa ja Norgga ambassadevrrat leat dán vahkus ságastallan árktalaš áššiin Gilbbesjávrris golmma riikka rájá alde. Temán ledje árktalašvuohta, dálkkádat ja dorvvolašvuohta. Ambassadevrrat deaivvadedje Eanodaga gieldda ja Sámedikki ovddasteaddjiid.

Britannia Ruoŧa ambassadevrra Judith Gough mielas deaivvadeapmi attii vejolašvuođa gullat sápmelaččaid vásáhusaid dálkkádatnuppástusas.

– Mannan jagi dálkkádatčoahkkimis Skottlánddas gávnnahedje, ahte báikkálaš servošat galget beassat váldit oasi áššiide. Sii dávjá dihtet buorebut go earát mii dáhpáhuvvá ja manin. Dát addá midjiide vejolašvuođa gullat sin ja midjiide oktavuođa dáidda servošiidda áššiin, mat gusket dálkkádatnuppástussii.

Britannia Suoma-ambassadevra Theresa Bubbear muitala, ahte Britannia lea oalle lagaš árktalaš kránnjá ja beroštuvvan das mii davvin dáhpáhuvvá.

– Mii bargat ovttasbarggu davviguovlluid universitehtaiguin ja áššedovdiiguin, vai sáhttit oahppat sis ja juohkit dieđuid.

Britannia ii gula árktalaš riikkaide, muhto dat lea beroštuvvan ovddidit ja bidjat ruđa fidnuide, mat gusket árktalaš guovlluide. Suoma Sámedikki riikkaidgaskasašáššiidčálli Lars-Anders Baer lea duhtavaš go stuorra riika lea beroštuvvan sámiid oainnus.

– Jáhkán, ahte lea dehálaš go oažžu ipmárdusa álgoálbmotáššiiguin. Ja dat lea buorre mearka, go ambassadevrrat mannet galledeamen dáppe davvin ja vigget faskat eambo dieđu álgoálbmogiin ja dálkerievdadusa birra.

Yle Ođđasiid Sámis ja Beaivvi ságaid sáhtát maid guldalit Yle Areenas.

Ođđasamosat: paketissa on 10 artikkelia