Njuike sisdoaluide

Ovttastallan lea okta oassi vuorrasiidvahku deaivvademiin – Katri Marja Pieski mielas hálešteapmi iežas ahkásaš olbmuiguin lea dehálaš

Vuorrasiidvahku áigge sihke gielddat ja organisašuvnnat ordnejit dáhpáhusaid vuorraset olbmuide.

Katri Marja Pieskii eai ordnejuvvon lihkadanbottut leat nu dehálaččat, baicce hálešteapmi iežas ahkásaš olbmuiguin. Govva: Kirsti Länsman / Yle

Ohcejohkalaš Katri Marja Pieski liiko johtit ordnejuvvon bussereaissuin, go busses láve leat dihtolágan dovdu. Son maid johtá deaivvademiin, mat leat dárkkuhuvvon vuorraset olbmuide, go doppe beassá háleštit vássán áiggi birra iežas ahkásaš olbmuiguin.

– Dáppehan gal sáhttá háleštit. Dannehan mun láven dáppe liikot fitnat go dat lea vejolaš, logai Pieski mannan vahkus Sámi Sostera ordnen vuorrasiid deaivvadeamis.

Dán vahkus davvin lágidit vuorrasiidda ollu iešguđetlágan dáhpáhusaid. Ággan lea vuorrasiidvahkku, mii lea álgán sotnabeaivve 2.10 vuorrasiidbeivviin. Dán jagi temán lea Yhdessä luontoon – joka iän oikeus, sámegillii Ovttas lundui – juohke agi vuoigatvuohta.

Ohcejogas gielda, searvegoddi ja Sámi Soster -searvi ordnejit ovttasbarggus deaivvademiid (siirryt toiseen palveluun)Gáregasnjárggas, Ohcejogas ja Njuorggámis. Deaivvadeami prográmmas lea earret eará stuollolášmmohallan, rohkosboddu ja boradeapmi.

Anára gielddasges vuorrasiid vahku áigge leat máŋggat iešguđetlágan dáhpáhusat (siirryt toiseen palveluun), ovdamearkka dihte gaskavahkku 6.10 leat beaivedánssat Avvilis gávnnadanbáiki Ainolas. Dan lassin gielddaráđđehus oassálastá Vie Vanhus Ulos -kampanjái (siirryt toiseen palveluun) ja hástala maid eará luohttámušolbmuid searvat dasa.

Lea dehálaš, ahte vuorraset olbmot dahket áššiid ja oassálastet

Ohcejoga gieldda rabasdivššustivrejeaddji Kaisa Karhu-Härkönen muitala, ahte vuorrasiidvahku dáhpáhusain Ohcejogas leat muitán jagi temá nappo luonddu. Dat boahtá ovdan sihke sáhkavuoruin ja maiddái borramušas, go fállun lea bohccobiergomálli ja bajiluššan muorjegáhkku.

Karhu-Härkönen muitala ahte lea dehálaš, ahte vuorraset olbmuide leat dáhpáhusat, main sin dárbbut ja sávaldagat leat váldojuvvon vuhtii.

– Oainnán, ahte lea dehálaš, ahte vuorraset olbmot leat oassin dahkame, ollašuhttime ja maiddái oassálastet áššiide, Karhu-Härkönen lohká.

Ohcejoga rabasdivššu stivrejeaddji Kaisa Karhu-Härkönen muitala, ahte deaivvadeapmi lea guovddážis vuorrasiidvahku dáhpáhusain Ohcejoga gielddas. Govva: Kaisa Karhu-Härkönen.

Son muittuha, ahte ovttastallan lea okta dehálaš oassi vuorrasiidvahku deaivvademiin.

– Deaivvadeapmi lea guovddáš ášši. Olbmot besset deaivat nubbi nuppi ja ságastallat ja leat ovttas, muitala Karhu-Härkönen.

Ohcejoga gieldda giliin ordnejuvvon dáhpáhusain iešguđet organisašuvnnat muitalit iežas doaimmaid birra ja das, makkár fálaldagat sis leat vuorraset olbmuide. Ohcejoga boarrásiidráđi ságadoalli Niilo Vuomajoki áigu muitalit boarrásiidráđi birra.

Ohcejoga boárrasiidráđi ságadoalli Niilo Vuomajoki áigu johtit dáhpáhusain ja gullat makkár sávaldagat olbmuin leat sin bálvalusaide. Govva: Kirsti Länsman / Yle

Son muitala, ahte dáhpáhusat maid dál ordnejit, gullet ovddeš boarrásiidráđi olahusaide, nappo son ii leat leamaš daid pláneme. Son goit searvá iešguđetlágan vuorraset olbmuide čujuhuvvon dáhpáhusaide, vai beassá gullat makkár sávaldagat vuorraset olbmuin leat bálvalusaide, mat leat sidjiide čujuhuvvon.

Vuorrasiid beaivvi ja vahku lea álggahan Vuorrasiidbarggu guovddášlihttu, ja dat leamašan jagi 1954 rájes.

Yle Ođđasiid Sámis ja Beaivvi ságaid sáhtát maid guldalit Yle Areenas.

Ođđasamosat: paketissa on 10 artikkelia